პუტინის რიგით მეოთხე არჩევნები და "ომის პრეზიდენტის" მმართველობის წლებში დაღუპული ადამიანები

რუსეთში უკვე მეოთხედ პრეზიდენტად ვლადიმერ პუტინი აირჩიეს. ეგზიტპოლის შედეგების თანახმად, წინასწარი მონაცემებით, მან ამომრჩეველთა ხმების 73,9% მიიღო. მეორე ადგილზე "კომუნისტების" კანდიდატი პაველ გრუდინინი (11,2%), ხოლო მესამე ადგილზე "ლიბერალ-დემოკრატიული პარტიის" ლიდერი ვლადიმერ ჟირინოვსკი (6,7%) გავიდა. აღსანიშნავია, რომ ტელეჟურნალისტმა ქსენია სობჩაკმა ამომრჩეველთა ხმების 2,5% მიიღო, რაც მეოთხე ადგილია.

თითქმის არავის ჰქონდა მოლოდინი, რომ არჩევნები სხვა შედეგით დასრულდებოდა. ცოტა ხნის წინ, BBC.com-ის რუსულმა სამსახურმა თავის სპეცპროექტში ჩაწერა 6 სრულწოვანი ახალგაზრდა, რომლებიც პუტინის გაპრეზიდენტების წელს დაიბადნენ და მისი მმართველობის პერიოდში გაიზარდნენ - მათგან მხოლოდ ერთს აქვს პროტესტი, რომ ამ წლების განმავლაბაში ქვეყანაში არაფერი შეცვლილა და ისიც, სავარაუდოდ, იმიტომ, რომ დედამისი ალექსეი ნავალნის შტაბის აქტივისტია, რომელსაც რუსეთის სასამართლომ არჩევნებში მიღების სარჩელი არ დაუკმაყოფილა.

ერთი სიტყვით, ვლადიმირ პუტინს არჩევნებში რეალური მეტოქე არ ჰყავს. “ომის პრეზიდენტი” – ასე უწოდებს მას დასავლური მედია, რომლის შეფასებითაც, „ომი მისი ლეგიტიმურობის წყაროა. ომის პერიოდის პრეზიდენტების პრობლემა ისაა, რომ ისინი არ ტოვებენ პოსტს და მხარდაჭერის შენარჩუნებისთვის ომები სჭირდებათ“, - წერენ დასავლური გამოცემები.

დიახ, პუტინი ამ ყველა კრიტერიუმს აკმაყოფილებს. Inosmi.ru აქვეყნებს იმ კრიტიკოსების სიას, რომლებიც გარდაიცვალნენ ან მოკლეს გაურკვეველ ვითარებაში.

2003 წელს არმიის ყოფილი პოლკოვნიკი სერგეი იუშენკოვი მოკლეს. მან პოლიტიკურ პარტია “ლიბერალურ რუსეთში” მხოლოდ დარეგისტრირება მოასწრო. მას საკუთარ სახლში ესროლეს, რადგან პარლამენტის რეპორტიორად ჯერ კიდევ 1990-იანი წლებიდან მუშაობდა და არსებული ინფორმაციით, იმ ბრძანებების მოპოვებას ცდილობდა, რომლის შედეგადაც 1999 წელს რუსეთის ქალაქებში საცხოვრობელი სახლები ფეთქდებოდა.

ასევე 2003 წელს ჟურნალისტი იური შეკოჩიხინი მოკლეს, რომელიც ასევე 90-იანი წლებში, პუტინის გაპრეზიდენტებამდე საცხოვრებელი სახლების აფეთქების საქმეს იძიებდა. 2003 წელს მას მოულოდნელად გაურკვეველი ავადმყოფობა გამოუვლინდა და რამდენიმე დღეში გარდაიცვალა. არადა, ამერიკაში წასვლას აპირებდა. რუსეთის ხელისუფლება მის სამედიცინო ისტორიას დღემდე ასაიდუმლოებს.

