მნიშვნელოვანი ინფორმაცია
9
ივნისიდღის ზოგადი ასტროლოგიური პროგნოზი
ორშაბათი, მთვარის მეთოთხმეტე დღე დაიწყება 21:02-ზე, მთვარე მშვილდოსანში იქნება 18:53-დან, უკურსო მთვარის პერიოდი იქნება 16:06-დან 18:55-მდე – მიიღეთ აქტიური და გადამწყვეტი მოქმედება. დაიწყე მნიშვნელოვანი და სერიოზული საქმეები. მომავალ წარმატებაში ეჭვი არ შეგეპაროთ. ფრთხილად და კარგად დაფიქრდი თქვენს ნაბიჯებზე. კომუნიკაცია სხვადასხვა ადამიანებთან. გააძლიერეთ ოჯახური კავშირები და დაამყარეთ ურთიერთობა საყვარელ ადამიანებთან, განსაკუთრებით უფროს თაობასთან. თუ შესაძლებელია, გადადეთ ყველაფერი, დაისვენეთ და ისიამოვნეთ ცხოვრებით. ფიზიკური აქტივობა სასარგებლოა. გაუფრთხილდით მხედველობას.
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
მიზეზები, რის გამოც საქართველოში ოჯახები ინგრევა - "როცა წყვილს ერთმანეთის მიმართ ინტერესი აქვს, ღალატიც გადაულახავთ"
17:35 / 26-07-2018
განქორწინებების რიცხვმა საგანგაშო ნიშნულს მიაღწია - ბოლო 5 წელიწადში, საქართველოში განქორწინების 46 031 შემთხვევა დაფიქსირდა. თუმცა, ეს მხოლოდ ოფიციალური მონაცემებია და რეალურად მის უკან, შესაძლოა, ათასობით დანგრეული ოჯახი იყოს, რომლის აღრიცხვაც ოფიციალურ ქორწინებაში არყოფნის გამო არ ხდება.
ოფიციალური სტატისტიკით, 2017 წელს განქორწინების 10 222 შემთხვევა დაფიქსირდა, მაშინ როცა 2013 წელს ეს რიცხვი 8 039 იყო. რაც შეეხება ქორწინებას, ბოლო 5 წლის მონაცემებით, ყველაზე ცოტა წყვილი 2017 წელს დაქორწინდა - 23 684. აღნიშნული მაჩვენებელი 2013 წელს ყველაზე მაღალი იყო - მაშინ 34 693 წყვილმა დაარეგისტრირა ქორწინება.
აღსანიშნავია, რომ განქორწინების ყველაზე მაღალი მაჩვენებელი თბილისში ფიქსირდება, შემდეგ კი იმერეთის რეგიონი მოდის.
ჩვენ დავინტერესდით, რა შეიძლება იყოს გახშირებული განქორწინებების მიზეზი და კითხვებით დემოგრაფსა და ფსიქოლოგებს მივმართეთ.
"განქორწინების სტატისტიკა ნამდვილად მზარდია. თუ ადრე ყოველ 49 ქორწინებაზე 1 განქორწინება მოდიოდა, ახლა უკვე 2 ქორწინებაზე ერთი განქორწინება მოდის. მაგალითად, თბილისში ყოველი მეორე ქორწინება განქორწინებით მთავრდება. ეს არის ძალიან ცუდი, ეს მოქმედებს ადამიანებზე და პლიუს დემოგრაფიაზე. ამის მიზეზი კი ძალიან ბევრია - ადამიანებს ერთმანეთის არ ესმით" - უთხრა AMBEBI.GE-ს დემოგრაფმა ანზორ თოთაძემ.
ოჯახის დანგრევის მთავარ მიზეზად ფსიქოლოგები ადამიანური ურთიერთობების გაუფასურებას და წინა პლანზე მატერიალური საკითხების წამოწევას ასახელებენ. ფსიქოლოგი ნანა ჩაჩუა ამასთან დაკავშირებით, კონკრეტულ შემთხვევებსაც იხსენებს, რომელიც მის პრაქტიკაში მრავლად არის.
