ბრიტანეთში მცხოვრები ქართველი ოჯახები სამეფო ქორწილსა და ბრიტანული ცხოვრების სტილზე

ნათია ჯანელიძე ამერიკული საინვესტიციო ფონდის "Gazelle Finance"-ის რეგიონალური დირექტორია, მისი ოჯახი დიდ ბრიტანეთში ხანგრძლივად ცხოვრობდა და როგორც თავად გვიყვება, სამეფო ოჯახის მიერ მოწყობილ წვეულებებს ხშირადაც ესწრებოდა. ჩვენი რესპონდენტი იმ განსაკუთრებულობებსა და თავისებურებებზე გვესაუბრება, რასაც სხვა ქვეყნიდან ჩასული ადამიანი აღიქვამს და რასაც ქვეყნის გეოგრაფიული ადგილმდებარეობა და მრავალსაუკუნოვანი ტრადიციებით დატვირთული ისტორია განაპირობებს.

"დიდ ბრიტანეთში ტურისტული თუ სამსახურებრივი მისიით, სხვადასხვა წელს, არაერთხელ ვყოფილვართ, მაგრამ როცა ამ ქვეყანაში ხანგრძლივი ვადით, საცხოვრებლად ჩადიხარ, სულ სხვა თვალით ეცნობი იქაურობას. ჩვენი ოჯახი დიდ ბრიტანეთში საცხოვრებლად 2014 წელს გადავიდა, როცა ჩემი მეუღლე, ვიცე-პოლკოვნიკი დავით ჩხეტიანი დიდი ბრიტანეთის თავდაცვის სამინისტროს მიწვევით, გაერთიანებული სამეფოს დავდაცვის აკადემიაში მაღალი დონის კურსის გასავლელად მიევლინა. გარდა იმისა, რომ პროფესიული თვალსაზრისით ბრიტანეთში მიღებული განათლება, როგორც სამხედრო, ისე სამოქალაქო ნაწილში (ასევე წარმატებით დაასრულა King's College London-ის მაგისტრატურა), ბრიტანეთში გატარებული წლები თავისი შინაარსით, მთელი ოჯახისთვის მნიშვნელოვანი და საინტერესო იყო.

- როგორც გვითხარით, სამეფო ოჯახის ღონისძიებებზეც ყოფილხართ მიწვეული და მათში მონაწილეობა მიგიღიათ. მოგვიყევით უშუალოდ სამეფო ოჯახთან თქვენს ურთიერთობაზე.

- პროფესიული თვალსაზრისის გარდა, ბრიტანეთში ცხოვრება იყო სასიამოვნო აღმოჩენებით, სიახლეებით, საინტერესო ადამიანებთან შეხვედრებით დატვირთული. ბრიტანეთის მთავრობის მიწვევით ვიმყოფებოდით ქვეყანაში და უნიკალური შესაძლებლობა მოგვეცა, დავსწრებოდით სამეფო ოჯახის პატივსაცემად გამართულ ღონისძიებებს. მაგალითად, წილად მხვდა პატივი, დავსწრებოდი დედოფლის დაბადების დღისადმი მიძღვნილ ცერემონიალს და შევხვედროდი სამეფო ოჯახის წევრებს. ალბათ ამ დღეს გამოვყოფდი, როგორც ყველაზე საოცარს, ემოციებით დატვირთულს, განსაკუთრებულს. არ მეგონა, თუ ამხელა შთაბეჭდილებას მოახდენდა სამეფო ოჯახის გარემოცვა ჩემზე, მაგრამ ეს საოცარი, ენით აღუწერილი შეგრძნებაა.

საინტერესო იყო ამ დღისთვის სამზადისი. ბრიტანელებს, როგორც მოგეხსენებათ მკაცრად განსაზღვრული წესები აქვთ. მსგავს ღონისძიებებზე ასევე მკაცრადაა გაწერილი ჩაცმულობის წესებიც. დაახლოებით ერთგვერდიანი ჩაცმულობის კოდექსი უნდა დააკმაყოფილო, სადაც დეტალურადაა გაწერილი ისეთი ნიუანსები როგორიცაა: კაბის სიგრძე, მკლავის სიგრძე, ქუდის გარშემოწერილობა, ფეხსაცმლის სტილი და ა.შ. სამეფო ოჯახთან დაკავშირებული ღონისძიებებიდან ასევე გამოვყოფდი სამეფო ოჯახის მიერ ორგანიზებულ ვახშამს, სადაც ასევე მიწვეული ვიყავით მე და ჩემი მეუღლე. აღნიშნული ვახშამი გაიმართა პრინცესა ანნას ეგიდით.