2006 წელს მოკლული ანა პოლიტკოვსკაიას საქმე მსოფლიოში ძალზე გახმაურებული საქმეა. თავის წიგნში “პუტინის რუსეთი”, მან კრემლის ლიდერი ქვეყნის დანგრევასა და პოლიციურ სახელმწიფოდ გადაქცევაში დაადანაშაულა. ის ასევე ბევრს წერდა კრემლის მიერ ჩეჩნეთში გაკეთებულ დანაშაულებრივ საქმიანობაზე.

მასაც სახლთან ახლოს ლიფტში ესროლეს და მის მკვლელობაში 5 ადამიანი დაანადაშაულეს, თუმცა, შემდეგ სასამართლო შეთანხმდა, რომ ეს შეკვეთილი მკვლელობა იყო, რომელშიც 150 ათასი დოლარი გადაიხადეს, თუმცა, ვინ “არ იყო ცნობილი”. პუტინმა მკვლელობაში მონაწილეობა კატეგორიულად უარყო.

2006 წელს ლონდონში რუსეთის სპეცსამსახურის ყოფილი თანამშრომელი, "ФСБ взрывает Россию"-ის ავტორი ალექსანდრე ლიტვინენკო გარდაიცვალა. სკოტლენდ-იარდი მისი სიკვდილის გარემოებებს წლების განმავლობაში იძიებდა, თუმცა, დადასტურებული ფაქტები ჯერ კიდევ არ აქვთ: ლიტვინენკო რადიოაქტიური პოლონიუმ-210-ით მოწამლეს, რომელიც მას სასტუმრო “მილენიუმში” ანდრეი ლუგოვოისთან შეხვედრისას, ჩაიში ჩაუყარეს. ფაქტი კლასიფიცირდება, როგორც მკვლელობა. საქმე ის არის, რომ ლინტვინენკო, სპეცსამსახურებიდან წასვლის შემდეგ, პუტინს ხშირად აკრიტიკებდა. მისი თქმით, პუტინის ბრძანებით, რუსეთში 1999 წელს საცხოვრებელი სახლები აფეთქდა, რასაც ასობით ადამიანი ემსხვერპლა; ასევე, ლიტვინენკო საუბრობდა ჩეჩნეთში პუტინის ბრძანებით გაკეთებულ საქმეებზე, ჩეჩნეთის მეორე ომის დროს. ლიტვინენკოს თქმით, პუტინის ბრძანებით მოკლეს ანა პოლიტკოვსკაია.

2009 წელს სტანისლავ მარკელოვი და ანასტასია ბაბუროვა მოკლეს. მარკელოვი, რომელიც ადამიანის უფლებათა დაცვის მიმართულებით ადვოკატი იყო, ჩეჩნეთის ომში რუსეთის შეიარაღებული ძალების მიერ ჩადენილ საქმეებს სწავლობდა. ასევე, თავის სტატიებში მწვავედ აკრიტიკებდა პუტინს 2006 წელს მოკლული ანა პოლიტკოვსკაიას გამო. მას კრემლთან ახლოს, ნიღბიანმა ადამიანმა ესროლა. ბაბუროვი კი მაშინ მოკლეს, როდესაც ის მის დახმარებას ცდილობდა. ოფიციალური ინფორმაციით, მათი მკვლელობის უკან ნეონაცისტური ჯგუფი იდგა.

2009 წლის ნოემბერში იურისტი სერგეი მაგნიტსკი პატიმრობაში მოკვდა, სადაც ის სიკვდილმადე სცემეს და სამედიცინო დახმარებაც კი არ გაუწიეს. ის ბრიტანელ-ამერიკელ ბიზნესმენთან უილიამ ბრაუდერთან ადვოკატად მუშაობდა და გადასახადების კორუფციულ სქემას სწავლობდა.

