ცხოველები, რომლებსაც პატრონებმა რამდენიმე მილიონი დოლარი დაუტოვეს

ადამიანების ნაწილი შინაურ ცხოველებზე, ხშირად, იმდენად დამოკიდებული ხდება, რომ მათზე ზრუნვა სხვებისთვის სასაცილოდაც კი ჩანს. მაგალითად, გარდაცვალების შემდეგ საკუთარ ქონებას ხანდახან სწორედ შინაურ ცხოველებს უტოვებენ.

თქვენ წარმოიდგინეთ, არსებობენ ცხოველები, რომლებსაც ძალიან ბევრ ადამიანზე მეტი ფული აქვთ.

გიუნტერ III და გიუნტერ IV

კარლოტა ლიბენშტაინი გერმანელი გრაფინია იყო, რომელსაც საკუთარი ძაღლი, გიუნტერ მესამე არანორმალურად უყვარდა.

ძაღლს მან 65 მლნ დოლარი დაუტოვა, ცხოველმა ქონება პატრონის გარდაცვალების შემდეგ მიიღო, 1992 წელს.

გიუნტერ მესამის სიკვდილის შემდეგ კი ქონება მის ლეკვს, გიუნტერ მეოთხეს დარჩა.

თრაბლი

ლეონა ჰელმსლი ამერიკელი საქმოსანი იყო, რომელსაც ძალიან მძიმე და ფეთქებადი ხასიათი ჰქონდა. ლეონა ფლობდა სასტუმროების ქსელს Helmsley. ადამიანებისგან განსხვავებით, მას დიდი სიყვარული აკავშირებდა საკუთარ ძაღლთან, თრაბლთან.

ჰელმსლი 87 წლის ასაკში გარდაიცვალა, მას უამრავი ახლო ნათესავი ჰყავდა, თუმცა ქონება - 12 მლნ დოლარი ძაღლს დაუტოვა. მისმა ძმამ, ელვინ როზენტალმა რამდენიმე მილიონი დოლარი მიიღო პირობით, რომ თრაბლზე იზრუნებდა.

თუმცა, ძაღლს პრობლემები შეექმნა - ნათესავებმა გადაწყვიტეს, სასამართლოში შეეტანათ სარჩელი. სასამართლომ მიიღო გადაწყვეტილება, რომ ანდერძის დაწერის დროს ლეონას ფსიქიკური აშლილობა ჰქონდა, ამიტომ თრაბლს 12 მლნ-დან მხოლოდ 2 მლნ დარჩა.

ტომაზო

კატა ტომაზო მილიონერმა ასაკოვანმა ქალმა, მარია ასუნტამ შეიფარა. ქალის გარდაცვალების შემდეგ აღმოჩნდა, რომ მას ახლობლები არ ჰყავდა. 10 მლნ ევროს ღირებულების ქონება კი, მათ შორის - რამდენიმე სახლი რომსა და მილანში, აგარაკები იტალიის სხვადასხვა კურორტზე ტომაზოს დარჩა. მსოფლიოში ყველაზე მდიდარი კატა ბედნიერად ცხოვრობდა ერთ-ერთ სახლში, მასზე 48 წლის ექთანი, სტეფანი ჩეკონი ზრუნავდა.

ტომაზო 5 წლის ასაკში გასტროენტერიტით მოკვდა.

კონჩიტა, ლუსია და ეიპრილ მარია

პატრონის, გეილ პოსნერის გარდაცვალების შემდეგ სამი ძაღლი მილიონერი გახდა, მათ 8.3 მლნ დოლარის ქონება მიიღეს. ძაღლების სახელებია კონჩიტა, ლუსია და ეიპრილ მარია. პოსნერის გარდაცვალების შემდეგ მათ ჰყავდათ საკუთარი მომვლელი პერსონალი, ყოველდღიური სპა-პროცედურები. გეილ პოსნერის ერთადერთი შვილი, ბრეტ კარი დედის გადაწყვეტილებით კმაყოფილი არ იყო. მისი გარდაცვალების შემდეგ ბრეტმა მხოლოდ 1 მლნ დოლარი მიიღო.