„ოჯახში პირველ რიგში არის ურთიერთობის პრობლემა და ასეთი ძალიან ბევრი შემთხვევაა. მაგალითად, გოგო და ბიჭი ერთ სკოლაში სწავლობდნენ, კარგი მეგობრები იყვნენ, შემდეგ ჩააბარეს უნივერსიტეტში და ერთ ჯგუფში აღმოჩნდნენ, უნივერსიტეტის დასრულებამდე იყვნენ მეგობრები. შემდეგ მოუწიათ სხვადასხვა სამსახურში მუშაობა. ეს ურთიერთობა სივრცის თვალსაზრისით განცალკევდა. იგრძნეს გარკვეული მონატრება, სიახლოვის მეტი სურვილი ჰქონდათ და ამიტომ ურთიერთობა ქორწინებით დააგვირგვინეს. ოჯახური ურთიერთობები სულ სხვა ტიპის ურთიერთობებია, რასაც ხშირად ვერ აცნობიერებენ. შემდეგ ჩნდება კონფლიქტებიც...
მოვიდნენ ჩემთან და აღმოჩნდა, რომ მათ საკომუნიკაციო ენა არ ჰქონდათ. არ იცოდნენ დალაპარაკება - როგორ გამოეხატათ თავიანთი განცდა. მაგალითად, სისტემატიურად ეუბნებოდა ცოლი, რატომ აგვიანებს და სად არის?! კაცი კი ისეთ სამსახურში იყო, რომ მოითხოვდა დამატებით ყოფნას, როცა ცოლი ურეკავდა, ქმარი ბრაზდებოდა. როდესაც საქმეში ჩართული ხარ და სისტემატიურად გირეკავს ტელეფონი, თავისთავად ცხადია, ეს დისკომფორტს გიქმნის. ამიტომ კაცი საყვედურობდა, ხშირ-ხშირად მირეკავო. რატომ დაგაგვიანდა, დღესაც დაგაგვიანდება? არ აპირებ სახლში მოსვლას? აი როგორი საუბრები მიმდინარეობს წყვილს შორის, არადა ამ დროს სრულიად საკმარისია ქმარმა წყნარად უთხრას.
კიდევ ერთი მაგალითი - ცოლ-ქმარს შორის მოხდა უთანხმოება. ქმარმა ცოლს მიუტანა ფილმის ბილეთები და უთხრა, დღეს კინოში წავიდეთო, ცოლი კი ეუბნება, კი მაგრამ ეს სახლი ურემონტოდ როდემდე უნდა იყოს?! ამ დროს ურთიერთობა შედის ჩიხში. ქმარს შეუძლია ჩიხი გააღრმავოს ან პირიქით. თუ ქმარი ეტყვის, რომ - აი, რა უმადური ხარ, ეს გავაკეთე და შენ რეებს მელაპარაკები - ურთიერთობა ჩიხში შევა, ხოლო თუ ქმარი ეტყვის, რომ შენ როგორი ყურადღებიანი ხარ და როგორი ოჯახის ქალი ხარ, სულ რომ გახსოვს ეს სახლი სარემონტოა, ამით დამთავრდება ყველაფერი.
ამ ყველაფრის მაგალითზე გეუბნებით, რომ ჩვენ პირველ რიგში უნდა ვისწავლოთ ლაპარაკი. იმ სიტყვებში, რომელსაც ჩვენ წარმოვთქვამთ, აზროვნების მიერ ფორმულირებული აზრი დევს, მაგრამ ქვეტექსტი ინტონაციაში, წინადადების წყობაში დევს. ჩვენ არ ვიცით ლაპარაკი, შინაგანი განწყობილებით ვესაუბრებით და ვერ ხვდებიან ადამიანები, თავიანთი ჩვეულებრივი ლაპარაკით რას გადმოგცემენ“, - გვითხრა ფსიქოლოგმა ნანა ჩაჩუამ.