ასევე, გამოვყოფდი ვიზიტს ბოვუდის სასახლეში, სადაც ოჯახს გვიმასპინძლა ლორდმა ლენდსდაუნმა და მისმა არაჩვეულებრივმა მეუღლემ. წლის გამორჩეული მოვლენაა ასევე Royal Ascot (სამეფო დოღი), რომელიც დედოფლის პატივსაცემად იმართება. აქ თითქმის მთელი სამეფო ოჯახი, ბრიტანეთის არისტოკრატიის წარმომადგენლები და რიგითი მოქალაქეები იყრიან თავს (ცალკე გამოყოფილ ადგილას). ამ მხიარულ ღონისძიებაზე გარდა იმისა, რომ ფსონები კეთდება დოღში თუ რომელი ცხენი გაიმარჯვებს, ფსონი შესაძლოა დადო იმაზეც, თუ რა ფერის კოსტიუმი ეცმევა იმ დღეს დედოფალს.

სამეფო ოჯახთან ვიზიტისას და სხვა მსგავს ღონისძიებებზე მკაფიოდ გამოჩნდა, რომ ბრინტანელებს ძალიან უყვართ ხაზგასმა თავიანთ სტატუსზე. თუ სხვა ქვეყნისთვის ეს შესაძლოა მიუღებელი იყოს, ბრიტანეთში იერარქიული დაყოფა ჩვეულებრივია. მსგავს ღონისძიებზეც კი, მკაფიოდაა გამიჯნული ადგილები შესაბამისი იერარქიული ფენებისათვის. ხშირ შემთხვევაში, სხვადასხვა კლასისთვის ჩაცმის კოდექსიც განსხვავდება. როგორც წესი, სხვადასხვა იერარქიის ადამიანი ერთმანეთთან კომუნიკაციაში ნაკლებად შედის. ამის დასტურად ერთი მინიშნება გამოდგება, რაც ერთ-ერთმა შუახნის არისტოკრატმა ბრიტანელმა ქალბატონმა მომცა. მკაფიოდ განმიმარტა, რომ ბრიტანული წესის მიხევდით, სასურველი იყო, ძირითადად მემეგობრა იმ სამხედრო მოსამსახურეების მეუღლეებთან, რომელთა სამხედრო წოდებაც ჩემი მეუღლის სამხედრო წოდების ანალოგიური იყო და ნაკლებად მქონოდა კომუნიკაცია შედარებით დაბალი სამხედრო წოდების მქონე სამხედრო მოსამსახურეების მეუღლეებთან. ეს ჩემთვის უჩვეულო შენიშვნა, რიგითი ბრიტანელისთვის ჩვეულებრივი ცხოვრების წესია.

შესაბამისად, ჩემთვის პირადად გასაკვირი არ იყო, რატომ მოყვა ბევრი მითქმა-მოთქმა სამეფო ქორწილს. ეს სახასიათოა, ისეთი ქვეყნისთვის, რომლისთვისაც მკაცრად გაწერილი კანონებია, სადაც შეგრძნება გაქვს, რომ დრო არ იცვლება და სადაც მეტად გრძნობ ისტორიას და ტრადიციებს, თუმცა საინტერესოა განსხვავებული დინამიკის ნახვაც. ეს ყველაფერი ნამდვილად ერთ-ერთი უნიკალური მოვლენა იყო ჩემს ცხოვრებაში. ბრიტანეთში ვიზიტი ასევე განსაკუთრებული იყო ჩემი ტყუპი შვილისთვის (ოთო და ელენე). 4 წლის იყვნენ, როცა საქართველოდან წავედით, სკოლის მოსამზადებელი ეტაპი იქ გაიარეს. არაჩვეულებრივად საუბრობენ ინგლისურად და ეზიარნენ ბრიტანულ კულტურას. ამ ქვეყნის დიდი მადლობელი ვარ, რომ ბავშვები საოცრად დისციპლინარულები არიან, რაც იქაური საგანმანათლებლო სისტემის დამსახურებაა.

მიუხედავად იმისა, რომ ყველა პატარა გოგო პრინცესობაზე ოცნებობს, ელენეს, რომელმაც მისი ბავშვობა იმ ქვეყანაში გაატარა, სადაც ნამდვილი პრინცესები ცხოვრობენ, ეს საერთოდ არ ხიბლავს და ამბობს, რომ პრინცესობა ძალიან მოსაწყენია და ისინი უინტერესო ცხოვრებით ცხოვრობენ და ვერ აკეთებენ იმას, რაც სურთ. თუმცა, სტერეოტიპები იმსხვრევა და მიუხედავად არაერთი გადახვევისა, პრინცმა ჰარიმ მაინც გააკეთა ის, რაც მას სურდა. დრო მიდის და დროსთან ერთად ვიცვლებით. ადაპტირდება ყველაზე მკაცრი ტრადიციების მქონე სამეფო ოჯახიც როგორც ვნახეთ, თუმცა როგორც ერთ-ერთი რიგითი ადამიანი, ვისურვებდი, ძირეული ფასეულობების შენარჩუნებას, ვინაიდან ეს სამეფო ოჯახი, ეს ტრადიციები და ეს ფასეულობები ამ ქვეყანას განსაკუთრებულს ხდის ტურისტისთვის".