მაგნიტსკის 2008 წელს წაუყენეს ბრალად გადასახადების გადაუხდელობა - მას შემდეგ, რაც მან გამოააშკარავა 230 მილიონი დოლარის მოცულობის საგადასახადო მაქინაციების კორუფციული სქემა, რომელშიც რუსეთის პოლიციისა და მთავრობის წარმომადგენლები მონაწილეობდნენ.

მაგნიტსკის 11-თვიანმა დაკავებამ და შემდეგ, 2009 წელს ციხეში მისმა სიკვდილმა საერთაშორისო მასშტაბის სკანდალი გამოიწვია. აშშ-მა საქმესთან დაკავშირებულ რუსეთის ოფიციალურ პირებს სანქციებიც დაუწესა.

2009 წელს მოკლული ჟურნალისტი ნატალია ესტემიროვა ჩეჩნეთში განხორციელებულ გატაცებისა და მკვლელობის საქმეებს იძიებდა, რომლებსაც იქ პრორუსული ძალები ახროციელებდნენ. ისევე, როგორც ანა პოლიტკოვსკაია, ისიც ღიად ჰყვებოდა იმ პირებზე, ვინც ამას აკეთებდა. ესტემიროვა მაშინ გაიტაცეს, როდესაც თავის სახლთან იყო მისული, მას რამდენჯერმე თავში ესროლეს და ტყეში დატოვეს. ამ საქმეზე არავინ დასჯილა...

2013 წელს ბორის ბერეზოვსკის, მაგნატს, რომელიც 1990-იანი წლებიდან ბორის ელცინის უახლოეს გამორეცვაში იყო და პუტინის დაწინაურებაში დიდი როლი ითამაშა, შემდეგ წლებში გავლენა თანდათან შეუმცირეს. შემდეგ მას პუტინთან კონფლიქტიც დაეწყო, რის შედეგადაც, ქვეყნიდან წავიდა და დიდ ბრიტანეთში გადასახლდა. იქ მუდმივად აცხადებდა, რომ დაზვერვის ყოფილი ოფიცერი ალექსანდრე ლიტვინენკო პუტინის ბრძანებით მოწამლეს.

ბორის ბერეზოვსკი საკუთარი სახლის აბაზანაში გარდაცვლილი იპოვეს. თავდაპირველად, თვითმკვლელობის ვერსია გავრცელდა, რაც შემდეგ გამოირიცხა, თუმცა მაგნატის სიკვდილის მიზეზი დღემდე დაუდგენელია.

2015 წელს მოკლეს ბორის ნემცოვი, რომელიც 1990-იანი წლებიდან “ახალგაზრდა რეფორმატორების” პოლიტიკური ვარსკვლავი იყო და 2000-იან წლებში, გარკვეული დროის განმავლობაში მას რუსეთის მომავალ ლიდერსაც უწოდებდნენ.

ბორის ნემცოვს რუსული მედია დასავლეთის მიერ მხარდაჭერილ ლიდერად აღიქვამდა და იმედი ჰქონდა, რომ რუსეთის პოლიტიკურ ცხოვრებაში მნიშვნელოვან ცვლილებებს შეიტანდა. ის წერდა კრიტიკულ სტატიებს რუს მაღალჩინოსნებზე და მრავალათასიან აქციებსაც მართავდა. ასევე, აკრიტიკებდა რუსეთის ხელისუფლებას უკრაინის მიმართ რუსეთის მიერ განხორციელებული ქმედებების გამო. 2015 წლის თებერვალში მას 4 ტყვია ესროლეს ზურგში და ადგილზე დაიღუპა. პუტინის განცხადებით, ეს მკვლელობა “პირად კონტროლზე აიყვანა”, თუმცა, დღემდე არავინ დასჯილა.

და მაინც, 2018 წლის 18 მარტს რუსეთის მოსახლეობა ვლადიმირ პუტინს მეოთხე ვადით ირჩევს...