"შვიდკაცა" 20 წლის იუბილეს "ბლექ სი არენაზე" ამერიკულ ჯგუფ "Take 6"-სთან ერთად აღნიშნავს

11 აგვისტოს, პროექტ Check in Georgia-ს ფარგლებში, "ბლექ სი არენაზე" ანსამბლ "შვიდკაცასა" და ჯგუფ "Take 6"-ის ერთობლივი კონცერტი გაიმართება. "შვიდკაცას" საიუბილეო კონცერტი ანსამბლის სცენაზე მოღვაწეობის 20 წლის იუბილეს ეძღვნება.

კონცერტში მონაწილეობს საქართველოს ეროვნული სიმფონიური ორკესტრი ნიკოლოზ რაჭველის ხელმძღვანელობით. გაჟღერდება "შვიდკაცას" რეპერტუარიდან ცნობილი სიმღერები, რომელიც ნიკოლოზ რაჭველის ახლებური ინტერპრეტაციით იქნება წარმოდგენილი. მაყურებელი მუსიკოსების საინტერესო კოლაბორაციას იხილავს - ეს იქნება სიმფონიური ორკესტრის თანხლებით "შვიდკაცასა" და ამერიკული ჯგუფის ერთობლივი გამოსვლა, ამასთან, "გრემის" მფლობელი "Take 6" თავისი რეპერტუარიდან ცნობილ კომპოზიციებს შეასრულებს.

"შვიდკაცას" მრავალწლიანი სასცენო მოღვაწეობის განმავლობაში გამართული აქვს არაერთი სოლოკონცერტი, როგორც საქართველოში, ასევე უცხოეთში, 2017 წელს პირველი ქართული ანსამბლი გახდა, რომელმაც სიმღერა, Oracle არენაზე, სადაც ერთმანეთს ხვდებოდა Golden State Warriors და Memphis Grizzlies. ამერიკული ჯგუფი 1980 წელს ალაბამაში ჩამოყალიბდა. 10 `გრემის~ გარდა მიღებული აქვთ სხვადასხვა პერსტიჟული მუსიკალური ჯილდო თუ ნომინაცია. ჯგუფი თანამშრომლობდა ისეთ ცნობილ არტისტებთან, როგორებიც არიან: რეი ჩარლზი, უიტნი ჰიუსტონი, ელ ჯერო, ქუინსი ჯონსი, ქუინ ლატიფა, ბრაიან მაქნათი, მარკუს მილერი და სხვა.

ანი კავლელიშვილი, "ბლექ სი არენას" დირექტორი:

ჩვენთვის მნიშვნელოვანია Check in Georgia-ს ფარგლებში "ბლექ სი არენას" სცენა დაეთმოს ქართულ პროექტებს, ქართველ შემსრულებლებს. როგორც იცით, ჩვენს დარბაზს უნიკალური შესაძლებლობები აქვს, რომლის გამოყენებაც მეტ გამოცდილებას აძლევს ჩვენს ვარსკვლავებს, ქართული ესტრადა სხვა საფეხურზე გადაჰყავს. ვფიქრობ, ეს უნიკალური შანსი სწორედ ქართველებმა მაქსიმალურად უნდა გამოიყენონ. ჩვენი პრიორიტეტი და მიმართულებაა სინთეზური კონცერტები და მუსიკალური ექსპერიმენტები.

სწორედ ამიტომ, "შვიდკაცასთან" ერთად, ძალიან საინტერესო ღონისძიება დავგეგმეთ, რომელშიც სპეციალური სტუმრები, ჯგუფი "Take 6"-ია. ქართული და ამერიკული სიმღერის ფონზე მუსიკის საოცარი სინთეზი მოხდება... მნიშვნელოვანი იყო, რომ ამ მუსიკალურ ექსპერიმენტზე ქართველებიც და ამერიკელებიც წამოვიდნენ. მიხარია, რომ 2 წლის შემდეგ, ეს ექსპერიმენტი შედგა.

