"კრიტიკულები ვართ, მაგრამ ცუდი არავისთვის გვინდა..." - რას ეძებს ლელა წურწუმია "მხოლოდ ქართულის" კონკურსანტებში

მუსიკალურმა პროექტმა - "მხოლოდ ქართული" პირდაპირ ეთერში სტარტი 23 აპრილს, რუსთაველის თეატრიდან აიღო და პირველივე ლაივში სატელევიზიო რეიტინგების ლიდერი გახდა - შოუმ წლის ყველაზე მაღალი, 21%-იანი რეიტინგი დადო, რითაც კონკურენტ მუსიკალურ პროექტს "იქს-ფაქტორს" 7%-ით აჯობა.

პროექტის წესებით, 10 კონკურსანტი ერთმანეთს მხოლოდ ქართულ სიმღერაში შეეჯიბრა. ახლებური ინტერპრეტაციით შესრულდა ქართველი კომპოზიტორების - გოგი ცაბაძისა და ვაჟა აზარაშვილის სიმღერები. ახალი ვერსიების ავტორი მუსიკოსი ზვიად ბოლქვაძეა, რომელმაც ჯგუფ `ნიუტონთან" ერთად გაუწია აკომპანირება შოუს მონაწილეებს. პირველ ლაივზე შოუში 110 000 ზარი შევიდა.

ჟიურის შემადგენლობას ორი ახალი წევრი დაემატა - გიორგი გაბუნია და ლელა წურწუმია. შემოსული ზარების მიხედვით შეიძლება იმის თქმა, რომ მაყურებელმა ძალიან იაქტიურა და თავის ფავორიტ კონკურსანტს ზარით მხარი დაუჭირა, რის მიხედვითაც განისაზღვრა კონკურსანტების ათეულის თანმიმდევრობაც. თუმცა, პირველ დღეს "რუსთავი 2"-მა ვეტოს უფლება გამოიყენა და პროექტი არცერთ მონაწილეს არ დაუტოვებია.

პირველი ლაივის დასრულების შემდეგ, AMBEBI.GE ჟიურის ახალ წევრს, მომღერალ ლელა წურწუმიას ესაუბრა:

"კარგი იყო, ყურს სიამოვნებდა. ეს ხომ ის მუსიკაა, რომელზეც გავიზარდეთ. სამწუხაროდ, ისე მოხდა, რომ ჩვენი შვილების თაობა ქართულ სიმღერას აღარ უსმენს. შესაბამისად, შემსრულებლები, რომლებიც სხვადასხა პროექტში გამოდიან, ქართულს არ მღერიან. მაგრამ აღმოჩნდა, რომ კიდევ არიან ადამიანები, ვისაც ქართულად სიმღერა შეუძლია და ამის სურვილი აქვთ. რაც მთავარია, ვერსიები, რომლებიც გააკეთა ზვიად ბოლქვაძემ და ჯგუფმა `ნიუტონი~ შესანიშნავია, უსმენო და უხმო ადამიანსაც კი აამღერებს. ძალიან მომეწონა და ვისიამოვნე. მიხარია, რომ ჟიურის შემადგენლობაში ვარ და შემიძლია კონკურსანტები შევაფასო. შოუს მსვლელობისას ხუმრობით ვთქვი - არ ვიცი ეს ინგლისური სიმღერები, არც ტექსტი და არც მუსიკა-მეთქი, მაგრამ ქართულში ყველაფერი (მუსიკა, ტექსტი, ავტორი) ცნობილი და ახლობელია, იმდენად ჩემია, რომ მისი მოსმენა მსიამოვნებს.

- ჟიურიში სხვა დროსაც ყოფილხართ, მაგრამ პირველ `ლაივამდე~ უცნობი იყო, რომ `მხოლოდ ქართულის~ ჟიურიში ერთ-ერთი თქვენ იქნებოდით...

- ჟიურიში ყოფნა დიდი პასუხისმგებლობაა იმიტომ, რომ ჩვენი შეფასებებით, რჩევებით კონკრეტული ადამიანების ცხოვრებას ვცვლით. შეიძლება, ზოგჯერ კრიტიკულები ვართ, შეიძლება ვიღაცას მოეჩვენოს, რომ კონკურსანტებს უსამართლოდ ვექცევით, მაგრამ გვერწმუნეთ, ცუდი არავისთვის გვინდა. თან, რა ვქნათ, ასეა, ამდენი ხანი სცენაზე რომ დგახარ, ხარ აქტუალური, ამიტომაც გვიწვევენ ჟიურიში, გვენდობიან... ჩვენი მიმართულებები გვაქვს, რჩევებს იქიდან გამომდინარე ვაძლევთ და მომღერლებმა უნდა გაითვალისწინონ.

