რა ვიცით ცხინვალიდან თბილისში სამკურნალოდ ჩამოყვანილ პაციენტზე და რას ამბობენ ღუდუშაურის კლინიკაში

სამოქალაქო ანტისაოკუპაციო მოძრაობა "ძალა ერთობაშიას" ერთ-ერთი დამფუძნებელი დავით ქაცარავა "ფეისბუქზე" წერს, რომ თბილისში ღუდუშაურის სახელობის კლინიკაში "მკურნალობს არჩილ ტატუნაშვილის წამების ორგანიზატორის, ხაჩიროვის პირადი მცველი, ასლან ჯიოევი".

არსებული ინფორმაციით, ჯიოევი კლინიკაში 7 ივნისს ცხინვალიდან მას შემდეგ გადმოიყვნეს, რაც ის მძიმე ავტოავარიაში მოჰყვა. სავარაუდოდ, ჯიოევი ნასვამ მდგომარეობაში იმყოფებოდა და საკუთარი მანქანით მოყვა ავარიაში. როგორც ირკვევა, დაშავებული თბილისში კატასტროფის ცენტრის მანქანამ გადმოიყვანა. არსებული ინფორმაციით, ასლან ჯიოევი კომაშია.

ქაცარავას თქმით, ასლან ჯიოევი ახალგორის მილიციის უფროსის ახლო ნათესავი და ფილიპ ხაჩიროვის (გავრცელებული ინფორმაციით, ფილიპ ხაჩიროვი არჩილ ტატუნაშვილის წამების და მკვლელობის საქმეში ერთ-ერთი მთავარი ფიგურანტია) დაცვის წევრია.

“დარწმუნებული ვარ, ჯიოევს გააჩნია უმნიშვნელოვანესი ინფორმაცია ტატუნაშვილის მკვლელობასთან დაკავშირებით. საინტერესო იქნებოდა მისი „გამოკითხვა“ როგორც მინიმუმ... და ერთიც - რატომ არ სარგებლობს საოკუპაციო ზონის მიმდებარე სოფლებში მცხოვრები მოსახლეობა იმავე სამედიცინო მომსახურებით, როგორიც აქვს ოს მოსახლეობას ოკუპირებული ტერიტორიიდან” - წერს დავით ქაცარავა და დასძენს რომ, მისი ინფორმაციით, ჯიოევი უშუალო მონაწილეობას იღებდა ქართველი ტყვეების წამებაში.

ასლან ჯიოევის პერსონის გარშემო არაერთი ინფორმაცია ვრცელდება. ერთ-ერთი ვერსიით, ის ფილიპ ხაჩიროვის პირად დაცვად ტატუნაშვილის მკვლელობის შემდეგ დანიშნეს, თუმცა, ქართველი ტყვეების საქმეში ადრეც ფიგირურებდა და ზოგადად, ამ საქმისგან შორს არასდროს მდგარა, რადგან “ოფიციალურად” თუ “არაოფიციალურად” ყოველთვის ე.წ. მაღალჩინოსნების დავალების შემსრულებელი იყო. თუმცა, მის შესახებ ინტერნეტში ბევრი არაფერი იძებნება...

ახალგორელი სამოქალაქო აქტივისტი, თამარ მეარაყიშვილი, სოციალური ქსელის პირად გვერდზე წერს, რომ რაიონის უფროსის დაცვის თანამშრომელი თბილისში სამკურნალოდ იმყოფება.

“იმაზე, თუ რა დაემართა მას, ალბათ ოფიციალური პირები ისაუბრებენ... ბატონო ანატოლი (ბიბილოვი), თქვენ მოგმართავთ, იყავით უფრო მკაცრი თქვენს დაქვემდებარებაში მყოფების მიმართ, რომელთაც თავიანთ თანამდებობზე პასუხისმგებლობა აქვთ აღებული... ჩვენ ვაკვირდებით რაც აქ ხდება ბოლო დღეებში და რასაც რეაგირება ნამდვილად სჭირდება... უკვე დავიღალეთ ამ ყველაფრისგან და მოგვბეზრდა...” - წერს სამოქალაქო აქტივისტი.

რაც შეეხება ღუდუშაურის კლინიკის პოზიციას, გენერალური დირექტორის პირველმა მოადგილემ მარინა გელანტიამ ჟურნალისტების კითხვებზე საპასუხოდ განაცხადა, რომ პაციენტი 7 ივნისს, გამთენიისას ორგანიზაცია „წითელი ჯვრის“ მიერ იქნა გადმოყვანილი ცხინვალის რეგიონიდან.

კითხვაზე, არის თუ არა აღნიშნული პირი ასლან ჯიოევი, გელანტიამ განაცხადა, რომ პაციენტის სახელისა და გვარის იდენტიფიკაციის უფლება არ აქვთ და მისი მონაცემებიც კლინიკას მოგვიანებით გადაეცემა. მისივე განცხადებით, პაციენტი ღუდუშაურის კლინიკაში ავტოსაგზაო შემთხვევის შედეგად მიყენებული დაზიანებებით შეიყვანეს.

„რაიმე განსაკუთრებული ღონისძიება ამ საკითხთან დაკავშირებით არ ყოფილა, მე ყოველ შემთხვევაში არ მინახავს. ჩვენთან როდესაც გადმოყავთ პაციენტი პირველ რიგში არის პაციენტი და იდენტიფიკაცია მხოლოდ შემდეგ ხდება. ახლა შაბათ-კვირა დაემთხვა და მისი მონაცემები კლინიკისთვის უფრო დაწვრილებით იქნება გადმოცემული“, - განაცხადა მარინა გელანტიამ.

მისივე თქმით, „წითელი ჯვრის“ მიერ კლინიკაში შეყვანილ პაციენტს აღენიშნება ქალა ტვინის ღია ტრავმა, გულ-მკერდისა და ტვინის დაჟეჟილობები, სისხლჩაქცევა, ქალა ფუძისა და ქალა სარქვლის მოტეხილობა.

„სასწრაფო წესით ნეიროქირურგების მიერ საოპერაციოში იყო შეყვანილი, რის შემდეგაც პაციენტი მკურნალობას რეანიმაციულ განყოფილებაში აგრძელებს. მისი მდგომარეობა ფასდება, როგორც სტაბილურად მძიმე“, - განაცხადა გელანტიამ.