სერჟ სარგსიანი თანამდებობიდან გადადგა

სომხეთის პრემიერ-მინისტრი სერჟ სარგსიანი გადადგა. ამის შესახებ მის მიერ გავრცელებულ განცხადებაშია ნათქვამი.

"ნიკოლ ფაშინიანი მართალი იყო. მე შევცდი. შექმნილი სიტუაციიდან არსებობს რამდენიმე გამოსავალი. თუმცა, მე არც ერთ მათგანს არ ავირჩევ. ეს ჩემი არ არის. ვტოვებ პრემიერ-მინისტრის თანამდებობას. ქუჩის მოძრაობა ჩემი დანიშვნის წინააღმდეგია. მე ვასრულებ თქვენს მოთხოვნას: მშვიდობას და ჰარმონიას ვუსურვებ ჩვენს ქვეყანას" - ნათქვამია სარგსიანის განცხადებაში.

რადიკალური ოპოზიცია სომხეთში 13 აპრილიდან მასობრივ აქციებს იმის გამო ატარებს, რომ ქვეყნის პრემიერ-მინისტრის თანამდებობაზე ყოფილი პრეზიდენტის სერჟ სარგსიანის კანდიდატურა წარადგინეს. “უარყავი სერჟი” - რამდენიმე ათასიანი აქციები ამ სახელწოდებით ოპოზიციის ლიდერის, ნიკოლ პაშინიანის ხელმძღვანელობით მიმდინარეობდა.

აქციის მონაწილეები სარგსიანს ქვეყნისთვის ზიანის მომტან ლიდერად მიიჩნევენ, რომელმაც პრეზიდენტობის დროს, ტერიტორიები და მოქალაქეები დაკარგა. ყარაბაღის ომს ადგილობრივი მოსახლეობა სარგსიანის წარუმატებელ ნაბიჯად მიიჩნევს, რადგან ყოფილი პრეზიდენტი პოსტზე ყოფნისას, ბოლო წუთამდე გაურკვევლად სპეკულირებდა.

მრავალათასიანი აქციების მიუხედავად, 17 აპრილს სომხეთის პარლამენტმა სარგსიანი პრემიერ-მინისტრად აირჩია, ფაშინიანმა კი განაცხადა, რომ „ხავერდოვან რევოლუციას“ დაიწყებდა.

ასევე წაიკითხეთ: "უარყავი სერჟი!" - მასშტაბური აქციები სომხეთში სარგსიანის წინააღმდეგ