"ბაბჩენკოს მკვლელობისთვის შემსრულებელს 30 ათასი დოლარს დაპირდნენ" - რა გეგმა ჰქონდათ რუსულ სპეცსამსახურებს?

რუსი ჟურნალისტის არკადი ბაბჩენკოს მკვლელობისთვის ანტიტერორისტული ოპერაციის ყოფილ მონაწილეს 30 ათას აშშ დოლარის ოდენობის ჯილდოს დაპირდნენ. "უკრინფორმის" ინფორმაციით, ამის შესახებ უკრაინის უშიშროების სამსახურის ხელმძღვანელმა ვასილი გრიცაკმა ჟურნალისტებს განუცხადა.

"სამსახურის მიერ დოკუმენტირებულია, რომ ამ ცინიკური გეგმის რეალიზებისთვის რუსეთის სპეცსამსახურებმა გადაიბირეს უკრაინის მოქალაქე „გ“, რომელსაც დაევალა, ფულადი ჯილდოს სანაცვლოდ, ეპოვნა ტერაქტის შემსრულებლები. რუსეთის სპეცსამსახურების აგენტმა, შესრულებული დავალებისთვის თავის ნაცნობს - ანტიტერორისტული ოპერაციის ყოფილ მონაწილეს ფულადი ჯილდო შესთავაზა 30 ათასი აშშ დოლარის ოდენობით, რომელსაც უნდა მოეკლა რუსი ჟურნალისტი არკადი ბაბჩენკო. ამისთვის მას ბე-ს სახით 15 ათასი დოლარი გადაეცა", - აღნიშნა გრიცაკმა.

მისივე ცნობით, ბაბჩენკოს მიმართ ტერაქტის შესრულების შემდეგ, მოქალაქე "გ" უკრაინის დატოვებას აპირებდა.

ინფორმაცია, რომ რუსი ოპოზიციონერი ჟურნალისტი არკადი ბაბჩენკო მოკლეს, 29 მაისს გავრცელდა, თუმცა დღეს გახდა ცნობილი, რომ მკვლელობა ინსცენირებული იყო უკრაინის უსაფრთხოების სამსახურის მიერ, რათა გამოევლინათ მკვლელობის შემკვეთი.

ნახეთ ასევე: არკადი ბაბჩენკოს ფოტოები აგვისტოს ომიდან