ალბათ ეს ყველაფერი არ იქნებოდა, რომ გვერდით ნიკოლოზ რაჭველი არ გვყოლოდა. ამ პროექტის რეჟისორია ჩვენი დიდი ხნის მეგობარი, პარტნიორი ბასა ფოცხიშვილი. მას ჩვენთან სხვა დროსაც უთანამშრომლია, არაჩვეულებრივად დაინახა "ბლექ სი არენას" შესაძლებლობები. ამიტომ ვგრძნობ და ვხედავ, რომ ამჯერადაც ეს კონცერტი მხატვრულად საინტერესო გამოვა.

ნიკა რაჭველი, პროექტის მუსიკალური ხელმძღვანელი:

"შვიდკაცა" არის ანსამბლი, რომელიც ერთი მხრივ აგრძელებს მრავალხმიანობის კარგ ტრადიციას, შესანიშნავად ასრულებს სასულიერო მუსიკას, ფოლკლორულ მუსიკას, პოპულარულ მუსიკას, თბილისურს და ყველაფერს, რაც კი შეიძლება ქართულ სიმღერას უკავშირდებოდეს. ამ კონცერტში ეს მრავალფეროვნება იქნება წარმოდგენილი და ამის გვერდით ვიხილავთ ამერიკულ ბრწყინვალე ჯაზ-სექსტეტს. "შვიდკაცა" არსებობის 20 წლის იუბილეს აღნიშნავს ყველაზე დიდ, გამორჩეულ, შთამბეჭდავ სივრცეში, რასაც "ბლექ სი არენა" ჰქვია... ჩემი სისუსტე როიალია და საქართველოში საუკეთესო "სტენვეები" სწორედ იქ დგას. ამიტომ, ბედნიერი ვარ, რომ იქ მიწევს დაკვრა.

ასევე ბედნიერი ვიქნები იმით, რომ ამ საუკეთესო ჯგუფებთან ერთად, ეროვნულ სიმფონიურ ორკესტრთან მომიწევს სცენაზე მუშაობა. მიხარია ისიც, რომ კონცერტზე გადაკვეთა მექნება ბასა და თამრიკო ფოცხიშვილებთან. ყოველთვის ვემორჩილები ბასას იდეებს და ეს მორჩილება ძალიან სასიამოვნოა -ასეთ დროს, ზუსტად იცი, პროექტი რა შედეგით დასრულდება. კოლაბორაციული პროექტის იდეა თუ გაგრძელდება, უფრო მეტი უცხოელი არტისტი "დაჩექინდება" და მსოფლიო გაიგებს, სად მღერიან ისინი.

ბასა ფოცხიშვილი, რეჟისორი:

"ბედნიერი ვარ, რომ საშუალება მეძლევა, ისევ "ბლექ სი არენაზე" ვიმუშავო. მართლა საერთაშორისო კლასის დარბაზია თავის შემოქმედებითი ჯგუფით. მაღალი კლასის პროფესიონალები მუშაობენ, რომლებთანაც მიწევს თანამშრომლობა. ამ ყველაფრით კი სასიამოვნოა, რომ ქართული მუსიკის პოპულარიზაცია ხდება. საოცარ მუსიკოსებს საშუალება ეძლევათ, მსოფლიო დონის მუსიკოსებთან ერთად სცენაზე გამოვიდნენ. ბედნიერი ვარ იმითაც, რომ ნიკა რაჭველთან მიწევს მუშაობა, რომელიც დახვეწილი, რაფინირებული, მაღალი კლასის მუსიკოსია. ეს ყველაფერი კი იმაზე მეტყველებს, რომ პროექტი საუკეთესო გამოვა.

ამიტომ, მაყურებელი მართლა საინტერესო ახლებურ კონცერტს იხილავს, რაც მთავარია, შედგება ამერიკული და ქართული მუსიკის კოლაბორაცია. ბედნიერებაა, რომ კაცობრიობის მონაპოვარს - ქართულ მრავალხმიან სიმღერას "შვიდკაცა" ასე მაღალ დონეზე ასრულებს".

"შვიდკაცასა" და "Take 6"-ის ერთობლივი კონცერტი მსმენელს 11 აგვისტოს "ბლექ სი არენაზე" ელის.