თმის საშრობი, რომელიც ცხელი ჰაერის ნაცვლად ცეცხლის ალს უშვებს, გაყიდვიდან ამოიღეს

"ამაზონმა" გაყიდვიდან ამოიღო თმის საშრობი, რომელიც ცხელი ჰაერის ნაცვლად ცეცხლის ალს უშვებდა, ინფორმაციას The Independent ავრცელებს.

აშშ-ში, სამხრეთ კაროლინაში მცხოვრებმა ერიკა ოგტან სქულბრედმა "ფეისბუქზე" გაავრცელა ვიდეო, სადაც ჩანს, როგორ უჩნდება ცეცხლი ჩართვის დროს კომპანიის OraCorp საშრობს. ერიკა აღნიშნავს, რომ მას ხელზე მცირე დამწვრობაც აქვს.

თმის საშრობი სქულბრედმა 19.99 დოლარად შეიძინა, "ამაზონზე" ნივთი ამჟამად აღარ იყიდება, თუმცა ერიკა ამბობს, რომ მწარმოებელი კომპანია ინციდენტს, ჯერჯერობით, არ გამოხმაურებია.

სქულბერდის ინფორმაციით, თმის საშრობი ჩინეთშია დამზადებული.

კომპანია OraCorp აღნიშნულ პროდუქტს მხოლოდ Amazon.com-ზე ყიდდა და მას 4.5 ვარსკვლავიანი შეფასება აქვს.