ლილიტმა მერწყულში გადაინაცვლა - რა სირთულეებს შეუქმნის ზოდიაქოს ნიშნებს მომდევნო 9 თვე

ასტროლოგების ინფორმაციით, 6 აგვისტოს შავმა მთვარემ ე.წ. ლილიტმა, თხის რქის ზოდიაქო დატოვა და მერწყულის ზოდიაქოში გადაინაცვლა, რამაც მერწყულებში გარკვეული აღელვება გამოიწვია. ასტროლოგების ინფორმაციით, ეს პერიოდი 9 თვის მანძილზე გაგრძელდება და გარკვეულ სირთულეებს შეუქმნის სწორედ მერწყულებს. რეალურად რა არის შავი მთვარე, რას განსაზღვრავს და როგორ უნდა განვლონ ზოდიაქოს ნიშნებმა 9-თვიანი რთული პერიოდი, ამაზე ასტროლოგი ხათუნა ნოელი გვესაუბრება.

- შავი მთავარე, ანუ ლილიტი რა არის და რას განსაზღვრავს ასტროლოგიაში?

- მიუხედავად იმისა, რომ ასტროლოგების დიდი ნაწილი ლილიტს სერიოზულ მნიშვნელობას ანიჭებს, ის არ არის პლანეტა. ლილიტი მთვარის ორბიტაზე დედამიწიდან ყველაზე დაშორებული გამოთვლითი წერტილი გახლავთ. მეცნიერული ტერმინი რომ გამოვიყენოთ - მთვარის აპოგეაა. ასეთი დაშორების გამო, მისი გავლის დროს მთვარეს ყველაზე ნაკლები სიკაშკაშე აქვს, სწორედ ამიტომ ლილიტს შავ მთვარედაც მოიხსენიებენ. თუმცა მისი სიშავე მარტო ამით არაა განპირობებული. ეზოთერული კუთხით თუ მივუდგებით, მიიჩნევა, რომ ლილიტი გამოხატავს წარსული ინკარნაციების განმავლობაში ჩვენს მიერ დაგროვილ ნეგატიურ კარმას. რუკაში ლილიტი წაროადგენს ჩვენი ქმედებების დაფარულ, გაუცნობიერებელ ნეგატივს. მისით იმართება ასევე სხვადასხვა ფსიქოლოგიური კომპლექსები და შიშები. ამის გამო შავი მთვარე, ანუ ლილიტი ასტროლოგიაში ჩვენი პიროვნების "ბნელ მხარედ" არის მიჩნეული.

- ასტროლოგიურ საიტებზე გავრცელდა ინფორმაცია, რომ შავმა მთვარემ თხის რქის ზოდიაქო დატოვა და მერწყულის ნიშანში გადავიდა. რამდენ ხანს გაგრძელდება ეს პერიოდი და რას მოიტანს?

- დიახ, 6 აგვისტოს დილის 11:53 წუთზე ლილიტმა დატოვა თხის რქის ზოდიაქოს უკანასკნელი გრადუსიც და მერწყულის ნიშანში გადავიდა. ის აქ მომავალი წლის 4 მაისამდე იმოძრავებს.

- ამბობენ, 9 წელიწადში ერთხელ ხდებაო? რატომ?

- პლანეტებს და ისეთ გამოთვლით წერტილებსაც, როგორიც ლილიტია, თავ-თავისი ციკლი გააჩნიათ. თუ ყველაზე ნათელ მაგალითს მოვიყვანთ, მზეს 1 წელი სჭირდება, რომ ზოდიაქალურ წრეს სრულად შემოუაროს, 28 დღიანი ციკლი აქვს მთვარეს. ზოგს შესაძლოა, იუპიტერის 12-წლიანი ციკლის შესახებაც სმენიათ, რომელსაც აღმოსავლური ასტროლოგია ეფუძნება, აი, ლილიტი კი ზოდიაქალური წრის სრულად გავლას, დაახლოებით, ცხრა წელს ანდომებს და ამიტომაც ყოველ 9 წელიწადში, ისევ იქ ხვდება, სადაც ჩვენი დაბადების მომენტში იყო. თუ უკან გავიხედავთ, ვნახავთ, რომ ბოლოს შავი მთვარე მერწყულის ნიშანს გადიოდა 2009-2010 წლებშიც, კიდევ უფრო უკან ეს იყო 2001 წელი და ა.შ.

- მერწყულებს შავი მთვარე პრობლემებს შეუქმნის? მართლაც რას უნდა ელოდონ ისინი ამ პერიოდში?

