8
ივნისიდღის ზოგადი ასტროლოგიური პროგნოზი
თბილისს 31 მაისს მსოფლიო ბესტსელერის, ”გიკი გოგოს” ავტორი ჰოლი სმეილი ეწვევა. მისი ვიზიტი თბილისის წიგნის ფესტივალს უკავშირდება, რომლის ფარგლებშიც ქართველ მკითხველს საშუალება მიეცემა, საყვარელ ავტორს პირისპირ გაესაუბროს. მწერალს ძალიან აინტერესებს უცხო ქვეყნების ტრადიციები და კულტურა, შესაბამისად, გულშემატკივართან შეხვედრის პარალელურად, ის დაათვალიერებს თბილისის ღირსშესანიშნაობებს და გაიცნობს ქალაქის ისტორიას. იმის გამო, რომ ავტორი ვეგეტერიანელია და პლუს სპეციალურ, ე.წ. gluten-free დიეტაზეა, ჰოლი სმეილმა დამოუკიდებლად მოიძია ინფორმაცია ქართული სამზარეულოს შესახებ და უკვე შეარჩია კერძები, რომელთა გასინჯვასაც ვიზიტის ფარგლებში ისურვებდა. ესენია: ჭვიშტარი, ლობიო, გებჟალია, ნიგვზიანი ბადრიჯანი, ნიგვზიანი ფხალი, აჯაფსანდალი, შილა ფლავი, ღომი, ჭარხლის სალათი, შემწვარი კარტოფილი სვანური მარილით.
ბრიტანელი ჰოლი სმეილი ავტორია ექვსტომეულის, სახელად „გიკი გოგო“. ეს არის საინტერესო და უნიკალური წიგნების სერია, რომელიც წინა პლანზე ისეთ პრობლემებს წამოწევს, როგორებიცაა: ბულინგი სკოლაში, საკუთარი თავის პოვნა და საზოგადოებაში თავის დამკვიდრება გარდატეხის ასაკში. მთავარი გმირი ჰერიეტი ჩვეულებრივი „გიკია“, რაც ქართულად დაახლოებით წიგნის ჭიას ნიშნავს. გიკთან ასოცირდება ადამიანი, რომელიც მთელ დროს მეცადინეობაში ხარჯავს და სოციალური ცხოვრებით არ გამოირჩევა. ჰერიეტი ძალიან განათლებული გოგოა. ის ცდილობს, დაამტკიცოს, რომ გიკობა ცუდი სულაც არ არის და ეს ფაქტი ხელს არ უშლის, რომ წარმატებებს, რაც უნდა დაუჯერებელი იყოს, მოდის სამყაროშიც კი მიაღწიოს. ავტორი ცდილობს, რომ გვიჩვენოს, თუ როგორ შეიცვალა საზოგადოების დამოკიდებულება ბოლო წლებში მოცემული პრობლემის მიმართ.
„სამყაროში სიტყვა „გიკი“ მნიშვნელობას იცვლის, ის დასაცინიდან საქებარ სიტყვად გარდაიქმნა, სწორედ ამის მიღწევა მინდოდა მეც. იყავი ის ვინც ხარ, გიკობა არაა სირცხვილი“, ამბობს ჰოლი სმეილი ერთ-ერთ ინტერვიუში.
წიგნი საქართველოში განსაკუთრებული პოპულარობით სარგებლობს. ის სერია ”ლიბერთინსის” ფარგლებშია გამოცემული. გამომცემლობის მიერ შეთავაზებული განსაკუთრებული ფასდაკლების საშუალებით წიგნი უამრავი თინეიჯერისთვის გახდა ხელმისაწვდომი. წიგნის მიმართ ქართველი თინეიჯერების დიდი დაინტერესება კი უყურადღებოდ არ დაუტოვებია თავად ავტორს. ჰოლი სმეილი "ბიბლუსი გალერეასთან" შეკრებილ წიგნის მოყვარულებს "ტვიტერზე" გამოეხმაურა და მათ ქართულად გადაუხადა მადლობა.
"დიდი მადლობა ყველას თქვენი მხარდაჭერისთვის. დიდი მადლობა, თქვენ გასაოცრები ხართ!", - წერდა ჰოლი სმეილი.
ახლა კი ავტორი ქართველ მკითველთან პირადად შესახვედრად ემზადება. ჰოლი სმეილი საქართველოში გამომცემლობა პალიტრა L-ის მოწვევითა და „წიგნის გამომცემელთა და გამავრცელებელთა ასოციაციის“ მხარდაჭერით ჩამოდის. ავტორთან შეხვედრები 31 მაისს, 14:00 საათზე თბილისის წიგნის ფესტივალზე; ხოლო 1 ივნისს, 19:00 საათზე „ბიბლუსი გალერეაში“ გაიმართება.
იხილეთ ვიდეო
_2019-10-07_pcZAK5dDPSlBIBs.jpg)
