ბოლო წლების ყველაზე მასშტაბური ხანძრები ბაზრობებზე - გამოძიებულია თუ არა საქმეები?

რამდენიმე დღის წინ, თევდორე მღვდლის ქუჩაზე სავაჭრო ცენტრ „თერგში“ მომხდარმა მასშტაბურმა ხანძარმა, საზოგადოებას უახლოეს წარსულში მომხდარი მსგავსი მოვლენები კიდევ ერთხელ შეახსენა. გამოძიება სისხლის სამართლის კოდექსის 187-ე მუხლის მეორე ნაწილით მიმდინაროებს - ნივთის დაზიანება ან განადგურება ჩადენილი ცეცხლის წაკიდებით, აფეთქებით ან სხვა საყოველთაოდ საშიში საშუალებით, რაც ისჯება თავისუფლების აღკვეთით ვადით სამიდან ხუთ წლამდე.

ყოველი მასშტაბური ხანძრის შემდეგ, საზოგადოება მომხდარის ობიექტურ და სწრაფად გამოძიებას მოითხოვს და ჩინოვნიკებისგან შესაბამის დაპირებასაც იღებს, თუმცა, რეალურად გამოძიებულია თუ არა დიდი ხანძრების საქმეები? - AMBEBI.GE-მ გადაამოწმა, რა ეტაპზეა ბოლო წლებში ბაზრობებზე მომხდარი ხანძრების საქმეები.

ხანძრების ქრონოლოგიასა და მათ გარშემო მიმდინარე საგამოძიებო პროცესებს შინაგან საქმეთა სამინისტროს ინფორმაციაზე დაყრდნობით წარმოგიდგენთ.

ფოთის ცენტრალური ბაზარი - 2017 წლის 10 ივლისი

შსს-ს ინფორმაციით, ხანძართან დაკავშირებით საქმეზე ჩატარებულია რიგი საგამოძიებო მოქმედებები და 187-ე მუხლის მეორე ნაწილით მიმდინარეობს გამოძიება.

ხანძარი "ელიავას ბაზრობაზე" - 2017 წლის 2 ივლისი

ხანძრის შედეგად დაიწვა ავტონაწილების ბაზრობის 2 სექტორი. შსს-ს ინფორმაციით, გამოძიება მიმდინარეობს 178-ე მუხლის მე-3 ნაწილით (ნივთის დაზიანება ან განადგურება ცეცხლის წაკიდებით, რამაც მძიმე შედეგი გამოიწვია). უწყებაში განმარტავენ, რომ ჩატარებულია ყველა სახის ექსპერტიზა და გამოძიება რამდენიმე სახის ექსპერტიზის პასუხს ელოდება.

სავაჭრო ცენტრი - "ბავშვთა სამყარო" - 2017 წლის 30 იანვარი

სავაჭრო ცენტრი „ბავშვთა სამყარო“ ძლიერმა ხანძარმა, რომელსაც მეხანძრეები რამდენიმე დღის განმავლობაში ებძოდნენ, თითქმის სრულად გაანადგურა. ცეცხლის ჩაქრობის სამუშაოების დასრულების შემდეგ მოვაჭრეთა ნაწილმა საკუთარი პროდუქციის გამოტანა შეძლო, თუმცა ნაწილის საქონელი, როგორც თავად იუწყებიან, სრულად დაიწვა.

როგორც შინაგან საქმეთა სამინისტრო იუწყება, „ბავშვთა სამყაროში“ გაჩენილ ხანძართან დაკავშირებით გამოძიებას პროკურატურა ამ დრომდე აწარმოებს, შესაბამისად, შედეგები ჯერჯერობით ცნობილი არ არის.

"ელიავას ბაზრობა" - 2015 წლის 4 აგვისტო

მომხდარს 2 ადამიანის სიცოცხლე ემსხვერპლა. შსს-ს ინფორმაციით, ცეცხლი საღებავების საწყობს გაუჩნდა, გამომწვევი მიზეზების დასადგენად კი გამოძიება 187-ე მუხლის მე-3 ნაწილით ამ დრომდე მიმდინარეობს. საგამოძიებო უწყების ცნობით, ამ ეტაპზე ექსპერტიზის პასუხების მხოლოდ ნაწილია ცნობილი.