- როდესაც შავი მთვარე რაიმე ნიშანს გადის, როგორც წესი, იმ ზოდიაქოს წარმომადგენლების უმეტესობა ცხოვრებაში მეტ-ნაკლებად სერიოზული პრობლემების წინაშე დგებიან. ეს შესაძლოა ჩაითვალოს, როგორც გამოცდა, შემოწმება ადამიანობაზე, კეთილსინდისიერებაზე. თუ რამდენად აჰყვება ან დაძლევს ეს პიროვნება ლილიტისგან შემოთავაზებულ ცდუნებებს. 9-თვიანი ციკლი, გარკვეული თვალსაზრისით, ორსულობის პერიოდთან იწვევს ასოციაციას და მართლაც, ზოგიერთი ასტროლოგის აზრით, ეს სიმართლესთან არც თუ შორია. თუმცა სავარაუდოდ, მერწყულთა უმეტესობისთვის, შესაძლოა, რომ ამ პერიოდში დაწყებული ორსულობა ფრიად არასასურველიც იყოს - მათ გეგმებს არ ემთხვეოდეს, ან უარყოფითად აისახოს ჯანმრთელობაზე.

გარდა ამისა, მოსაფრთხილებელი იქნება ჩვენი ურთიერთობები შვილებთან, ახლო მეგობრებთან, იმ კოლექტივის წევრებთან, რომლებთანაც საერთო საქმეში ვართ ჩართული, სირთულეები შეიძლება შეიქმნას სპონსორებთან ურთიერთობებშიც. შესაძლოა ცდუნების გზაზე მდგომ ადამიანებში გაჩნდეს სურვილი მიზნების მისაღწევად, გამოიყენოს პროტექციონიზმი, ან კრიმინალურ ავტორიტეტებს სთხოვოს მფარველობა... არაა გამორიცხული, რომ სხვა ასოციალურ სურვილებთან ერთად, ადამიანების ნაწილმა უსაქმურობა და უმუშევრობა ჩათვალოს თავისუფლების გამოვლენად... მოვლენებს განსაკუთრებულად აქტიური გამოხატულება ექნებათ მაშინ, როდესაც ლილიტი სხვა პლანეტებთან შეერთდება. განსაკუთრებით აქტიური ამ მხრივ იანვარი და თებერვალი იქნება და ასევე მარტის ბოლო დეკადა.

სირთულეებია მოსალოდნელი კომპიუტერული ტექნოლოგიების, ინტერნეტის და სოციალური ქსელების მუშაობაში. მომრავლდება ჰაკერული თავდასხმები, ამ 9 თვის მანძილზე ალბათ ბევრი სამუშაო გამოუჩნდებათ მობილურების და კომპიუტერების შემკეთებელ ხელოსნებს, და საერთოდაც ნებისმიერი ტექნიკა დაწყებული უბრალო ფენიდან, დამთავრებული საჰაერო ხომალდებით, რომ გაუმართავად იმუშავებს და ხშირად გამოვა მწყობრიდან - ამაშიც სამწუხაროდ, თვალნათლივ დავრწმუნდებით.

მერწყულებისთვის და ლილიტი მერწყულებისთვის მაქსიმალურად სჯობს, თვითმფრინავით მგზავრობისგან თავის შეკავება, არ ღირს არც ახალი ტექნიკის შეძენა ამ ტრანზიტის მანძილზე.

- თუ სირთულეები გარდაუვალია, რა უნდა გააკეთონ, რომ თავი დაიცვან ამ ყველაფრისგან?

- ამ ტრანზიტის დროს შესაძლოა, ადამიანური ღირებულებების გაუფასურება იყოს, რადგან შესაძლოა, არასწორ ჭრილში იქნას აღქმული ჭეშმარიტებისკენ სწრაფვა, ჰუმანიზმი. დემოკრატია, ჰუმანიზმი, რეფორმები, სოციალური ცვლილებები. მეორე უკიდურესობა, რომელიც მერწყულის ლილიტს შეუძლია გამოიწვიოს, ეს არის თავისუფალი ნების სრული დათრგუნვა, უმკაცრესი კონსერვატორული და დოგმატური საზღვრების დაწესებით. ამ ყველაფრიდან გამოსავალი კი ერთია - ნუ დავივიწყებთ, რომ ჩვენი თავისუფლება იქ უნდა მთავრდებოდეს, სადაც სხვების უფლებები იწყება, პატივი ვცეთ ერთმანეთს, ვიყოთ მეტად ჰუმანურები და ნუ მივცემთ ბნელ ძალებს საშუალებას, ჩვენზე იბატონონ.

გისურვებთ ამ რთული გზის დანაკარგების გარეშე გავლას!