თბილისში ცნობილი სილამაზის სალონის მფლობელი ოპერაციის დროს გარდაიცვალა - "ჯანმრთელი ქალი დაღუპეს..."

თბილისში მდებარე ცნობილი სილამაზის სალონის "კარინას" მფლობელი კარინა ხარატოვა მოულოდნელად გარდაიცვალა. 53 წლის ქალბატონმა "ევექსის" კლინიკაში საშვილოსნოს ამოკვეთის ოპერაცია გაიკეთა და რამდენიმე დღეში დაიღუპა.

ოჯახის წევრები მის გარდაცვალებაში გინეკოლოგ ვადიმ ხატიაშვილსა და ანესთეზიოლოგს ადანაშაულებენ. როგორც კარინა ხარატოვას შვილები Ambebi.ge-სთან საუბრისას აცხადებენ, ექიმებმა წინასწარ არ გამოიკვლიეს პაციენტის სასუნთქი გზების მდგომარეობა და არც ის განსაზღვრეს, ანესთეზიის გასაკეთებლად ბრონქოსკოპისტის საჭიროება იქნებოდა თუ არა. მათი თქმით, ანესთეზიოლოგმა კარინა ხარატოვას სასუნთქი მილის ჩაყენებისას ტრაქეა დაუზიანა, რის გამოც მისი მდგომარეობა უკიდურესად დამძიმდა და საბოლოოდ ფატალური შედეგი დადგა.

"ჯანმრთელი ქალი მართლა დაღუპეს და ოჯახს გვიმალავდნენ სიმართლეს, სანამ უკიდურესად არ დამძიმდა მდგომარეობა. დედაჩემი საკუთარი ფეხით მივიდა კლინიკაში გეგმური ოპერაციის გასაკეთებლად, რომელიც საერთოდ არ უკავშირდებოდა იმას, რა მიზეზითაც დაიღუპა. ყველანაირი ანალიზი ჩაბარებული ჰქონდა და აპირებდა საშვილოსნოს ამოკვეთას, რაც ლაპარასკოპიით უნდა გაკეთებულიყო. ინტუბაციის დროს ანესთეზიოლოგმა ჩაუხია ტრაქეა. ჩვენ ძალიან გვიან გავიგეთ ეს ყველაფერი, სიმართლეს გვიმალავდნენ 24 საათის განმავლობაში. მერე უკვე ნეკროზი წავიდა ორგანიზმში" - განაცხადა კარინა ხარატოვას შვილმა, არტურ ხარატოვმა Ambebi.ge-სთან საუბარში.

12 დღის განმავლობაში კარინა ხარატოვას ტრაქეის აღსადგენად ოპერაციები უტარდებოდა და მის გადარჩენას ექიმები უშედეგოდ ცდილობდნენ. ოჯახის სურვილით მომხდარის შესწავლა უკვე დაწყებული აქვს დამოუკიდებელ ექსპერტს, მაია ნიკოლეიშვილს, რომელიც ტრაქეის დაზიანებას ადასტურებს და აცხადებს, რომ გარდაცვალება ინტენსიურმა სისხლდენამ გამოიწვია.

"მთელი რიგი შეკითხვებია და რა თქმა უნდა, ახლა ლაბორატორიული კვლევები იქნება საჭირო, მაგრამ სიკვდილის მიზეზი პრინციპში უკვე გასაგებია. გარკვეული საკითხები დაზუსტდება მიკროსკოპით და შემდეგ უკვე ის, ჩატარდა თუ არა სწორად სამედიცინო დახმარება, იყო თუ არა შეცდომა დაშვებული და რისი თავიდან აცილება შეიძლებოდა - ამას ყველაფერს უკვე შემდგომი ექსპერტიზა სჭირდება, რომელიც კომისიურად ექიმ-სპეციალისტების მიერ ჩატარდება. ტრაქეის ჩახევა, კი ბატონო, იყო. ჩვეულებრივ ამას ადგილი არ უნდა ჰქონდეს, მაგრამ ეს შეცდომა იყო თუ არა და მერე როგორ შეიძლებოდა ამის გამოსწორება, ეს მეორე ექსპერტიზაზე უნდა დადგინდეს" - აცხადებს ექსპერტი მაია ნიკოლეიშვილი Ambebi.ge-სთან საუბარში.

