"ლუჩა ლიბრე", ანუ თავისუფალი ბრძოლა ჭიდაობის მექსიკური ნაირსახეობაა. მასში გამოიყენება დიდი ოდენობით აკრობატული ილეთები. ლუჩა ლიბრეში მოღვაწე მოჭიდავეებს "ლუჩადორებს" უწოდებენ. ერთ-ერთი ყველაზე ცნობილი და ლეგენდარული "ლუჩადორი" გახლდათ ვერცხლისფერ ნიღბიანი El Santo (ელ სანტო). სანტო, როგორც მას ყველა უწოდებდა, ქვეყნის კულტურის განუყოფელი ნაწილი გახდა, ის მექსიკის სიმბოლო და ადგილობრივების საკულტო ფიგურა იყო.
სანტო არამარტო ჭიდაობაში, არამედ კინოინდუსტრიაშიც წარმატებულად მოღვაწეობდა. ის 50-მდე ფილმში გადაიღეს, ასევე კომიქსების მთავარი გმირი გახდა.
ამასთან, მისი იმიჯი საზოგადოებაში წლების მანძილზე უცვლელი იყო - მას არასდროს მოუხსნია სახიდან ვერცხლისფერი ნიღაბი, მისი ფანების უმრავლესობას, მისი გუნდის წევრებსაც კი კერპის ნამდვილი სახე არასოდეს უნახავთ.
რუდოლფო გუცმან ჰუერტა 1917 წლის 23 სექტემბერს დაიბადა. ბავშვობასა და მოზარდობის წლებში ბეისბოლსა და ამერიკულ ფეხბურთს თამაშობდა. შემდეგ კი კლასიკურმა ჭიდაობამ გაიტაცა. ლუჩა ლიბრეთი 16-17 წლის ასაკში დაინტერესდა და 1934 წელს პროფესიონალურ ჭიდაობაში მისი დებიუტი შედგა რინგზე სახელით რუდო გუცმანი (რუდო ესპანურად ცუდ ბიჭს ნიშნავს). სწორედ აქედან დაიწყო მისი ლეგენდარული კარიერა. წლების მანძილზე მან რამდენჯერმე შეიცვალა სახელი, ელ სანტოს წოდებით კი პირველად 1942 წლის 26 ივნისს გამოჩნდა რინგზე.
მექსიკელ გმირად ის 1953 წელს ჩატარებული ორთაბრძოლის შემდეგ აღიარეს, როცა მან რინგზე მის ოპონენტს - "შავ ჩრდილს" ნიღაბი ჩამოხსნა. "ლუჩა ლიბრეში" ნიღბის დაკარგვა ერთპიროვნულ მარცხს ნიშნავს, ასე რომ, "შავ ჩრდილს" ამის შემდეგ კარიერის დასრულება მოუხდა.
თუმცა, იმავე წელს სანტო დამარცხდა მის ერთ-ერთ ყველაზე დიდ მოწინააღმდეგესთან - ლურჯ დემონთან. მიუხედავად იმისა, რომ მოჭიდავეები ხშირად ერთად ჩნდებოდნენ ფილმებში, ამბობენ, რომ მათ შორის მტრობა სიცოცხლის ბოლომდე გრძელდებოდა - სანტო დამარცხებას ვერ შეეგუა.
ელ სანტო 1940 წელს დაქორწინდა მარია მონტანოზე. წყვილს 10 შვილი ეყოლა. მექსიკელმა ლეგენდამ რინგზე ბრძოლა და ფილმებში გადაღება 1982 წლამდე განაგრძო, როცა ის 65 წლის იყო. ამ ხნის მანძილზე მისი სახე არასდროს უნახავთ მის ფანებს.
1984 წელს კი ეს დღე დადგა. ელ სანტომ სატელევიზიო შოუში სტუმრობის დროს მილიონობით ფანის ოცნება აასრულა - მან რამდენიმე წამით მოიხსნა ნიღაბი და სახე გამოაჩინა. 10 დღის შემდეგ, 1984 წლის 5 თებერვალს ელ სანტო გულის შეტევით გარდაიცვალა.
მამის გზა სანტოს უმცროსმა ვაჟმა ხორხემ გააგრძელა. მან მემკვიდრეობით მიიღო მამის ვერცხლის ნიღაბი და იბრძოდა სახელით - El Hijo del Santo (სანტოს ვაჟი). მისი კარიერის დასრულების შემდეგ, 2014 წელს სანტოს შვილიშვილმა დაიწყო ჭიდაობა იაპონიაში, სახელით ელ სანტო უმცროსი.
აი რას ყვება ერთ-ერთი ექსპერტი ლეგენდარული ლუჩადორის შესახებ: "მაშინ როცა ამერიკელებს ჰყავთ სუპერმენი, ბეტმენი და ადამიანი ობობა, ჩვენ გვყავს რუდოლფო გუცმანი, რომელიც ყველას ებრძოდა, დაწყებული მუმიებით დასრულებული ნაცისტებით. მაგრამ ამერიკელი სუპერგმირებისგან განსხვავებით, ის ნამდვილი ადამიანი იყო".
thevintagenews.com-ის მიხედვით