გასული კვირის სამეფო ქორწილის ციებ-ცხელება დიდ ბრიტანეთში უკლებლივ ყველას შეეხო, მათ შორის იქ მცხოვრებ ქართველებსაც. ჩვენ კიდევ ერთ ქართულ ოჯახს დავუკავშირდით და ვთხოვეთ, ის ემოცია და შთაბეჭდილება გადმოეცა, რასაც ქვეყანა ქორწილის დღეს განიცდიდა.

იქამდე კი, ქალბატონ ირმა ჩომახიძეს საკუთარ თავზე ვთხოვეთ მოეყოლა:

"2007 წელს დავქორწინდი ქართველ მამაკაცზე, ლევან შაოგირაძეზე, რომელიც ბრიტანეთის მოქალაქეა და თავისთავად, საცხოვრებლად ინგლისში გადავედი... საინტერესო სამსახური მაქვს, Kiwi Post-ის გენერალური მენეჯერი ვარ. მყავს 2 გოგონა - 8 წლის ნიკოლ-ბარბარე და 5 წლის ანნა-მარია. მეუღლე და შვილები ბრიტანეთის მოქალაქეები არიან, მე მუდმივი ცხოვრების საბუთი მაქვს. უცხო ქვეყანაში ადაპტირებაში მეუღლე დამეხმარა, ცდილობდა, მაქსიმალურად გაეცნო და შეეყვარებინა ჩემთვის ეს ქვეყანა. დღეს ლონდონი, თბილისის შემდეგ, ჩემი საყვარელი ქალაქია. განვითარებულ ქვეყანაში ცხოვრება დიდ რამეს ნიშნავს. ჩემი შვილები კარგ განათლებას იღებენ, თავისუფალ გარემოში იზრდებიან. აქ ნებისმიერ ადამიანს შეუძლია საკუთარი თავის სრული რეალიზაცია, რასაც საკუთარ თავზე ვცდი. საქართველოში დაბრუნებას ამ ეტაპზე არ ვაპირებთ, რადგან ძალიან დიდი სამომავლო გეგმები გვაქვს ჩაფიქრებული," - აღნიშნავს ჩვენი რესპონდენტი.

- ბრიტანული მთავარი ქორწილის გარშემო სამყაროს ყურადღება იყო მიპყრობილი. როგორ ემზადებოდა ქვეყანა ამ დღისთვის?

- ქორწილისთვის მზადება მთელ ბრიტანეთში ნიშნობის შემდეგ დაიწყო. მაღაზიებში იყიდებოდა საქორწინო აქსესუარები: ბრიტანეთის დროშები, პრინც ჰარის, პრინცესა მეგანის და სამეფო ოჯახის წევრების ფოტოების ნიღბები, სუვენირები, ტკბილეულები და ა.შ. მთელი ქვეყანა ამ ქორწილისთვის აქტიურად ემზადებოდა. ქორწილის დღეს მოსახლეობამ უამრავი პატარა ქუჩა გადაკეტა და ერთობრივი ძალებით საზეიმო ნადიმი გაშლეს. ადღეგრძელებდნენ და ლოცავდნენ ახალ სამეფო ოჯახს. მღეროდნენ და ცეკვავდნენ, სიხარული და ჰაერში, შეიძლება ითქვას, რომ ბედნიერება ტრიალებდა.

თითქოს მხოლოდ სამეფო ოჯახები ზღაპრებში არსებობს, თუმცა XXI საუკუნეში, ჩემს საყვარელ ბრიტანეთში ზღაპრულად ვცხოვრობთ - პრინცებისა და პრინცესების გარემოცვაში. მართლაც საოცარი სამეფო ქორწილი იყო, უამრავი მსოფლიო დონის სტუმრებით. მომღერლები, მსახიობები, პოლიტიკოსები, სხვადასხვა ქვეყნის სამეფო წარმომადგენლები, ცნობილი ადამიანები და მათ შორის სამეფო ოჯახის ფანი მოქალაქეებიც არ დაჰკლებია ბრიტანეთს. საკმაოდ გულის ამაჩუყებელი იყო ჯვრისწერის ცერემონიის დროს, მგალობელთა გუნდის შესრულებულ საგალობელზე, როცა პრინც ჰარის თვალზე ცრემლი შევნიშნეთ. გამჭირვალედ ჩანდა როგორი სიყვარულით უყურებდნენ ერთმანეთს და ბედნიერებასაც ასხივებდნენ. პრინც ჰარი განსაკუთრებულია ქარიზმითა და უშუალო ადამიანობით გამოირჩევა. თავისი არჩევანით, კიდევ ერთხელ დაანახა მთელ მსოფლიოს, თუ როგორი მოდერნისტულია ბრიტანეთის სამეფო ოჯახი, რაც მეტ პოპულარობას ძენს მათ. ბედნიერება მინდა, ვუსურვო პრინც ჰარის და პრინცესა მეგანს. ისე ბევრი გოგო დარჩა გულნატკენი, პრინცის ცოლობაზე რომ ოცნებობდა, ეს ხუმრობით.