სტიპენდია ონელი ახალგაზრდებისთვის - "მოტივაცია გვექმნება, რომ უკეთესად ვაკეთოთ ჩვენი საქმე"

განათლების წახალისება - ეს ის პრიორიტეტია, რომელზეც სახელმწიფო და კერძო სექტორი თანაბრად უნდა ზრუნავდეს. განათლების წახალისების კარგი საშუალებაა კარგი სამუშაო ადგილების არსებობა, სტიპენდიები, გაცვლითი პროგრამები... საქართველოში ეს ყველაფერი ეტაპობრივად იქმნება და იხვეწება, თუმცა აღნიშნული შესაძლებლობები უმეტესად დედაქალაქებისა და დიდი ქალაქების ახალგაზრდებისთვისაა ხელმისაწვდომი. რეგიონების, განსაკუთრებით, მაღალმთიანი სოფლების ახალგაზრდებს შედარებით შეზღუდული აქვთ ხელმისაწვდომობა როგორც ხარისხიან განათლებაზე, ისე სტიპენდიებსა და გაცვლით პროგრამებში მოაწილეობაზე.

ნინო დავლიანიძე 19 წლისაა და საქართველოს ეროვნულ უნივერსიტეტში (სეუ) სამართლის ფაკულტეტზე სწავლობს. სკოლა ონის რაიონში დაამთავრა.

"სკოლის დამთავრებამდე რამდენიმე წლით ადრე გადავწყვიტე, რომ სამართლის ფაკულტეტზე ჩამებარებინა. ამისთვის ყველა არსებულ რესურსს მაქსიმალურად ვიყენებდი. სკოლაშიც კარგად ვსწავლობდი, თუმცა ეს ერთიანი ეროვნული გამოცდების ჩასაბარებლად საკმარისი არაა. ამიტომ ჩემთვის ძალიან მნიშვნელოვანი იყო დავით საგანელიძის სტიპენდია, რომელიც "ეტალონში" მონაწილეობის შემდეგ მივიღე. მიღებული სტიპენდიით რამდენიმე საგანში რეპეტიტორებთან ვემზადებოდი. შედეგად კი წარმატებით ჩავაბარე გამოცდები და ახლა უკვე სტუდენტი ვარ. ჩემთვის და ონის ახალგაზრდებისთვის სტიპენდიებსა და მსგავს წახალისებებს დიდი მნიშვნელობა აქვს. ამით ჩვენ მეტი მოტივაცია გვექმნება, რომ უკეთესი განათლება მივიღოთ და უკეთესად ვაკეთოთ ჩვენი საქმე," - აღნიშნავს ნინო დავლიანიძე.

ნინო საბაკალავრო პროგრამის დასრულების შემდეგ სამაგისტრო და სადოქტორო პროგრამაზე სწავლას აპირებს. საბოლოოდ კი, პროკურატურაში სურს მუშაობა. მისი განმარტებით, დიდი მნიშვნელობა აქვს, რომ ახალგაზრდებმა დასახული მიზნის მისაღწევად მოტივაცია არ დაკარგონ. ნინოს შემთხვევაში მამოტივირებელი ფაქტორი სტიპენდია აღმოჩნდა, რომელმაც სასურველ უნივერსიტეტსა და სპეციალობაზე მოხვედრაში გადამწყვეტი როლი შეასრულა.

ონის გამგეობის ყოფილი მოადგილე ირმა მაქარაშვილის განმარტებით, მათი რეგიონის ბავშვების წახალისებას ძალიან დიდი მნიშვნელობა აქვს. ზოგადად, რეგიონების და განსაკუთრებით, მაღალმთიანი რეგიონების ახალგაზრდებს მეტი მოტივაცია და შესაძლებლობა უნდა შეექმნათ, რომ სასურველი განათლების მიღება შეძლონ.

"სკოლის ასაკის ბავშვებისთვის დიდი მნიშვნელობა აქვს სტიპენდიას. ეს მათ სწავლის გაგრძელებისკენ უბიძგებს. აგრძნობინებს, რომ მათი სწავლა ფასდება. მაგალითად, გასული 2 წლის მანძილზე ოთხი მოსწავლე ონის რაიონიდან და ორი - ამბროლაურიდან დავათ საგანელიძის სტიპენდიას იღებდა. მათი ნაწილი წარჩინებით სწავლობდა, ნაწილი კი სოციალურად დაუცველი ოჯახიდან იყო. სტიპენდიანტები მაღალმთიანი და საზღვრისპირა სოფლებიდან შეირჩნენ. მათი უმეტესობა მიღებულ დაფინანსებას ისევ საკუთარ განათლებაში დებდა. წიგნებს ყიდულობდნენ, მასწავლებლებთან ემზადებოდნენ.

ზოგადად, ჩვენი რეგიონის ბავშვები ძალიან ნიჭიერები, მონდომებულები და ერუდირებულები არიან. ამიტომ ვისურვებდი, მათ მეტი ყურადღება მიაქციონ და მათთვის სტიპენდიის გადამცემი ბევრი ადამიანი გამოჩნდეს, ” - განმარტავს ირმა მაქარაშვილი.

რაც შეეხება, საპარტნიორო ფონდის ხელმძღვანელის დავით საგანელიძის სტიპენდიას, ის ონის რეგიონის ახალგაზრდების გარდა, თბილისის სახელმწიფო სამედიცინო უნივერსიტეტის სტუდენტებსაც აფინანსებს.