მასობრივი მიგრაცია ევროკავშირის ერთიანობას საფრთხეს უქმნის? - ბრიუსელში საგანგებო შეკრებისთვის ემზადებიან

ბოლო რამდენიმე წელია მასობრივი მიგრაცია ევროკავშირის ერთიანობას საფრთხეს უქმნის – 28 ივნისს, ევროპული ბლოკი საემიგრაციო კრიზისის ფონზე, საგანგებო შეკრებისთვის ემზადება. ბრიუსელში დაგეგმილ ორდღიან სამიტზე, ბოლო თვეების განმავლობაში სხვადასხვა ქვეყანაში მოზღვავებული ემიგრანტების გადანაწილების შესახებ იმსჯელებენ.

ევროპის ქვეყნები ერთმანეთის მიყოლებით აცხადებენ უარს ასობით მიგრანტის მიღებაზე და თითს ერთმანეთისკენ იშვერენ; იტალიის ხელმძღვანელობის თქმით, იტალია უმძიმეს მდგომარეობაშია და სასწრაფოდ ელოდება ევროკავშირისგან შველას.

რამდენიმე დღის წინ იტალიამ ლიბიელი მიგრანტებით დატვირთული გემის მიღებაზე უარი განაცხადა და სატვირთო გემი სიცილიის პორტში შესვლის ნებართვას, საბოლოო გადაწყვეტილებამდე თითქმის ერთი კვირა ელოდა...

ასევე, ჩრდილოეთ აფრიკიდან მომავალი, 600-მდე ადამიანით დატვირთული გემი Aquarius-ი, რომელიც ესპანეთის მიმართულებით მიცურავდა, არ მიიღო მადრიდმა, ასევე - რომმა. გემი ბოლოს მალტაში შევიდა...

ჯერჯერობით ევროპის კავშირის ერთიანობის გარანტი საფრანგეთისა და გერმანიის მტკიცე საიმიგრაციო პოლიტიკაა, თუმცა დასავლური მედიის ცნობით, ვითარება იმდენად დაძაბულია, რომ მიგრაციასთან დაკავშირებით გარკვეულ საკითხებზე კონსენსუსის მიღწევა ვერ ხერხდება...

ერთი სიტყვით, გასულ კვირას ავსტრიის, ბულგარეთის, იტალიის, საფრანგეთის, გერმანიის, საბერძნეთის, მალტის და ესპანეთის ლიდერები ბრიუსელში არაფორმალური სამიტის ფარგლებში შეიკრიბნენ, რათა საიმიგრაციო კრიზისის გზები ეპოვათ. თუმცა, რაიმე კონკრეტულ შედეგამდე ვერ მივიდნენ. დასავლური მედია წერს, რომ მსგავსი კრიზისი ევროპაში მეორე მსოფლიო ომის შემდეგ არ ყოფილა...

რაც შეეხება ხვალ დაგეგმილ შეხვედრას, შეხვედრის ინიციატორი გერმანიაა. დასავლური მედიის თქმით, ლტოლვილების სამართლიანი განაწილება, გერმანიის ლიდერის ანგელა მერკელისთვის ძალზედ მნიშვნელოვანია და ის დანარჩენ ევროპას აფრთხილებს, რომ ქმედითი გადაწყვეტილება დროულად მიიღონ.

მერკელის თქმით, ლტოლვილთა ნაკადის მიღება, უმეტეს შემთხვევაში ავსტრიასთან ერთად, სწორედ გერმანიას უწევს და ლტოლვილების სამართლიან განაწილებაზე მოლაპარაკება თუ ვერ მოხერხდება, ბევრისთვის შენგენის ზონის საკითხი დღის წესრიგში დადგება.

დასავლელი მიმომხილველებიც მიგრანტთა პრობლემას დასავლური ცივილიზაციის გამოწვევად და შენგენის ზონაში თავისუფალი მიმოსვლის შეჩერების საფრთხედ მიიჩნევენ, რასაც შესაძლოა, ევროკავშირში აზრთა სხვადასხვაობის გამწვავება და ბლოკში განხეთქილების გაზრდა მოჰყვეს.

რამდენიმე დღის წინ, ტრამპის მიერ მიღებული სკანდალური გადაწვეტილების შემდეგ, რაც მისი საემიგრაციო პოლიტიკის ფარგლებში ამერიკის საზღვარზე ბავშვების და მშობლების ერთმანეთისთვის დაშორებას გულისხმობდა და რის გამოც თავის მართლებაც მოუწია, ამერიკამ საკითხისადმი სხვანაირი მიდგომა დააფიქსირა. კონგრესის წარმომადგენელთა პალატა იმიგრაციაზე მსჯელობას იწყებს და ერთდროულად ორი საიმიგრაციო კანონის კენჭისყრისთვის ემზადება. ორივე კანონის ავტორები "რესპუბლიკელები" არიან...

გაეროს ლტოლვილთა უმაღლესი კომისრის ფილიპო გრანდის თქმით, ლტოლვილთა დაზუსტებული რაოდენობა, 2016 წლის მონაცემებზე თითქმის 3 მილიონით მეტია. იძულებით გადაადგილებულთა უმეტესობა, ორ მესამედზე მეტი, სულ რამდენიმე ღარიბი, ან საშუალო შემოსავლის მქონე ქვეყნიდანაა. ესენია: ავღანეთი, სირია, სამხრეთ სუდანი და კონგო...

დასავლურ მედიაში უკვე აქტიურად მსჯელობენ იმაზე, შეძლებს თუ არა ევროკავშირის ერთიანობა ლტოლვილთა ახალ-ახალ ნაკადს გაუძლოს.