ბრიტანეთში რუსი ოფიცერი და მისი ქალიშვილი მოწამლეს - რუსეთი ჯაშუშებს აფრთხილებს?

დიდ ბრიტანეთში, ქალაქ სოლსბურიში, რუსეთის დაზვერვის ყოფილი ოფიცერი, 66 წლის სერგეი სკრიპალი შვილთან, 33 წლის იულიასთან ერთად, ერთ-ერთ სავაჭრო ცენტრში შეუძლოდ გახდა, რის შემდეგაც, ორივე საავადმყოფოში გადაიყვანეს და რეანიმაციაში მოათავსეს... თავდაპირველი ვერსიით, ისინი სავაჭრო ცენტრში სადეზინფექციო სამუშაოების ჩატარების შედეგად მოიწამლნენ, თუმცა, შემდეგ გავრცელდა ცნობები, რომ ისინი მიზანმიმართულად მოწამლეს.

სამართალდამცველები ეჭვობენ, რომ მამა-შვილი უცნობი ნივთიერებით მოწამლეს, თუმცა ტოქსიკოლოგიური კვლევის პასუხები უახლოეს დღეებში იქნება. არადა, როგორც BBC წერს, შესაძლოა, ამ ფაქტის შემდეგ, დიდ ბრიტანეთსა და რუსეთს შორის პოლიტიკური კრიზისი გამწვავდეს.

იმ შემთხვევაში, თუ სკირპალების მოწამვლაში რუსულ კვალს იპოვიან, დიდი ბრიტანეთის საგარეო საქმეთა მინისტრი, ბორის ჯონსონი, რუსეთის მიმართ “მკვეთრი და ძლიერი” საპასუხო ქმედების განხორციელებას გეგმავს. მისივე თქმით, თუ ამაში რუსეთის ჩარევა დადასტურდა, უკვე რთული წარმოსადგენია, რამდენად შეიძლება ჩაიაროს დიდი ბრიტანეთის დასწრებამ ფეხბურთის მსოფლიო ჩემპიონატზე რუსეთში (საუბარია, ოფიციალური დელეგაციაზე და არა ფეხბურთის ნაკრებზე). ბრიტანელი მინისტრის განცხადებით - ის თითს არავისკენ იშვერს, მაგრამ არც იმის თქმას ერიდება, რომ “რუსეთი არის ზიანის მომტანი და დამანგრეველი ძალა”.

გამოცემის ცნობით, - სერგეი სკრიპალისა და მისი ქალიშვილის სავარაუდო მოწამვლის შემდეგ, ადგილობრივმა მედიამ კიდევ ერთხელ წამოსწია რუსეთის დაზვერვის ასევე ყოფილი ოფიცრის, ალექსანდრე ლიტვინენკოს პოლონიუმით მოწამვლა, რაც ფატალურად დასრულდა.

მას შემდეგ, რაც რუსეთში დარჩენა მისთვის სახიფათო იყო, ლიტვინენკომ 2006 წელს ბრიტანეთს შეაფარა თავი, თუმცა, იქიდან პუტინის კრიტიკას განაგრძობდა... შემდეგ, ის პოლონიუმით მოწამლეს და გარდაიცვალა. ბრიტანეთში ჩატარებულმა გამოძიებამ დაადგინა, რომ ლიტვინენკო რუსეთის ფედერალური უსაფრთხოების სამსახურმა - ФСБ-მ მოიცილა.

ცნობისთვის, 1951 წელს დაბადებული სერგეი სკრიპალი, დიდი ხნის განმავლობაში რუსეთის მთავარ სადაზვერვო უწყებაში მსახურობდა, შემდეგ კი, მან სამსახური პოლკოვნიკის წოდებით დატოვა. რამდენიმე წლის განმალობაში, რუსეთის საგარეო საქმეთა სამინისტროში, საქმეთა მწარმოებლად მუშაობდა.

2004 წელს, ФСБ-მ ის ბრიტანეთის სასარგებლოდ ჯაშუშობისთვის გაასამართლა. მას სახელმწიფო ღალატში დასდეს ბრალი. სკრიპალისთვის წარდგენილი ბრალდების თანახმად, ის ბრიტანეთისთვის ჯერ კიდევ 1995 წლიდან მუშაობდა და დაზვერვის სამსახურიდან წასვლის შემდეგაც კი, ძველი საიდუმლო კავშირების საშუალებით, მათ საიდუმლო ინფორმაციებს გადასცემდა... ერთი სიტყვით, სკრიპალს, 13-წლიანი პატიმრობა მიუსაჯეს. თუმცა, 2010 წელს ამერიკის გამოძიების ფედერალურ ბიუროსთან (FBI) მოლაპარაკების შედეგად, ჯაშუშობისთვის გასამართლებულ სამ სხვა პირთან ერთად გაათავისუფლეს. მაშინ FBI-მ რუსეთის 10 ჯაშუში გაათავისუფლა. სკრიპალმა რუსეთი გათავისუფლებისთანავე დატოვა, რის შემდეგაც, ოჯახთან ერთად საცხოვრებლად დიდ ბრიტანეთში გადასახლდა.

იულია სკრიპალი, რომელიც მამასთან ერთად მოწამლეს

BBC-ის ცნობით, სკრიპალის ახლო გარემოცვის განცხადებით, ის ყოველთვის შიშობდა, რომ ოდესმე “რუსეთიდან მოაკითხავდნენ”. მათივე თქმით, - სკრიპალის ცოლი და ძმა ბოლო ორი წლის განმავლობაში, საეჭვო ვითარებაში დაიღუპნენ. ოფიცრის 43 წლის შვილი კი, ახლახან, სანკტ-პეტერბურგში მოგზაურობისას ასევე გაურვეველ ვითარებაში გარდაიცვალა.

ბრიტანეთი აცხადებს, რომ ადგილობრივი შესაბამისი სამსახურები აუცილებლად გამოიძიებენ სკრიპალის შესაძლო მოწამვლის საქმეს. ახლა ექსპერტებისთვის მთავარია, დაადგინონ, არის თუ არა ყოფილი ოფიცრისა და მისი ქალიშვილის ორგანიზმში საწამლავის კვალი და რამ შეიძლება მათი ჯანმრთელობის გაუარესება გამოიწვიოს...

თავის მხრივ, რუსეთის პრეზიდენტმა უცხოეთის დაზვერვიდან 400 აგენტის შესახებ გააკეთა განაცხადა. მან სპეცსამსახურებს, ФСБ-ს უბრძანა, გაარკვიონ, როგორ ახერხებენ ისინი პოლიტიკურ, ეკონომიკურ და თავდაცვით უწყებებში შეღწევას და ინფორმაციის მიღებას... მისივე თქმით, ბოლო ხანებში რუსეთში უცხოელი აგენტები მომრავლდნენ და ისინი აგენტურის თანამედროვე მეთოდებს იყენებენ.