ფსიქოლოგ ლელა გაფრინდაშვილის თქმით კი, ოჯახის დანგრევის ძირითადი საფუძველი ადრეული ქორწინებაა. მისი თქმით, წლების შემდეგ წყვილი ერთმანეთის მიმართ ინტერესს კარგავს, შემდეგ კი იკარგება ერთმანეთის პატივისცემაც.
"ოჯახის დანგრევის ძირითადი მიზეზი არის ის, რომ წყვილი არ არის მზად თანაცხოვრებისთვის და ფსიქოლოგიურად არ არიან მზად ოჯახის პასუხისმგებლობის ასაღებად. უჭირთ ერთმანეთისთვის ანგარიშის გაწევა და ერთმანეთის პატივისცემა. გარდა ამისა, ასევე მნიშვნელოვანია, რომ არ აქვთ გააზრებული შვილის აღზრდის პასუხისმგებლობა. ყველაფერი კი, რაც შემდეგ ერთვება - მატერიალური თუ არამატერიული პრობლემები, არის ამის თანმხლები.
ერთი წყვილი მოვიდა ჩემთან, ძალიან ადრე შექმნილი ოჯახი. რამდენიმე წლის შემდეგ, ერთმანეთის მიმართ ინტერესი დაკარგეს. მართალია განვითარდნენ, თუმცა საერთო ინტერესი უკვე დაკარგული ჰქონდათ. როდესაც ერთმანეთის მიმართ ინტერესი იკარგება, ეს ყველაფერი აისახება ურთიერთობაზე და ნებისმიერი საბაბი, თუნდაც სახლში პროდუქტების არმიტანა ან არდალაგება, ხდება ოჯახის დანგრევის მიზეზი. როდესაც წყვილს აქვს ერთმანეთის მიმართ ინტერესი და აქვთ ოჯახის გადარჩენის სურვილი, ყველანაირი პრობლემა გადაულახავთ მათ შორის, ღალატიც კი. ამ შემთხვევაში არ არსებობს პრობლემა, რომელიც წყვილმა ვერ გადალახა. ამიტომ პირველ რიგში მნიშვნელოვანია, რომ წყვილმა ერთმანეთის მიმართ ინტერესი არ დაკარგოს" - განაცხადა გაფრინდაშვილმა.
საქართველოში ოჯახის დანგრევის ერთ-ერთ ფაქტორად ფსიქოლოგი ლიკა თუშიშვილი არასწორ არჩევანს ასახელებს.
"განქორწინებები ბევრი ფაქტორით არის განპირობებული, პირველ რიგში - ეს არის ის, რომ მეუღლეებს ერთმანეთის არ ესმით, ვერ უგებენ და არც ცდილობენ რომ გაუგონ და რომელიმე მხარე დათმობაზე წავიდეს. პიროვნულადაც არ იცნობენ ისე, როგორც საჭიროა, არ აქვთ ამის დრო, ყველა თავისი რუტინული ცხოვრებით არის დაკავებული. საქმეებზე არიან გადართულები და ურთიერთობისთვის, სიღრმისეული, ჭეშმარიტი კონტაქტისთვის დრო არ რჩებათ.
ასევე ყველაზე ხშირია არასწორი არჩევანი. ოჯახის შექმნის შემდეგ აღმოაჩენენ, რომ არასწორი არჩევანი გააკეთეს. მეუღლეებს შორის შეუსაბამობა არის განქორწინების ხშირი ფაქტორი. ბავშვებს სჭირდებათ ჯანსაღი ველი და სიტუაცია. კონფლიქტები ძალიან ცუდ ფსიქოლოგიურ გავლენას ახდენს ბავშვებზე. ყველაზე კარგია, რომ მანამდე გაიცნონ ერთმანეთი და რაც შეიძლება მეტი კონტაქტი დაამყარონ ერთმანეთთან", - უთხრა AMBEBI.GE-ს თუშიშვილმა.
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კადრები კიევიდან - რუსებმა ქალაქს დრონებით და რაკეტებით დაარტყეს
კვირის კითხვადი სტატიები
მნიშვნელოვანი ინფორმაცია
მკითხველის რჩევით
