"პროკურატურაში ახალი ეტაპი უნდა დაიწყოს" - როგორ ხედავს ინსტიტუტის განვითარებას შალვა თადუმაძე

ამ ინსტიტუტს ძალიან დაბალი ნდობის ხარისხი აქვს და სამართლიანობის აღდგენის მოლოდინი არის იმაზე მაღალი, ვიდრე ზოგადად, ამ ინსტიტუტს ამ რესურსებით და ამ შესაძლებლობებით შეუძლია, - ამის შესახებ მთავარი პროკურორობის კანდიდატმა, შალვა თადუმაძემ პარლამენტში, იურიდიულ საკითხთა კომიტეტის სხდომაზე სიტყვით გამოსვლისას განაცხადა.

“ძირითადი მიმართულება ის არის, რომ დავადგინოთ რა არის ძირითადი პრობლემა სისტემაში. დღეს ამ პრობლემის სახით აშკარაა, რომ ამ ინსტიტუტს ძალიან დაბალი ნდობის ხარისხი აქვს და სამართლიანობის აღდგენის მოლოდინი არის იმაზე მაღალი, ვიდრე ზოგადად, ამ ინსტიტუტს ამ რესურსებით და ამ შესაძლებლობებით შეუძლია. საზოგადოების დაბალი ნდობის ხარისხი არ არის წინა კვირას წარმოქმნილი პრობლემა, ეს პრობლემა ინსტიტუტს აქვს უკვე წლებია, გამომდინარე იქიდან, რომ ჩვენ ის თაობა ვართ, ვინც ამ სიტუაციას მოვესწარით - ეს იყო პროკურატურა საბჭოთა საქართველოსი, ეს იყო რეჟიმის პროკურატურა, რომლის მიმართაც განწყობა არ იყო დადებითი. ამის შემდეგ ჩვენ მივიღეთ დამოუკიდებელი საქართველოს პროკურატურა და მივიღეთ განუკითხაობის რეჟიმი, რის შემდეგაც ამ პროკურატურას დაერქვა კორუმპირებული პროკურატურა. იქ მუშაობდნენ ადამიანები, რომლებიც პირნათლად ასრულებდნენ თავიანთ მოვალეობას, მაგრამ სტერეოტიპი, რომ პროკურატურა არის კორუმპირებული, ჩამოყალიბდა მაშინ“, - განაცხადა შალვა თადუმაძემ.

მისივე თქმით, მაშინ ის საადვოკატო საქმიანობიოთ იყო დაკავებული და კარგად ახსოვს განცდა, თუ როგორ ამრუდებდა სამართალს კორუფცია, რაც პროკურატურის ინსტიტუტზე ისახებოდა.

თადუმაძის თქმით, იყო რეფორმები, გარემონტდა შენობები, აიყვანეს ახალი თანამშრომლები, უარი ითქვა კორუფციაზე, თუმცა ჩამოყალიბდა მოძალადე პროკურატურა.

“ჩვენ ამას ვუყურებდით 9 წელი. მე მახსოვს შიშის განცდა, როცა ჩემი დაცვის ქვეშ მყოფს მივყვებოდი პროკურატურაში. ხოლო 2012 წლის შემდეგ ჩვენ მივიღეთ პროკურატურა, აბსოლუტურად გათავისუფლებული ძალადობისგან, მაგრამ ეს იყო ინსტიტუტი, რომელიც მუდმივად პოლიტიკური თავდასხმების ობიექტი იყო. გატარდა რეფორმები, თავადაც ვიყავი ამაში ჩართული, მაგრამ სამწუხაროდ, ნებისმიერი წარუმატებლობა ბრალდებოდა პროკურატურას. თუკი ვინმეს დაიჭერენ, პროკურატურამ დაიჭირა პოლიტიკურად და თუ ვინმეს არ დაჭერდნენ, ესეც პროკურატურას ბრალდებოდა. დღეს გვაქვს პროკურატურა, რომელიც ამ 27 წლიან პერიოდში არასოდეს არ ყოფილა მაღალი ნდობის ხარისხით და ამ პოლიტიკური თავდახმების გამო ნდობის ხარისხი ვერ მოიპოვა. ჩემი აზრით, გარკვეული ახალი ეტაპი უნდა დაიწყოს პროკურატურაში და ეს უნდა იყოს სამართლიანი პროკურატურის ჩამოყალიბება. ამაში კი ვგულისხმობ პროკურატურის მხრიდან გადაწყვეტილებების მიღებისას კანონის უზენაესობის დაცვას, შიდა ურთიერთობების სამართლიან დამოკიდებულებას და მოლოდინს, რომელიც საზოგადადოებას გააჩნია, ეს არის სამართლიანობის აღდგენა, სამართლიანობის აღდგენის ნაწილში გამოწვევა დიდია, მოლოდინიც დიდია და მემკვიდრეობა არის საკმაოდ მძიმე“, - განაცხადა შალვა თადუმაძემ.

შალვა თადუმაძე მიიჩნევს, რომ პროკურატურის საქმიანობა სერიოზულ რეფორმირებას საჭიროებს. მისი თქმით, ნორმატიული აქტები, რომლებიც არეგულირებენ საპროკურორო საქმიანობას, არის მოძველებული.

„პროკურატურის საქმიანობა საჭიროებს საკმაოდ სერიოზულ რეფორმირებას. ერთი მხრივ ამას კონსტიტუციური ცვლილება უზრუნველყოფს, მეორე მხრივ კი ნორმატიული აქტები, რომლებიც არეგულირებენ საპროკურორო საქმიანობას. მიმაჩნია, რომ არის მოძველებული და თანამედროვე მოთხოვნებთან არის შესაბამისობაში მოსაყვანი.

მინდა ვისაუბრო იმ პრობლემებზე, რომლებიც სისხლის სამართლის პოლიტიკის კუთხით არსებობს. საკმაოდ მაღალი მაჩვენებელია ოჯახში ძალადობის კუთხით. თუ კანონმდებლობაში განვახორციელებთ შესაბამის ცვლილებებს, დამცავი ორდერის აღსრულების თანამედროვე მექანიზმები არსებობს ელექტრონული მონიტორინგის კუთხით. ამ კუთხით კანონმდებლობის შეცვლა უფრო ეფექტურს გახდის ოჯახში ძალადობის წინააღმდეგ ბრძოლას.

ძალიან მნიშვნელოვანია აღკვეთის ღონისძიების რეფორმა, გამომდინარე იქედან, რომ არსებული აღკვეთის ღონისძიებების ჩამონათვალი ზუსტად იგივეა, რაც იყო საბჭოთა კავშირის დროს და ის არ არის ეფექტური“, - განაცხადა თადუმაძემ.

იურიდიულ საკითხა კომიტეტის სხდომას საპარლამენტო ოპოზიცია არ ესწრება.