სად გაწყდება რუსეთ-ამერიკის მოთმინების ძაფი სირიაში?

ამერიკის პრეზიდენტის დონალდ ტრამპის განცხადებით, ამერიკას აქვს ბევრი ვარიანტი, რათა სირიაში ქიმიური იარაღის გამოყენებას სამხედრო პასუხი გასცეს... რამდენიმე საათის წინ კი, დასავლურ მედიაში ვრცელდებოდა ინფორმაცია, თითქოს ამერიკის მთავრობამ ასადის რეჟიმს 24 საათიანი ულტიმატუმი წაუყენა, რომლის თანახმადაც, სირიის არმიამ იარაღი უნდა დაყაროს, მთავრობა კი ოპოზიციურ სირიის თავისუფალ არმიას ჩაბარდეს. წინაღმდეგ შემთხვევაში, ამერიკა სირიის სამთავრობო ობიექტებზე სარაკეტო დარტყმას განახორციელებს და ასადის მთავრობა მუამარ კადაფის ბედს გაიზიარებს.

ჰუმანიტარული ორგანიზაციების ინფორმაციით, 7 აპრილს, სირიის სამთავრობო ძალების ალყაში მყოფი, აღმოსავლეთ ღუტის რაიონის ქალაქ დუმაში გამოიყენეს ქიმიური იარაღი, რომელსაც ასზე მეტი ადამიანის სიცოცხლე ემსხვერპლა.

სამხედრო, მიმომხილველის ვოლფგანგ ჰანსონის შეფასებით, სირიაში ქიმიური იარაღის გამოყენება კიდევ ერთხელ ადასტურებს, რომ ასადი ფაქტობრივად, დარწმუნებულია, რომ მას ვერავინ შეაჩერებს. მისივე თქმით, ამერიკის პრეზიდენტმა ჯერ კიდევ რამდენიმე დღის წინ გააკეთა განცხადება, რომ თუ ასადი უახლოეს დროში არ დატოვებდა სირიას, მაშინ უფრო მკაცრ მოქმედებებზე გადავიდოდა.

"თუმცა, თუ ტრამპი მასიურ მოქმედებებზე გადასვლას აპირებს, მაშინ ის ძალიან რისკავს..."- წერს ჰანსონი.

მან გასული წლის შემთხვევაც გაიხსენა, როდესაც ხან შეიზუნის პროვინციაში ასევე ქიმიური იარაღის გამოყენებას ასეულობით ადამიანი შეეწირა. მაშინ ტრამპმა საპასუხოდ, სირიის სამხედრო აეროდრომი დაბომბა.

"ასეთ მძიმე სიტუაციაში, თითქოს ბაშარ ასადი გრძნობს, რომ ამ ომში გამარჯვება ახლოა. თუმცა რას ეყრდნობა მისი იმედი, გაურკვეველია... დიქტატორმა, ამ 5-წლიანი ომის განმავლობაში, ქიმიური იარაღი რამდენჯერმე გამოიყენა. უამრავი კრიტიკის, საერთაშორისო ოგრანიზაციების პროტესტისა და წინააღდეგობის მიუხედავად, ის მაინც ინარჩუნებს პოზიციას.

ასადის რეჟიმი და რუსეთი მუდმივად უარყოფენ ინფორმაციას ქიმიური იარაღის გამოყენების შესახებ. ის, რომ სირიელი დიქტატორი განაგრძობს დანაშაულის ჩადენას, კიდევ ერთხელ ადასტურებს, რომ რისკები ჯერ კიდევ არსებობს, იქამდე, ვიდრე მას ხელს არ ჩაავლებენ და ჰააგის წინაშე არ წასდგება" – წერს სამხედრო მიმომხილველი.

სხვა საკითხია, რამდენად და რის ფასად არის ეს შესაძლებელი. ერთადერთი, რისიც მას ახლა რეალურად უნდა ეშინოდეს, არის ამერიკის, ისრაელის ან თუნდაც სხვა სახელმწიფოების საჰაერო თავდასხმა, რომელიც მისკენ ან სირიის არმიისკენ არის მიმართული.

"ვითარებას ართულებს ის, რომ ტრამპი ინსტიქტურად მოქმედებს და ამის ნათელი მაგალითი იყო ხან-შეუხუნის ფაქტის შემდეგ მისი საპასუხო ნაბიჯი - ღირსია, დაუნდობელმა ასადმა ამაზე პასუხი ძვირად აგოს," – დაწეერა მან სოციალური ქსელში.

სამხედრო მიმომხილველის თქმით, იმ შემთხვევაში, თუ ტრამპი მასიურ სარაკეტო დაბომბვას დაიწყებს და ამ შეტაკებისას რუსეთის შეიარაღებული ძალების სამხედროებიც დაზარალდებიან, მაშინ რუსეთი მათ უპასუხებს... ეს კი ნიშნავს, რომ სირიაში ამერიკასა და რუსეთს შორის ღია სამხედრო კონფრონტაცია დაიწყო, მოსალოდნელი შედეგების განსაზღვრა კი რთულია.

რუსული მედიის ცნობით, იმ შემთხვევაში, თუ ამერიკა მართლაც წავიდა სარაკეტო დარტყმებზე, საინტერესოა, რა პოზიციას დაიკავებს რუსეთი, რომელიც ასადს ზურგს უმაგრებს.

"რადიო თავისუფლების" ცნობით, რუსეთის საგარეო საქმეთა მინისტრის სერგეი ლავროვის განცხადებით, 10 აპრილს მოსკოვი გაეროს უშიშროების საბჭოს შესთავაზებს რეზოლუციის პროექტის საკუთარ ვარიანტს, დუმაში ქიმიური იარაღის სავარაუდო გამოყენების გამოსაძიებლად. 9 აპრილს, აშშ-მა გაეროს უშიშროების საბჭოს რეზოლუციის პროექტი წარუდგინა, რომელიც მოითხოვს სირიის ქალაქ დუმაში ქიმიური იარაღის გამოყენების დამოუკიდებელ გამოძიებას.