მომხდარზე პასუხისმგებლობას არ გაურბიან "ევექსში", თუმცა კლინიკაში აცხადებენ, რომ გარდაცვლილს ტრაქეას უკანა კედლის ანომალიური მდებარეობა ჰქონდა, რის გამოც სასუნთქი მილის ჩაყენება გართულდა. როგორც კლინიკის დირექტორმა ჩვენთან საუბრისას განმარტა, კარინა ხარატოვას პროფესიული საქმიანობიდან გამომდინარე კისრის კიფოზი ჰქონდა განვითარებული, რის გამოც ტრაქეის მდებარეობამ და აგებულებამაც ცვლილება განიცადა.

"53 წლის ქალბატონმა მომართა ჩვენს კლინიკას საშვილოსნოს პრობლემებით. მას საშვილოსნოს ამოღება ლაპარასკოპიული ქირურგიით ჩაუტარდა და გართულდა მდგომარეობა. ამ ოპერაციისთვის საჭირო პროცედურის ჩატარება მოხდა. კერძოდ, საჰაერო გზების საჰაერო მილით დახმარება და შემდეგ ამ მილის მიერთება ხელოვნური სუნთქვის აპარატზე. როდესაც ამ მილის ჩაყენება ხდებოდა, აღმოჩნდა, რომ ამ ადამიანის საჰაერო გზების წყობა იმგვარად იყო დალაგებული, რომ ჩვეულებრივი მეთოდით საჰაერო გზებთან მიდგომა შეუძლებელი იყო. ანესთეზიოლოგებმა ვერც კი შეძლეს საჰაერო გზის შესასვლელი ნაწილის გადალახვა. ამიტომაც გამოუძახეს ბრონქოსკოპისტს, რომელსაც სპეციალური აპარატურა აქვს ამის გასაკეთებლად. საჰაერო გზებში მოხდა დრეკადი მილის შეყვანა, რომლის წვერზეც მოთავსებულია კამერა. პაციენტს ჰქონდა კისრის კიფოზი, რაც ნიშნავს იმას, რომ ხერხემლის კისრის ნაწილი იყო მნიშვნელოვნად წინ წაწეული. მოგვიანებით კომპიუტერულმა ტომოგრაფიამ აჩვენა, რომ ჰქონდა ტრაქეასა და საყლაპავის ანომალიური მდებარეობა. იმის გამო, რომ პროფესიული საქმიანობიდან გამომდინარე მისი კისერი წინ იყო გადახრილი, ხრტილოვანი ტრაქეაც წინ წავიდა და კუნთოვანი საყლაპავი ხერხემალთან დარჩა. მოხდა ამ ორი ორგანოს დაშორება" - აცხადებს "ევექსის" დირექტორი გრიგოლ ხურციძე.

კითხვაზე, რატომ არ მოხდა კარინა ხარატოვას სასუნთქი გზების წინასწარ შესწავლა და ტრაქეას მდგომარეობის განსაზღვრა, ხურციძე პასუხობს, რომ პაციენტი წინასწარ გამოიკვლიეს, მისი სასუნთქი გზებიც შეისწავლეს, თუმცა წინასწარ იმის პროგნოზირება, რომ კარინა ხარატოვას ტრაქეას უკანა კედლის სისუსტე აღენიშნებოდა, შეუძლებელი იყო.

მომხდარზე მოკვლევა ჯანდაცვის სამინისტროს ჯერ არ დაუწყია. სამინისტროს სამართლებრივი უზრუნველყოფის დეპარტამენტის საზოგადოებასთან ურტიერთობის სამმართველოს უფროსის, მარიანა ჟვანიას თქმით, ამისთვის ოჯახის მიმართვაა საჭირო.

ნახეთ ვიდეო