შეიარაღებული დაპირისპირება ძიუდოს ფედერაციის ვიცე პრეზიდეტსა და ძიუდოისტებს შორის - დაჭრილია ძიუდოისტი

ძიუდოს ფედერაციის ვიცე-პრეზიდენტ ლომერ ჟორჟოლიანსა და ძიუდოისტებს შორის, გუშინ გვიან ღამით დაპირისპირება მოხდა. AMBEBI.GE-ს ინფორმაციით, შემთხვევა ღამით მარჯანიშვილის მეტროს მიმდებარე ტერიტორიაზე მოხდა.

ჩვენი წყაროს ცნობით, სპორტსმენებს შორის შეიარაღებული დაპირისპირების დროს, ძიუდოისტი სოსო წელაური დაიჭრა. არსებული ინფორმაციით, დაპირირისპირების დროს ადგილზე იმყოფებოდნენ ძიუდოისტები ავთანდილ ჭრიკიშვილი და ვარლამ ლიპარტელიანი.

აღნიშნულთან დაკავშირებით ინფორმაცია AMBEBI.GE-ს ზურაბ ზვიადაურმაც დაუდასტურა:

"ზუსტად რატომ დაიწყო დაპირისპირება არ ვიცი, მაგრამ ამას თვითმხილველებიც ჰყავს. ეს იყო შეიარაღებული დაპირისპირება, რომელიც პატრულის თვალწინ მოხდა და დაჭრილია ერთი ადამიანი. ეს უკვე მეორე ფაქტია, როცა სპორტსმენებზე მოხდა ზეწოლა" - განაცხადა ზვიადაურმა.

ლომერ ჟორჟოლიანი

ჩვენი წყაროს ცნობით, სპორტსმენებს ფედერაციის ვიცე-პრეზიდენტმა ლომერ ჟორჟოლიანმა ესროლა და სოსო წელაური ბარძაყის არეში დაიჭრა. ის არამიანცის საავადმყოფოშია მოთავსებული.

ფაქტი დაგვიდასტურეს შინაგან საქმეთა სამინისტროშიც. უწყების ცნობით, მომხდარზე დაკავებულია ერთი პირი. დაწყებულია გამოძიება 126-ე და 136-ე მუხლებით. რაც შეეხება დაჭრის ფაქტს, ამას კრიმინალური პოლიცია იძიებს.

შეგახსენებთ, ძიუდოს ფედერაციასა და ძიუდოისტებს შორის დაპირისპირება ევროპის ჩემპიონატის შემდეგ დაიწყო. ძიუდოისტების ნაწილი ფედერაციის პრეზიდენტის დავით ქევხიშვილის გადადგომას მოითხოვს, ქევხიშვილი წასვლას არ აპირებს და სპორტსმენებს მოლაპარაკებას სთავაზობს.

იხილეთ ვიდეო: შეიარაღებული დაპირისპირება ძიუდოს ფედერაციის ვიცე-პრეზიდეტსა და ძიუდოისტებს შორის - ლომერ ჟორჟოლიანი ძიუდოისტის დაჭრის ბრალდები დააკავეს