ხანშიშესული წყვილი, რომელმაც ერთმანეთი უფასო სასადილოში გაიცნო, 8 თვეა მახინჯაურში კარავში ცხოვრობს

ბათუმში, მახინჯაურის დასახლებაში ხანშიშესული ქალი და მამაკაცი ღია ცის ქვეშ ქსოვილებით გაკეთებულ კარავში 8 თვეა ცხოვრობს. როგორც ისინი ყვებიან, ერთმანეთი უფასო სასადილოში გაიცნეს და მას შემდეგ ერთად ცხოვრობენ. წყვილს საცხოვრებელი ფართი არ გააჩნია და როგორც ამბობენ აჭარაში წლების წინ ოზურგეთიდან ჩავიდნენ.

"8 თვეა ამ პირობებში ვცხოვრობთ, ჩვენი მდგომარეობის შესახებ ადგილობრივი მთავრობა ინფორმირებულია, თუმცა ყურადღება არ მოგვაქციეს. შემოსავლის წყარო არ გვაქვს, პენსიას ვღებულობთ. უფასო სასადილოთი ვსარგებლობთ. წვიმიან და თოვლიან ამინდში ასეთ პირობებში ვათენებთ ღამეს. გუშინ რომელიღაცა უწყებიდან ორი გოგონა იყო ჩვენთან მოსული და გვითხრეს, რომ თავშესაფარში წაგიყვანთო. ნამდვილად წაგვიყვანს თუ არა, არ ვიცი...

არ მინდა გამოვჩნდე, ჩემი ოჯახის წევრების მეშინია, არ მოვიდნენ აქ. ოზურგეთში ვცხოვრობდი და საკუთარმა რძალმა გამომაგდო. მას შემდეგ აჭარაში, ასე ღია ცის ქვეშ ვცხოვრობ. ვიდრე აქ კარავს გავშლიდი, ზღვის სანაპიროზე ვცხოვრობდი. მინდა სახლი მქონდეს.." - გვეუბნება შუახნის ქალბატონი.

მახინჯაურში ბათუმის მერიის წარმომადგენელი გოგიტა დარჩია ამბობს, რომ აღნიშნული პირები ბათუმის ტერიტორიაზე პერიოდულად სხვადასხვა ადგილზე გადაადგილდებიან და ცხოვრობენ. მისივე განცხადებით, ისინი საკვებს უფასო სასადილოდან იღებენ. დარჩიას ინფორმაციით, წყვილს საცხოვრებლით ვერ დააკმაყოფილებენ, ვინაიდან ისინი აჭარაში რეგისტრირებული არ არიან.