ისნის ბაზრობა - 2015 წლის 21 იანვარი

ხანძრის შედეგად ბაზრობაზე 25 მაღაზია განადგურდა, მომხდართან დაკავშირებით სისხლის სამართლის კოდექსის 187-ე მუხლის მე-2 ნაწილით გამოძიება უკვე სამი წელია მიმდინარეობს.

ე.წ ბოშათა ბაზარი - 2014 წლის 16 სექტემბერი

თითქმის 4 წელი გავიდა ე.წ ბოშათა ბაზარში მომხდარი ხანძრის შემდეგ, რომელსაც არამარტო მატერიალური, ადამიანური მსხვერლიც მოჰყვა. ცეცხლი 2 500 კვ. მეტრზე გავრცელდა და 3 ადამიანის სიცოცხლე იმსხვერპლა.

როგორ შსს იუწყება, საქმეზე გამოძიება სისხლის სამართლის კოდექსის 187-ე მუხლის მე-3 ნაწილით გრძელდება, რაც გულისხმობს ნივთის განადგურებას ან  დაზიანებას ჩადენილს ცეცხლის წაკიდებით, აფეთქებით ან სხვა საყოველთაოდ საშიში საშუალებით, რამაც გაუფრთხილებლობით ორი ან მეტი ადამიანის სიცოცხლის მოსპობა გამოიწვია. გამოძიების შედეგები ჯერჯერობით ცნობილი არ არის.

სავაჭრო ცენტრი "საბა" - 2013 წლის 26 თებერვალი

"საბაში" ხანძარი 5 000 კვადრატულ მეტრზე გავრცელდა, რის შედეგადაც 100-ზე მეტი მაღაზია განადგურდა, მოვაჭრეებმა კი ათი ათასობით ლარის ზარალი მიიღეს.

როგორც შს სამინისტროდან იუწყებიან, ხანძრის ფაქტზე სისხლის სამართლის კოდექსის 187-ე მუხლის მე-2 ნაწილით გამოძიება ამჟამადაც მიმდინარეობს. გამოძიების ფარგლებში ჩატარდა რამდენიმე ექსპერტიზაც.

"ლილო" - 2012 წლის 15 ნოემბერი

"ლილოს" ბაზრობაზე ძლიერმა ხანძარმა 450 კვ.მ ფართობზე განთავსებული ობიექტები გაანადგურა. როგორც შსს-დან გამოთხოვილი ინფორმაციიდან ირკვევა, ზარალმა ნახევარ მილიონ ლარს მიაღწია. აღნიშნულ ფაქტთან დაკავშირებით გამოძიება სისხლის სამართლის კოდექსის 187-ე მუხლის მე-2 ნაწილით მიმდინარეობს.

როგორც ხედავთ, შსს-ს მონაცემებზე დაყრნობით, ამ ეტაპზე ყველაზე მასშტაბური ხანძრებიდან არცერთი მათგანის გამოძიების შედეგები ჯერჯერობით ცნობილი არ არის. AMBEBI.GE-სთვის კულუარულად გახდა ცნობილი, რომ "თერგში" მომხდარი ხანძრის შემდეგ, შს სამინისტროში დაძაბული შეხვედრა შედგა მინისტრ გახარიასა და საგამოძიებო უწყებების ხელმძღვანელ პირებს შორის. არსებული ინფორმაციით, შს მინისტრმა სავაჭრო ცენტრებსა და ბაზრობებზე ბოლო წლების მანძილზე მომხდარი ხანძრების საქმეების დროული გამოძიება დაავალა ქვეუწყებებს. არ არის გამორიცხული გაჭიანურებულ გამოძიებებს სამინისტროში კადრების ცვლის ახალი სერია მოჰყვეს.