რას წერს რუსული მედია "აგვისტოს ომზე" და როგორ აფასებენ 10 წლის წინანდელ მოვლენებს

2008 წლის ომს, მის წინაპირობებსა და შემდგომ პროცესებს რუსული მედიაც აფასებს. ხელისუფლების მიერ კონტროლირებადი მედიის მთავარი "არგუმენტი", რომ რუსეთი მშვიდობიან მოსახლეობას იცავდა და იძულებული გახდა ქართველი აგრესორებისთვის ცეცხლი გაეხსნა - უცვლელია; თუმცა, არსებობს მეტ-ნაკლებად განსხვავებული მოსაზრებებიც, რომლის წაკითხვაც ღირს.

ekhokavkaza.com-თან საუბარში ცხინვალელი მილანა გოგიჩევა იხსენებს, რომ სახლი, მცირეწლოვან შვილებთან ერთად, ჯერ კიდევ აგვისტოს დასაწყისში დატოვა, რადგან "სამხრეთ ოსეთში" ვითარება უკვე სახიფათო იყო. მისი თქმით, გარშემო სახლები იბომბებოდა და მხოლოდ მაშინ იგრძნეს თავი უსაფრთხოდ, როდესაც ქალაქი მთლიანად რუსმა სამხედროებმა დაიკავეს.

novayagazeta.ru-ს ბლოგერი იულია ლატინინა აქვეყნებს მოსაზრებას, თუ როგორ მზადდებოდა ომი:

"მე ომამდე არაღიარებულ რესპუბლიკაში ვიყავი და იქიდან დაბრუნებულმა ვთქვი, რომ კავკასიაში იქნება ომი და ის დაიწყება სამხრეთ ოსეთში..." - წერს ჟურნალისტი, რომელმაც რუსეთი გარკვეული მოსაზრებით დატოვა და განაცხადა, რომ საფრთხის გამო იქ ცხოვრებას ვეღარ გააგრძელებდა.

ბლოგში ლატინინა სამხრეთ ოსეთის ე.წ. ხელმძღვანელობას ბანდიტებად მოიხსენიებს, რომლებიც მისი თქმით, ქართულ მხარესთან ერთად კონტრაბანდით იკვებებოდნენ, თუმცა მას შემდეგ, რაც მიხეილ სააკაშვილმა ეს შეაჩერა, მათ ისღა დარჩენოდათ რომ სანგრებში დამსხდარიყვნენ და რუსული ფულის გამო "ქართველი ფაშისტების" წინააღმდეგ ეომათ.

ლატიტინა წერს, რომ ცხინვალის რეგიონს ეკონომიკაში სრული გარღვევა ჰქონდა - ე.წ. რესპუბლიკაში არ მუშაობდა წყალსადენი, ფული პრაქტიკულად არ ტრიალებდა, რადგან როდესაც თავად დაჭირდა, 1000 რუბლის გადაცვლაც ვერ შეძლო.

"ერთ-ერთმა ოსმა ავნევისკენ მიმითითა და სიამაყით მითხრა, რომ ის იყო გეოპოლიტიკური ცენტრი, საიდანაც ამერიკაზე გამარჯვება დაიწყებოდა... აქეთ და იქით სოფლებსა და მის მოსახლეობას შორის განსხვავება ისეთი იყო, როგორც ღაზასა და თელ-ავივის მოსახლეობა შორის. სამხრეთ ოსეთს კორუფცია მართავდა, საქართველოს - კანონი და წესრიგი. სამხრეთ ოსეთში ადგილობრივებს უწევდათ მოქალაქეობაზე უარი ეთქვათ და საქართველოს საავადმყოფოებში ემკურნალათ. დაძაბულობა ჯერ კიდევ თვის დასაწყისში დაიწყო - რუსეთის შეიარაღებულმა ძალებმა საქართველოს საზღვართან "ქართული აგრესიის" წინააღმდეგ ფართომასშტაბიანი წვრთები დაიწყეს.

3 აგვისტოს სამხრეთ ოსეთის პრეზიდენტმა ედუარდ კოკოითმა მოსახლეობის ევაკუაციის ბრძანება გასცა. მათ ნაცვლად ქალაქში "მოხალისეები" შემოვიდნენ. გაურკვეველმა ჯგუფებმა დაიწყეს სროლა საქართველოს შეიარაღებული ძალებისა და ქართული სოფლების მიმართულებით, თუმცა შემდეგ რუსული მედია აქტიურად წერდა, რომ პირიქით, ქართული მხრიდან ისროდნენ...

ამის მაგალითი იყო ოსეთის ე.წ. ხელისუფლების განცხადება, რომ ქართველმა სამხედროებმა მიწასთან გაასწორეს ოსური სოფლები - დმენისი და ხეთაგუროვო, თუმცა როდესაც ჟურნალისტები იქ ჩავიდნენ, ნახეს რომ იქაურობისთვის ხელიც არავის უხლია. სამაგიეროდ, მიწასთან იყო გასწორებული მეზობლად მდებარე ქართული სოფელი - ნული... ეს იყო კლასიკური პროპაგანდა. ომის დასრულების შემდეგ დაიდო ტალიავინის დასკვნა. კითხვაზე, ვინ დაიწყო ომი, მან უპასუხა, რომ ქართველების პოზიციიდან ომი დაიწყო რუსეთმა და რუსეთის პოზიციიდან - საქართველომ,"- წერს ლატინინა.

მისივე თქმით, ამ ომიდან ძალიან მალე ამერიკასა და რუსეთს შორის "გადატვირთვის პოლიტიკა" დაიწყო, რასაც დონბასი და ყირიმი მოჰყვა, თუმცა რუსეთი ამაზე არ გაჩერებულა...

"საქართველოს, უკრაინის, სირიისა და ამერიკაში "ჰიბრიდული ომის" შემდეგ, კრემლი ყოველთვის აკეთებდა "მოდუს ოპერანდი"-ს დემონსტრირებას, ანუ ყოველთვის უარყოფდა თავის პირდაპირ მონაწილეობას ნებისმიერ ომში და თავის ქმედებებს ყოველთვის მოხალისეებს მიაწერდა. ფაქტია, რომ გასდიოდა კიდეც.

საქმე ის არის, რომ მოგებული უმეტესწილად რუსეთი რჩებოდა. მაგალითად, სააკაშვილმა დაკარგა ძალაუფლება, ამომრჩეველმა მას წაგებული ომი არ აპატია, თუმცა ასეთ სიტუაციებში არც რუსეთი დარჩენილა მოგებული - მან დამატებითი პრობლემების გარდა, ვერაფერი მიიღო. ყირიმის ანექსიის შემდეგ, მან "ჰიბრიდული ომი" წამოიწყო, თუმცა ამან ქვეყანას გავლენების გაფართოება ან ქვეყნის ეკონომიკის ზრდა ვერ მოუტანა...

ერთი სიტყვით, უნდა დავფიქრდეთ, ღირს თუ არა ამდენი ბოროტების გაკეთება იმისთვის, რომ ასე ცოტა სარგებელი მიიღო," - წერს რუსი ბლოგერი.