"ჩემი რჩეული მსოფლიოს" ფარგლებში მიგელ დე უნამუნოს ორტომეული გამოდის

გამოჩენილი ესპანელი ავტორი, მიგელ დე უნამუნო, ფელიქს დე უნამუნოსა და სალომე იუგოს ვაჟი ბილბაოს შუასაუკუნოვან ცენტრში, ბასკეთში 1864 წელს დაიბადა. წერის ორგინალური სტილით, ფორმით, აბსოლუტურად განსხვავებული პერსონაჟებით უნამუნომ საპატიო და გამორჩეული ადგილი დაიმკვიდრა ლიტერატურულ სამყაროში. მისი პერსონაჟები თითქოს გროტესკულები არიან, თითქოს არ არიან ცოცხალი ადამიანები. როგორც ფილოსოფოსი ხოსე ორტეგა ი გასეტი უნამონოზე ამბობს, მას ეტყობა, რომ ესპანური ენა აქვს ნასწავლი და ბასკია თვითონ წარმოშობით, ე.ი. ბასკურად აზროვნებს და წერს ესპანურადო.

პროექტი "ჩემი რჩეული მსოფლიოს" ფარგლებში ამჯერად, სწორედ მიგელ დე უნამუნოს ორტომეული გამოდის და ქართველ მკითხველს ერთ-ერთი საუკეთესო ავტორის ნაწარმოებების გაცნობის საშუალება ეძლევა. პირველ ტომში წარმოდგენილია მწერლის ორი რომანი „ სიყვარული და პედაგოგიკა“ და „ბურუსი“, მეორე ტომში კი,“დეიდა ტულა“ და მოთხრობები.

თავად მწერლისა და მისი ნაწარმოების შესახებ მთარგმნელი, მერი ტიტვინიძე გვესაუბრება:

უნამუნო არ ეკუთვნის არცერთ მიმართულებას, ვერცერთ ლიტერატურულ მიმართულებას ვერ დავწამებთ. თავისი ორიგინალური სტილი და ორიგინალური ფორმა აქვს მის ნაწარმოებს და აბსოლუტურად განსხვავებული პერსონაჟებით გვამახსოვრებს თავს, რომლებსაც ვერ შევხდებით ალბათ ვერსად. „სიყვარული და პედაგოგიკის“ მთავარი პერსონაჟი, მარიონეტს უფრო ჰგავს, ვიდრე ცოცხალ ადამიანს. იგი თავისი წესებით მოქმედებს და ზრდის შვილს, რომელიც უნდა იყოს აუცილებლად გენიოსი და აი, ამ თავისი ჩანაფიქრით ბავშვზე ძალადობს. თვითონ მწერალს ეკუთვნის ასეთი სიტყვები:“ერთნი წიგნებს წასაკითხად ყიდულობენ, მეორენი კი ბიბლიოთეკის შესადგენადო“... თუ წასაკითხად იყიდიან ამ წიგნს, ეს იმას ნიშნავს, რომ ძალიან რთულ პრობლემას შეეჭიდება ყველა, განსაკუთრებით რომანით პედაგოგიკა და სიყვარული. „პედაგოგიკა და სიყვარული“ არის ერთგვარი პაროდია აღზრდაზე. გარდა ამისა უნამუნოს აქვს, განსაკუთრებული სტილი, ფორმა და შინაარსი, თითქოს ცოტა ცინიკურიც არის ზოგჯერ, ენამწარეა რასაკვირველია, მაგრამ ბევრ რამეზე დააფიქრებს მკითხველს. მწერალი ცდილობს გააღვიძოს ადამიანში ადამიანური თვისებები, და არა ის, რასაც გარემო და ის ვითარება ახვევს თავს, რომელშიც ცხოვრობს.

ჩემი სტუდენტი ცხოვრობს ესპანეთში და მეუბნება, რომ დღეს ესპანეთში, თუ ვინმეს ახსენებენ, პროზაიკოსებიდან, ეს არის მიგელ დე უნამუნო და გარსია ლორკაო. შეიძლება ითქვას, რომ ეს ორი მწერალი უკვდავყო ქვეყანამ. ერთ-ერთი ინგლისელი მთარგმნელი წერდა, „დიდი დანაშაულია საკუთარი თავისა და საზოგადოების წინაშე, რომ არ იცნობდე უნამუნოსო“.

ინფორმაციისთვის, მიგელ დე უნამუნოს პირველი ტომი უკვე გამოვიდა, მეორე ტომი კი 3 მაისს გამოვა. წიგნების შეძენა მომხმარებელს ჟურნალ " გზასთან“ ერთად სპეციალურ ფასად შეეძლება.