მეშახტე, რომელიც დღეს დაიღუპა, მინდელის შახტაში აპრილში გარდაცვლილის ბიძა იყო

დღეს გამთენიისას, ქალაქ ტყიბულში, მინდელის სახელობის შახტში მომხდარ შემთხვევას 4 მუშის სიცოცხლე ემსხვერპლა.

გამოძიების პირველადი ინფორმაციით, შახტის ერთ-ერთ გვირაბში, სავარაუდოდ, მეთანის აფეთქების შედეგად, კედლების დეფორმაციას ჭერის ჩამოშლა მოჰყვა. ადგილზე გარდაიცვალნენ შახტის მიწისქვეშა სამთო ოსტატები - 30 წლის ლაშა ფორჩხიძე, 55 წლის მიხეილ გამეზარდაშვილი, 57 წლის იოსებ ქარქაშაძე და 57 წლის მურმან ლილუაშვილი.

სხეულის სხვადასხვა სახის დაზიანებებით საავადმყოფოში 6 პირი გადაიყვანეს.

გარდაცვლილებს შორის ყველაზე ახალგაზრდა 30 წლის ლაშა ფორჩხიძეა. როგორც AMBEBI.GE-ს ლაშა ფორჩხიძის მეზობელმა ავთო რიჟამაძემ განუცხადა, ფორჩხიძე ობლობაში გაიზარდა.

- არაჩვეულებრივი ბიჭი იყო ლაშა, ფაქტიურად ბავშვობიდან შახტაში მუშაობს. პატარა იყო, როცა დედა დაეღუპა, ბლის ხიდან გადმოვარდა საწყალი ქალი და ობლობაში გაიზარდა ეს ბიჭი. ტყიბულის ტექნიკუმი დაამთავრა, მამამისი აქ მუშაობდა სადგურის სასადილოში. ორი წლის წინ მოუკვდა მამა ბიჭს. ოჯახს ძირითადად ლაშა არჩენდა, ბაბუამისიც წვალობდა, ყველს აბარებს მაღაზიაში.

- ოჯახი ჰყავდა?

- ცოლ-შვილი არ დარჩენია. მშრომელი ბიჭი იყო და სულ შრომობდა საცოდავი. თავის თავსაც არჩენდა და მოხუც ბებია-ბაბუასაც სამაგალითოდ უვლიდა.

55 წლის მიხეილ გამეზარდაშვილს, რომელიც დღეს სავარაუდოდ მეთანის აფეთქებას ემსხვერპლა, სამი თვის წინ, მინდელის შახტაში ძმისშვილი დაეღუპა. 26 წლის პავლე გამეზარდაშვილი და მისი 5 კოლეგა აპრილის თვეში შახტის ერთ-ერთ გვირაბში ჭერის ჩამოშლას ემსხვერპლნენ.

"მერამდენე ტრაგედიაა უკვე ვეღარ ვითვლით. უბედურება უბედურებაზე ხდება, ვაჟკაცებს ვაბარებთ მიწას. ოჯახები ეწირება უკვე. წინა აფეთქების დროს პავლე გამეზარდაშვილი დაიღუპა, ახლა კი ბიძამისი მოკვდა მიშა. ოჯახის ბურჯი კაცი იყო, ცოლი, შვილი, შვილიშვილები ჰყავდა. ტყიბულში ყველა კაცი შახტაშია ჩასული, ვალები აქვს ხალხს, ოჯახები ყავთ, სხვა სამუშაო კი აქ არ არის" - ამბობს ტყიბულის მკვიდრი ოთარ ჭელიშვილი.

მინდელის შახტაში დღეს მომხდარ შემთხვევაზე გამოძიება საქართველოს სსკ-ს 240-ე მუხლის მეორე ნაწილით დაიწყო, რაც სამთო, სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს.

პრემიერ მამუკა ბახტაძის განცხადებით, მინდელის შახტი დაიხურება და არ განაახლებს მუშაობას იქამდე, ვიდრე არ დასრულდება როგორც სისხლის სამართლებრივი გამოძიება, ისე მაღალკვალიფიციური საერთაშორისო საინჟინრო-ტექნიკური ექსპერტიზა.