რა მდგომარეობაშია ბავშვი, რომელსაც ლიფტში მოძალადე დაესხა თავს და სად არის თავდამსხმელი

13 წლის მოზარდი, რომელსაც 28 მარტს აზერბაიჯანის მოქალაქე ლიფტში თავს დაესხა და სხეულზე დაზიანებები მიაყენა, ქალაქგარეთ დედასთან ერთად რეაბილიტაციას გადის.

როგორც მოზარდის დედამ, ნათია ნ-მ AMBEBI.GE-ს განუმარტა, გარდა იმისა, რომ მოზარდს სხეულზე დაზიანებები ჰქონდა მიყენებული, მისი ფსიქოლოგიური მდგომარეობაც ძალიან მძიმე იყო, კომუნიკაცია უჭირდა და სკოლაში ვერ მიდიოდა. ახლა მისი ჯანმრთელობის მდგომარეობა უმჯობესდება.

„ძალიან მოუხდა გარემოს შეცვლა, მაგრამ თვალი მაინც მძიმე მდგომარეობაშია. დაწვრილებულია და დიდი ნაწიბური აქვს. თვალზე მკურნალობაში ძალიან კარგი ექიმები ჩაერივნენ და შესაძლოა, ოპერაცია არ დასჭირდეს, მაგრამ იმდენად დიდი ნაწიბური აქვს, რომ არამგონია ამან მარტივად გაიაროს. მხედველობა სრულფასოვნად აღდგენილი ჯერჯერობით არ არის, კითხვის დროს თავბრუსხვევა აქვს. მეცადინეობის პროცესი უჭირს და ასოების კითხვისას თავბრუსხვევას გრძნობს. ფილმების ყურებისას თუ გარესამყაროსთან ურთიერთობისას ჩვეულებრივად რეაგირებს“ - განმარტა ნათია ნ-მ.

იხილეთ ვიდეო: როგორია მოზარდის მდგომარეობა, რომელსაც საპატრულო ეკიპაჟის ავტომობილი დაეჯახა? - 13 წლის ბავშვი ჰოსპიტალში რჩება

ბავშვის დედის ინფორმაციით, 3 მაისს აზერბაიჯანის მოქალაქეს თბილისის საქალაქო სასამართლომ შეურაცხადობის საფუძველზე ბრალეულობა მოუხსნა და მისი გადაყვანა ხონის ფსიქიატრიულ დაწესებულებაში მოხდა, სადაც ის 6 თვით დარჩება სამკურნალოდ. ნათია ნ-ს თქმით, სასამართლომ აღნიშნული განაჩენი სამხარაულის ეროვნული ბიუროს მიერ ჩატარებული ექსპერტიზის დასკვნის საფუძველზე გამოიტანა. მოზარდის დედა გამოტანილ განაჩენს არ ეთანხმება, თუმცა ჯერჯერობით დაკონკრეტება უჭირს, სამომავლოდ რა ზომებს მიმართავს.

"ჯერჯერობით დაკავებული ვარ ჩემი შვილის რეაბილიტაციით, ვართ ქალაქიდან გასულები. ჩემთვის უპირატესი ჩემი შვილის ჯანმრთელობაა და რა თქმა უნდა, არ ვაპირებ, ეს საქმე ასე დავტოვო“ - აღნიშნა დაზარალებულის დედამ.

მისი ინფორმაციით, როგორც მხარეს, სასამართლო პროცესზე დასწრების საშუალება არც მას და არც მის ადვოკატს არ მისცემიათ:

„არც კი შემატყობინეს. თვითონ მითხრეს, რომ აურზაურს მოერიდნენ და მეც ვუთხარი, კარგი ვთქვათ, მე აურზაური ვარ, მაგრამ ჩემი ადვოკატი ხომ არ არის აურზაური, რაზეც მიპასუხეს, რომ ჩემი იქ ყოფნა ფორმალურად არ იყო აუცილებელი, იმიტომ რომ თქვენ მხარე არ ხართო. მხარეს ამ შემთხვევაში წარმოადგენდა პროკურატურა და ჩვენ თურმე დანაშაულის შემადგენელი კომპონენტი ვიყავით. ერთადერთი ვარ ჩემი შვილისთვის, მამა არ ყავს და ასეთ გამწარებულ მდგომარეობაში, რა თქმა უნდა, შურისძიების ხასიათზე ყველა დგება, მაგრამ კანონების და წესების მიხედვით უნდა იმოქმედო, ამიტომ ეს საქმე ბოლომდე უნდა გაირკვეს. ჯერ ვერ მოვკიდე ხელი, რადგან ბავშვს ვუვლი, ყველანაირი საქმე დავივიწყე და ჩემი შვილის გვერდით ვდგავარ, როდესაც შევატყობ, ჯანმრთელობის მხრივ სწორ გზაზე ვდგავართ, პროცესებში მაშინვე ჩავერთვები,“ - განმარტა ნათია ნ-მ.

შეგახსენებთ, რომ მიმდინარე წლის 28 მარტს თბილისში, ვაჟა-ფშაველას მე-7 კვარტალში, აზერბაიჯანის რესპუბლიკის მოქალაქე, 1996 წელს დაბადებული რ.ა არასრულწლოვნის მიმართ ჩადენილ ძალადობის ფაქტზე დააკავეს. პატრულ-ინსპექტორებს საცხოვრებელი კორპუსის სადარბაზოში 13 წლის ბიჭი დახვდათ, რომელსაc სხეულზე დაზიანება აღენიშნებოდა. სამედიცინო დახმარების ბრიგადამ არასრულწლოვანი დაავადმყოფოში გადაიყვანა. გამოძიება სისხლის სამართლის კოდექსის 126-ე მუხლით დაიწყო რაც ძალადობას გულისხმობს.

აზერბაიჯანის მოქალაქე, რომელიც არასრულწლოვანს თავს დაესხა და სხეულზე დაზიანებები მიაყენა, სასამართლოს გადაწყვეტილებით ხონი-ქუტირის ფსიქიატრიულ საავადმყოფოში იძულებით სარეაბილიტაციო კურსს გადის. როგორც AMBEBi.GE-ს სასამართლოს საზოგადოებასთან ურთიერთობის სამსახურში განუცხადეს, აზერბაიჯანის მოქალაქის ფსიქიატრიულ საავადმყოფოში გადაყვანაზე შუამდგომლობის საკითხი ბრალდების მხარემ, კერძოდ პროკურატურამ დააყენა. "შედეგად, ბრალდებულის მიმართ სისხლის სამარლებრივი დევნა შეწყდა და იძულებით ფსიქიატრიულ მკურნალობას გადის” - განმარტეს საქალაქო სასამართლოში.