"1 წელია, რაც ადგილობრივთა გარკვეული ჯგუფი, კონკურენციის გამო, რუს და უკრაინელ პარაპლანისტებს გუდაურის დატოვებას აიძულებს" - ფიოდორ ჩელიშევი

ადგილობრივებმა რადიკალური გადაწყვეტილება მიიღეს, რომ ნებისმიერი ხერხით, მათ შორის ძალადობითა და ტყუილებით მიაღწიონ მიზანს და ერთპიროვნულად დაიკავონ ყველა ტურისტული ნიშა ამ ტერიტორიაზე, - ამის შესახებ პარაპლანისტმა ფიოდორ ჩელიშევმა პრესკონფერენციაზე განაცხადა. მისი თქმით, დაახლოებით 1 წელია, რაც ადგილობრივთა გარკვეული ჯგუფი, კონკურენციის გამო, რუს და უკრაინელ პარაპლანისტებს გუდაურის დატოვებას აიძულებს და ამ პრობლემის გადასაჭრელად პოლიციას არანაირი ზომა არ მიუღია.

„საქართველოში ვიმყოფები 2.5 წელია და ჩემი საქმიანობა პარაპლანით ფრენაა. ახლახან განცხადება დავწერე იმისთვის, რომ საავადმყოფოდან ჩემს წამოსვლას საკუთარი პასუხისმგებლობის ქვეშ ვიღებ.

კონფლიქტის დაწყების მიზეზი საკმაოდ ღრმაა და დაახლოებით ერთი წლის წინ დაიწყო, როდესაც ადგილობრივ მცხოვრებთა ნაწილმა გადაწყვეტილება მიიღო, რომ ყველა ტურისტული მომსახურება (სფერო), მათ შორის პარაპლანით ფრენა, საკუთარ ხელში აიღოს. ისინი ტურისტებს სთავაზობენ კვადროციკლებთან, ცხენებთან, თხილამურებით ან სნოუბორდთან დაკავშირებულ სერვისებს. ორ წელზე ნაკლებია, რაც პარაპლანით ფრენებიც დაიწყეს. თავიდან შემოგვთავაზეს, რომ მათ დაქვემდებარებაში ვიმუშაოთ და ფული ვუხადოთ იმისთვის, რომ ამ ტერიტორიაზე დავფრინავთ. 1 წლის განმავლობაში კი მოთხოვნები შეიცვალა და იქამდე მივიდა, რომ საერთოდ უნდა დავტოვოთ ტერიტორია. ამის გამო კონფლიქტები დიდიხანია მიმდინარეობს,“ - განაცხადა ფიოდორ ჩელიშევმა.

როგორც მან აღნიშნა, გასულ წელს ამავე ჯგუფმა კახეთიდან გუდაურში ჩასული აზერბაიჯანელი არასრულწლოვანი ამავე მიზეზით სცემა. მისივე თქმით, აღნიშნული პირები არა მხოლოდ უცხოელებს, არამედ სხვა რეგიონიდან ჩასულ ქართველებსაც უსწორდებიან ფიზიკურად.

„პარაპლანებთან დაკავშირებითაც ერთი წლის განმავლობაში არაერთი კონფლიქტი მოხდა, რის შესახებაც ყველამ იცის. ახლა კი ამ ადამიანებმა რადიკალური გადაწყვეტილება მიიღეს, რომ ნებისმიერი ხერხით, მათ შორის ძალადობითა და ტყუილებით მიაღწიონ მიზანს და ერთპიროვნულად დაიკავონ ყველა ტურისტული ნიშა ამ ტერიტორიაზე.

ყველას უნდა ესმოდეს, რომ გუდაური საერთაშორისო კურორტია, სადაც უახლოეს მომავალში მსოფლიო ჩემპიონატი ჩატარდება. ეს ადგილი რუსეთიდან, ყაზახეთიდან და უკრაინიდან წამოსული ტურისტების საქართველოსთან დამაკავშირებელი არტერიაა. ფაქტობრივად, ეს ქვეყნის ჭიშკარია. თუკი ამ ტერიტორიაზე მსგავსი კონფლიქტები და კრიმინალური დაჯგუფებები იქნება, ტურისტული ბიზნესი მთელი საქართველოს მასშტაბით დაზარალდება,“ - განაცხადა ფიოდორ ჩელიშევმა.

მისივე თქმით, იმ ადგილობრივებს, რომლებიც ტურისტებს ემსახურებიან, სათანადო კვალიფიკაცია არ აქვთ, რამაც შეიძლება ფატალური შედეგები მოიტანოს.

„მე მესმის, რომ არსებობენ ისეთი ადამიანებიც, რომლებიც ფიქრობენ, რომ საქართველოში საკმარისი სპეციალისტები არიან საიმისოდ, რომ ყველა ტურისტული ნიშა დაიკავონ, თუმცა ფაქტობრივად არ არსებობს არანაირი სახელმწიფო კონტროლი და ტურისტებს მომსახურებას უწევენ ისეთი ადამიანები, რომლებიც ან კვალიფიკაციას ვერ აკმაყოფილებენ ან ენა არ იციან. არ მინდოდა ამ თემით სპეკულირება, თუმცა სანამ საავადმყოფოში ვიწექი, გავრცელდა ინფორმაცია, რომ ბათუმში ჩემი მეგობარი, ცნობილი ქირურგი ოჯახთან ერთად დაიღუპა. უბრალოდ მინდა, რომ სახელწმიფო დონეზე გატარდეს ყველა იმ ადამიანის კონტროლი, ვინც ტურისტებთან მუშაობს,“ - განაცხადა ფიოდორ ჩელიშევმა.

შეგახსენებთ, დაბა გუდაურში რუსეთის მოქალაქეების მიმართ ჯგუფურად ძალადობისა და სხვისი ნივთის დაზიანების ბრალდებით ოთხი ადგილობრივი დააკავეს.