- ვფიქრობ, რომ პირველ `ლაივზე~ ჟიური არ იყო მკაცრი.

- გეთანხმებით. პირველი დღე იყო, რასაც ყოველთვის ახლავს ღელვა. ამ ადამიანებს სცენაზე დგომის გამოცდილება საერთოდ არ აქვთ, ამიტომ პირველ საკონკურსო ტურზე ისინი არ უნდა შეაშინო. ღელვა და ნერვიულობა სიამოვნებაში უნდა გადაუყვანო, რომ იმ შესრულებით ბედნიერი იყოს და ემოციებმა ნაკლებად შეაწუხოს.

- რომელია თქვენი ფავორიტი მონაწილე?

- რამდენიმე, ერთს ვერ ვიტყვი, თუმცა ვნახოთ. შეიძლება ვიღაცამ კონკრეტული სიმღერა ისე ვერ იმღეროს, მაგრამ იმღეროს სხვა სიმღერა. იმიტომ არის კონკურსი ასე, რომ მხოლოდ იმ დღის შესრულებით ვაფასებთ, მაგრამ მაინც ვერ ვივიწყებთ იმ ადამიანის განვლილ ეტაპებს და ვიცით, რისი შესაძლებლობები აქვს.

- პირადად თქვენ კონკურსანტში რას ეძებთ, რისი მოსმენა გინდათ?

- ინდივიდუალიზმი, გემოვნება, სწორი დამოკიდებულება პროფესიისადმი, რომელიც სამწუხაროდ, დღეს დეფიციტია. იმიტომაც არის, რომ ამ საქმიანობაში ვერაფერს შვრებიან. ყველანაირი მონაცემი აქვთ, მაგრამ იკარგებიან. იმიტომ, რომ პროდუქტს არ ქმნიან, საკუთარ თავზე არ მუშაობენ.

- ქრისტინე შუშაძის მიერ ნამღერი სიმღერა ვაჟა აზარაშვილის "სიმღერაა მთელი ჩემი ქონება", როგორც კი გაისმა, მაშინვე მოხდა მისი თქვენთან დაკავშირება. თუმცა, მას პირველად ნანი ბრეგვაძე მღეროდა...

- მისი პირველი შემსრულებელი ქალბატონი ნანი იყო. მერე მარინა ბერიძემ, 1999 წელს ფილარმონაში კონცერტი `XX საუკუნის 20 საუკეთესო სიმღერა~ გამართა და ერთ-ერთი სიმღერა ვაჟა აზარაშვილის და პეტრე გრუზინსკის ეს `სიმღერაა მთელი ჩემი ქონება~ იყო, რომელსაც `ვაგიფს~ ვეძახით. როდესაც ამ სიმღერაზე მუშაობას ვიწყებდი, ბატონ ვაჟას მისი დაწერის ისტორია ვკითხე. მითხრა, აზერბაიჯანიდან თბილისში დაბრუნებისას, მატარებელში დავწერეო...

- ალბათ, მისი აღმოსავლური ინტონაციაც ამის ბრალია.

- კი. 1999 წლიდან დღემდე დიდი დრო გავიდა. მაშინ შესრულებული სიმღერის არანჟირება ზურა ლალიაშვილს ეკუთვნოდა. `ვაგიფი~ მაყურებელმა, მსმენელმა, თბილად მიიღო. თუმცა ვფიქრობ, რომ რთულია მისი შესრულება. ზოგადად რთულია ბაიათისა და ქალაქური სიმღერის მღერა. ამ ჟანრში წლების წინ, ქალბატონი ცინუკი დადიანი და ინგა ფერაძე იყვნენ. მოკლედ, ურთულესია, პატარა უზუსტობაც და სიმღერა გაფუჭებულია... ასე რომ, ჟიურის კონკურსანტებისთვის ცუდი ნამდვილად არ გვინდა და ყველას წარმატებებს ვუსურვებ!

ფოტო: გვანცა მაღლაკელიძე