არასრულწლოვანთა ქურდობის საგანგაშო სტატისტიკა - დგას თუ არა ვინმე ამ ჯგუფის უკან?
ბოლო თვეების განმავლობაში, არასრულწლოვნების მიერ ჩადენილი დანაშაულის 50-ზე მეტი შემთხვევა დაფიქსირდა. ძარცვის ძირითადი ობიექტებია მაღაზიები, აფთიაქები, ოფისები და ავტომობილები და ამას სათვალთვალო კამერებიც აფიქსირებს. ძარცვის სქემა კი ყველგან ერთნაირია - "პატარა მძარცველები“ დაკეტილ მაღაზიაში შედიან, სალაროებს აცარიელებენ და ხელს მცირე ზომის ნივთებსაც აყოლებენ.
12-14 წლის ასაკის ბავშვები საკმაოდ „პროფესიონალურად“ მოქმედებენ. დაახლოებით 1-4 წუთში დაცვის მოსვლამდე მაღაზიას "ასუფთავებენ”. დაზარალებულები ეჭვობენ, რომ ამ ადამიანების უკან სპეციალური ჯგუფი დგას, წინააღმდეგ შემთხვევაში პოლიციას ნაქურდალი ნივთების დაბრუნება არ გაუჭირდებოდა.
ბოლო ერთ თვეში ტექნიკის 10-მდე მაღაზიაა გაქურდული და ასეულობით ციფრული ტექნიკაა წაღებული, რომ არაფერი ვთქვათ ფულად თანხაზე. „მეგატექნიკისა“ და „ბეკოს“ წარმომადგენლები აცხადებენ, რომ გამოძიება ერთ ადგილზეა გაყინული და მათ ამ ხნის განმავლობაში არცერთი მოპარული ნივთი არ დაბრუნებიათ. სწორედ ამიტომ, ამასთან დაკავშირებით უახლოეს დღებში სპეციალური განცხადების გავრცელებასაც აპირებენ.
"მეგატექნიკაში" განგვიმარტეს, რომ მათი მაღაზიის გაქურდვის ტენდეცია თებერვალში დაიწყო.
"საბურთალოს ფილიალი, რომელიც ვაჟა-ფშაველაზე მდებარეობს ერთი თვის მანძილზე ორჯერ გაქურდეს. მძარცველები არასრულწლოვნები იყვნენ, ყოველ შემთხვევაში სათვალთვალო კამერაში ასე ჩანან. ამ ხნის მანძილზე საქმე გამოუძიებელია, ნივთებიც არ დაუბრუნებიათ. შემდეგ, მარტში რუსთავის ფილიალი გაძარცვეს, ივნისში კი წერეთლის ფილიალი და არც ამ კონკრეტულ შემთხვევაში წაწეულა გამოძიება წინ.
შთაბეჭდილება გვრჩება, რომ ესენი საკმაოდ მომზადებულები არიან და მარტო არ მოქმედებენ, თან ტექნიკა გაიტაცეს და ლომბარდში ჩაბარება მარტოს გაუჭირდებოდათ. ამიტომ, ალბათ არიან ადამიანები, ვინც ამ ბავშვებს ზურგს უმაგრებს. ფაქტია, რომ ასეთი შემთხვევები საეჭვოდ გახშირდა. რამდენიმე დღის წინ გლდანში ტექნიკის ოთხი მაღაზია გაქურდეს და ამაზეც არ ყოფილა რეაგირება.
ამიტომ პარტნიორ მაღაზიებთან ერთად, ერთობლივ განცხადებას გავავრცელებთ, თორემ უკვე საგანგაშო ვითარება იქმნება“ - უთხრა AMBEBI.GE-ს „მეგატექნიკის“ მარკეტინგის მენეჯერმა თამარ ჩიტაიშვილმა.
ანალოგიურად ფიქრობენ „ბეკოშიც“, სადაც არასრულწლოვანი მძარცველები ბოლო 6 თვეში ხუთჯერ შეიჭრნენ.
"არასწლოვანების მიერ მაღაზიების ძარცვის ფაქტი აშკარად გახშირდა. ბოლო დროს ხუთი მაღაზიაა გაძარცვული, თან ვინც ეს გააკეთა აშკარად პროფესიონალი და გამოცდილი იყო, რაც სათვალთვალო კამერის კადრებშიც ჩანს. დგას თუ არა ვიღაც ამ ადამიანების უკან, მე ვერ გეტყვით.
ტექნიკის მაღაზიების წარმომადგენლები შეწუხებულები ვართ და ვაპირებთ ამასთან დაკავშირებით ერთობლივი საგანგებო ტექსტი მოვამზადოთ. როგორც ვხედავთ, არიან არასრულწლოვნები და ამიტომ ვერ იჭერენ, არანაირი რეაგირება არ ხდება“, - განგვიმარტეს "ბეკოში".
ტექნიკის მაღაზიების მსგავსად არასრულწლოვანი მძარცველების მსხვერპლი საფთიაქო ქსელებიც გახდა. "ბიომედ ფარმას" წარმომადგენელი გიორგი ობგაიძე ამბობს, რომ ბოლო ოთხი დღის განმავლობაში, მათი აფთიაქები ორჯერ გაქურდეს.
