18 წლის გოგონას ახლობლები, რომელიც ცხვირის ოპერაციის შემდეგ კომაშია, ხეჩინაშვილის კლინიკაში შეიჭრნენ
ხმაურია ხეჩინაშვილის სახელობის საუნივერსიტეტო კლინიკაში. პაციენტ ხატია თვაურის ოჯახის წევრები და მისი მეგობრები საავადმყოფოს შეობაში შესვლას მოითხოვდნენ, რისი უფლებაც მათ კერძო დაცვის სამსახურმა არ მისცა. მოგვიანებით ისინი კლინიკაში ძალის გამოყენებით შეიჭრნენ. შედეგად, კლინიკის დაცვის თანამშრომელმა თავის არეში მცირე დაზიანება მიიღო.
ახლობლები მოითხოვდნენ, 18 წლის გოგონას მკურნალი ექიმის ნახვას და საჯაროდ პოზიციის დაფიქსირებას იმის შესახებ თუ რა დაემართა 5 თვის წინ გოგონას, რომელიც ამ დრომდე კომატოზურ მდგომარეობაში იმყოფება.
აღნიშნულიდან გამომდინარე, ადგილზე საჭირო გახდა რამდენიმე საპატრულო ეკიპაჟის გამოძახება, რომლებმაც საავადმყოფოში მყოფი დაზარალებული პაციენტის ოჯახის წევრები და ახლობლები შენობიდან გაიყვანეს.
იხილეთ ვიდეო: "შეამტვრიეთ ყველაფერი, შედით" - კადრები უკომენტაროდ საავადმყოფოდან, სადაც ცხვირის ოპერციისას კომაში ჩავარდნილი გოგონას ახლობლები ძალით შეიჭრნენ
კლინიკის ხელმძღვანელობას აღნიშნულთან დაკავშირებით კომენტარი ამ დრომდე არ გაუკეთებია.
კლინიკის შესასვლელთან ამ დრომდე იმყოფებიან ხატია თვაურის ოჯახის წევრები, მეგობრები და თანაკლასელები. ადგილზე კვლავ მობილიზებულია საპატრულო პოლიცია, რომლებიც კლინიკის შესასვლელს აკონტროლებენ.
ხატია თვაურს ხეჩინაშვილის სახელობის საუნივერსიტეტო კლინიკაში ცხვირის პლასტიკური ოპერაცია 7 სექტემბერს პლასტიკურმა ქირურგმა ზაქარია ოდიშვილმა გაუკეთა. ოპერაციის შემდეგ გოგონას გული გაუჩერდა და მას შემდეგ კომაშია.
ნახეთ ვიდეო: "შეამტვრიეთ ყველაფერი და შედით" - ცხვირის ოპერაციის შემდეგ, კომაში მყოფი გოგონას ახლობლები საავადმყოფოში შეიჭრნენ