თელავს მწერლები ალეკო შუღლაძე და ირმა ტაველიძე ესტუმრებიან

21 აპრილს „ბიბლუსის“ ლიტერატურული ტურნეს ფარგლებში თელავს თანამედროვე ქართველი მწერლები, ალეკო შუღლაძე და ირმა ტაველიძე ესტუმრებიან და მკითხველს შეხვდებიან. “ბიბლუსისა“ და გამომცემლობა „დიოგენეს“ ამ ერთობლივ ღონისძიებაზე მწერლები ისაუბრებენ საკუთარ შემოქმედებაზე, უპასუხებენ სტუმრების შეკითხვებს და მსურველებს შესაძლებლობა ექნებათ მათგან მიიღონ ავტოგრაფი. აღსანიშნავია, რომ საღამოს განმავლობაში ალეკო შუღლაძის „გადამალვა“ და ირმა ტაველიძის 2 წიგნი: „აღმოსავლეთის გამოგონება“ და „სტალინის ნაძვები და სხვა ტექსტები“ -20%-იანი ფასდაკლებით გაიყიდება, რაც მკითხველს მისცემს დამატებით საშუალებას კიდევ უფრო უკეთესად გაეცნონ მათ შემოქმედებას.

2018 წელი წიგნის მაღაზიათა ქსელ „ბიბლუსისთვის“ განსაკუთრებულად მნიშვნელოვანია - ქართველი მკითხველის საყვარელი კომპანია 10 წლის ხდება და ამ ფაქტთან დაკავშირებით უამრავ სიახლესა და საინტერესო პროექტს სთავაზობს ერთგულ მომხმარებელს. დიდი ლიტერატურული ტურნეც სწორედ ამ სიახლეების მნიშვნელოვანი ნაწილია. ტურნეს ფარგლებში სხვადასხვა მწერალი უკვე შეხვდა მკითხველს გორში, ქუთაისში, ბათუმში, ოზურგეთსა და საქართველოს სხვა ქალაქებში. ტურნეს მიზანია ერთი მხრივ თანამედროვე ქართველი მწერლების პოპულარიზაცია, ხოლო მეორე მხრივ, რეგიონებში მცხოვრები მკითხველისთვის დამატებითი საშუალების მიცემა, რომ შეხვდნენ საყვარელ ავტორებს და მიიღონ მეტი ინფორმაცია თანამედროვე ქართული მწერლობის შესახებ.

ალეკო შუღლაძე და ირმა ტაველიძე გასულ კვირას სწორედ ამავე ტურნეს ფარგლებში ეწვივნენ გორს და შეხვდნენ იქაურ მკითხველს, ამჯერად კი თელავის მოსახლეობის განსაკუთრებული თხოვნით მწერლები სწორედ ამ ისტორიულ ქალაქს ესტუმრებიან. მათთან შეხვედრა 21 აპრილს, 16:00 საათზე გაიმართება თელავში მდებარე „ბიბლუსი გალერეაში“, რომელიც სააკაძისა და ბახტრიონის ქუჩების კვეთაზე მდებარეობს.