"ბოლო 4 დღის განმავლობაში პირადად ჩემი ორი აფთიაქი გაქურდეს. წაღებულია ფულადი თანხა. გვაქვს ვიდეოჩანაწერი, სადაც ჩანს, რომ ორივე შემთხვევაში დანაშაული ჩაიდინა არასრულწლოვანმა. ერთი ადამიანი დაკავებული იყო, თუმცა რადგან ასაკით პატარა აღმოჩნდა, გამოუშვეს. ერთზე კი შესაძლოა სისხლის სამართლის დევნა დაიწყოს, რადგან სრულწლოვანია. ქურდობის მეორე შემთხვევაში არასრულწლოვნები იყვნენ, სახეზე ნიღბები და ხელზე ხელთათმანები ეკეთათ.
ლოგიკურია, რომ ამ ადამიანების უკან დგას რაღაც ჯგუფი, თორემ შეუძლებელია 12 წლის ბავშვმა იცოდეს, რომ არსებობს კანონი, სადაც წერია - ამ დანაშაულის ჩადენის შემთხვევაში მას არ დაიჭერენ. პოლიცია სავარაუდოდ ვერ გადის ამ დაჯგუფების კვალზე, თორემ ისინიც შეწუხებულები არიან“, - უთხრა AMBEBI.GE-ს ობგაიძემ.
აღსანიშნავია, რომ „არასრულწლოვანთა მართლმსაჯულების კოდექსი“ 2016 წლის პირველი იანვრიდან ამოქმედდა და ის არასრულწლოვნის ადმინისტრაციული და სისხლისსამართლებრივი პასუხისმგებლობის საკითხს ადგენს.
სისხლის სამართლებრივი პასუხისმგებლობისათვის მინიმალური ასაკი 14 წელია, ხოლო ადმინისტრაციული პასუხისმგებლობისათვის – 16 წელი. კოდექსის მიხედვით, არასრულწლოვნის დაკავება, დაპატიმრება და მისთვის თავისუფლების აღკვეთა დასაშვებია მხოლოდ, როგორც უკიდურესი ღონისძიება, რომელიც შეძლებისდაგვარად მოკლე ვადით და რეგულარული გადასინჯვის პირობით უნდა იქნეს გამოყენებული.
არასწლოვანების კოდექსი ერთ-ერთია, რითაც იუსტიციის მინისტრი თეა წულუკიანი ამაყობს, ამიტომ დიდი ალბათობით ეს კოდექსი არ გადაიხედება. ის, რომ არასწლოვანებთან დაკავშირებით, სახელმწიფოს ლიბერალური მიდგომა უნდა ჰქონდეს, ამაზე იურისტებიც თანხმდებიან.
იურისტ მირიან ნიკოლაძის თქმით, კოდექსი შესაცველი არ არის, სახელმწიფოს მხრიდან უნდა მოხდეს პრევენცია, რომ ბავშვებმა დანაშაული არ ჩაიდინონ.
"არასწლოვანების მიერ ჩადენილი დანაშაულის სტასტიკა რა თქმა უნდა საგანგაშოა, თან მზარდია და ამის შესუსტების არანაირი წინაპირობა არ არსებობს. კანონი არის იმდენად ლიბერალური, რომ არასრულწლოვანი დამნაშავე დღეს პრაქტიკულად დაუსჯელი რჩება. მათ მიერ დანაშაულის ჩადენის აღმოფხვრის სქემამ გადაინაცვლა პრევენციის ასპექტში, რაც სწორია. სახელმწიფოს ევალება, რომ არასწლოვანს მიეცეს სწორი განვითარების პირობები და გამოსწორების ყველანაირი შანსი.
მზარდი სტატისტიკა კი საზოგადოებამ თავის თავს უნდა დააბრალოს და არა არასრულწლოვანს, რომელიც რეალურად ჩამოუყალიბებელია და ვერ აცნობიერებს განხორციელებულ ქმედებას. ანუ ერთის მხრივ გვაქვს კოდექსი, მაგრამ არ გვაქვს მთავარი სოციალური ფონი. ბავშვს ყურადღება არ ექცევა არც სკოლაში, სწავლის ხარისხია ნული და არც ოჯახში.
ძალიან რთულია იმის თქმა, ამას ორგნიზებს უკეთებს თუ არა რომელიღაც ჯგუფი. ვფიქრობ, ამის გამოძება რთული არ უნდა იყოს. გასაგებია რომ არასრულწლოვანს ვერ აკავებენ, მაგრამ პოლიციამ უნდა დაიწყოს ოპერატიული მოქმედებები და დაიჭირონ დამკვეთები, თუ ისინი არსებობენ. ბოლო-ბოლო ნაძარცვი საქონელი სადმე ხომ მიაქვთ და მოძებნონ. სად მიდის ეს ნაძარცვი საქონელი ეს არის მთავარი და არა ის, უნდა შეიცვალოს თუ არა კოდექსი“, - გვითხრა იურისტმა.
ქორწინების მიზნით, 19 წლის გოგოსთვის თავისუფლების უკანონო აღკვეთის ბრალდებით 3 პირი დააკავეს
თბილისში, პაბლო პიკასოს ქუჩაზე ცეცხლსასროლი იარაღით მამაკაცი მოკლეს
