როგორ ქურდავენ მაღაზიებს არასრულწლოვანები თბილისში? - "პალიტრანიუსი" სათვალთვალო კამერების ექსკლუზიურ ჩანაწერებს აქვეყნებს

ბოლო პერიოდში 14 წლამდე ასაკის ბავშვების მიერ ჩადენილი დანაშაულის შემთხვევებმა საგრძნობლად იმატა. მაღაზიები, აფთიაქები, ოფისები და ავტომობილები მათი ძარცვის ძირითადი ობიექტებია, რასაც სათვალთვალო კამერებიც აფიქსირებს. ტელეკომპანია "პალიტრანიუსი" არასრულწლოვნების მიერ მაღაზიების გაქურდვის ამსახველ ვიდეომასალას ავრცელებს. ვიდეოებში ჩანს, როგორ მიდის ორი არასრუწლოვანი მაღაზიასთან, ერთ-ერთი სახრახნისით ხსნის კარს და სალაროდან ფული მიაქვს, მეორე კი მას გარეთ ელოდება. ბოლო თვეების განმავლობაში არასრულწლოვნების მიერ სავაჭრო ობიექტების ძარცვის არაერთი ფაქტი დაფიქსირდა.

არაოფიციალური ინფორმაციით, წელს მხოლოდ თბილისში 50-მდე მსგავსი შემთხვევა მოხდა. არასრულწლოვნები იპარავენ სუპერმარკეტებში, ტანსაცმლისა და ტექნიკის მაღაზიებში და სხვაგან, რაც ზოგჯერ დღის საათებში ხდება.

იმის გათვალისწინებით, რომ 14 წლამდე მოზარდებზე სისხლისსამართლებრივი პასუხისმგებლობა არ ვრცელდება, მოსახლეობის ნაწილი პრობლემის მოგვარებას კანონის გამკაცრებაში ხედავს. ხელისუფლებაში კი აცხადებენ, რომ ამ ეტაპზე კანონის გადახედვა არ იგეგმება, რასაც იურისტებიც გამართლებულად მიიჩნევენ, რადგან, მათი აზრით, არასრულწლოვნებში სადამსჯელო ღონისძიება გამოსავალი ვერ იქნება და მოგვარების გზებს სხვა მიმართულებით ხედავენ.

არასრულწლოვანთა დანაშაული რომ გახშირებულია, ამას შს მინისტრიც აღნიშნავს. გიორგი გახარიას თქმით, არასრულწლოვანთა კოდექსმა, რომელიც 2016 წლის პირველ იანვარს ამოქმედდა, გარკვეული შედეგები გამოიღო, თუმცა 14 წლამდე მოზარდებში დანაშაული გაზრდილია.

წაიკითხეთ ასევე:

• 14 წლამდე ასაკის ქურდები - 50-მდე ფაქტი ბოლო ორ თვეში
• შსს-მ დაადგინა ჯგუფები, რომლებიც დანაშაულის ჩამდენი, 14 წლამდე მოზარდების უკან დგანან
• "ერთს მაგრად გაუმართლა, ავტოგასამართი სადგურიდან 33 000 წამოიღო" - რას ჰყვება არასრულწლოვანი, რომელიც წლებია თავს ქურდობით ირჩენს
• ზუგდიდში მოზარდმა სილამაზის სალონიდან მაკრატლები, თმის საშრობი და სხვა წვრილმანი ტექნიკა მოიპარა
• სამმა არასრულწლოვანმა თბილისში კლინიკა "მედი" გაქურდეს