8
ივნისიდღის ზოგადი ასტროლოგიური პროგნოზი
წყალბურთში უძველესი ისტორიის მქონე გუნდმა "დინამომ", წლების შემდეგ - 2017 წელს, ეროვნული ჩემპიონატის პირველობა მოიპოვა და წყალბურთის აკადემიის შექმნაც გადაწყვიტა. "ცურვისა და წყალბურთის აკადემიაში" გოგონები და ბიჭები სპორტის ამ სახეობებს ავტორიზებული საერთაშორისო სტანდარტების შესაბამისად შეისწავლიან.
"დინამო" წყალბურთში უძველესი ისტორიის მქონე გუნდია, რომელმაც ათწლეულების მანძილზე დიდი წარმატებით იასპარეზა მსოფლიოში. 2017 წელს ჩვენი დიდი ძალისხმევით, დინამოს კლუბი უძლიერესი შემადგენლობით აღვადგინეთ და პირველობაც მოვიპოვეთ. ამას დიდი გამოხმაურება მოყვა მსოფლიო საწყლოსნო სახეობათა წრეებში. საერთაშორისო ექსპერტებთან და სპეციალისტებთან კონსულტაციისას გაგვიჩნდა იდეა, დაგვეარსებინა კლუბ დინამოს ბაზა მოზარდებისთვის," - განმარტავს "დინამო აკადემიის" დამფუძნებელი გიორგი ხვედელიანი.
- რა არის "დინამო აკადემიის" მიზანი?
- ჩვენ მიზანს წარმოადგენს ცურვისა და წყალბურთის სრულიად განსხვავებული ფორმატით სწავლება. მწვრთნელებად ახალგაზრდა მოქმედი წყალბურთელები ავიყვანეთ, პროგრამა საუკეთესო საერთაშორისო გამოცდილების გათვალისწინებით შემუშავდა და ავტორიზაცია საქართველოს საწყლოსნო სახეობათა ფედერაციაში გაიარა. აკადემიის მიზანი არა მხოლოდ საწყლოსნო სპორტში მომზადებაა, არამედ ქვეყნის მასშტაბით ჯანსაღი ცხოვრების წესის პოპულარიზაციაა. დადგა დრო, აღარ ისმოდეს შეკითხვა იმის შესახებ, უნდა ითამაშოს თუ არა მოზარდმა სპორტის რაიმე სახეობა. არჩევანი მხოლოდ ის უნდა იყოს, რომელ სპორტს დაეუფლოს ბავშვი. შესაბამისად, ჩვენი გეგმები მასშტაბურია. ეტაპობრივად საქართველოს ყველა დიდ ქალაქს მოვიცავთ და საუკეთესო სპორტსმენებს აღვზრდით.
- როგორია "დინამო აკადემიის" გუნდი? ვინ შექმნა აკადემია?
- დინამო აკადემია საქართველოს წყალბურთელთა ეროვნული ნაკრების სამმა მოქმედმა მოთამაშემ დავაარსეთ. მსოფლიოს სხვადასხვა კლუბებში თამაშისა და მომზადების ჩვენი პირადი გამოცდილება სრულიად განსხვავებული და ახალი პროგრამის შექმნაში დაგვეხმარა. ჩვენი კავშირები მსოფლიოს მასშტაბით მრავალ შესაძლებლობებს გვაძლევს: ვგეგმავთ შეკრებებს უცხოელი სპეციალისტების მოწვევით, მასტერკლასებს და მწვრთნელების გადამზადების პროგრამებს. ჩვენთვის, "დინამო აკადემია" არა მხოლოდ სასწავლო სივრცეა, არამედ საკუთარი გამოცდილებისა და ცხოვრების მთავარი საქმის გაზიარების საშალება.
- რა ასაკობრივ კატეგორიას შეუძლია "დინამო აკადემიაში" სწავლა?
- 3-დან 13 წლამდე ბავშვებს ორ სხვადასხვა აუზზე ვასწავლით - დამწყებთათვის საჭყუმპალაო და დიდი აუზი მომდევნო საფეხურისთვის. სწავლება პროფესიონალი სპორტსმენებისა და ექიმის მეთვალყურეობის ქვეშ მიმდინარეობს. აუზები ახლადაშენებულია და ქალაქის ცენტრში, ეკოლოგიურად სუფთა ტერიტორიაზე, ბაგებში, "წმიდა გიორგის საერთაშორისო სკოლაში" მდებარეობს. ამჟამად ჯგუფების რეგისტრაცია მიმდინარეობს და მოხარულები ვართ, რომ ინტერესი ძალიან მაღალია. სწავლებას თებერვლის მეორე ნახევრიდან ვიწყებთ, ჯგუფები კი თითქმის შევსებულია. აღსაზრდელებს ჯერ ცურვის ჯგუფებში ვანაწილებთ. სასურველი დონის მიღწევის შემდეგ ისინი სურვილისამებრ გადაინაცვლებენ წყალბურთის ჯგუფში, სადაც მათ ეროვნული ნაკრების წევრები ავარჯიშებენ.
- აკადემიის მოსწავლეების სხვადასხვა ჩემპიონატში მონაწილეობასაც უზრუნველყოფთ?
- ჩვენი აღსაზრდელები საქართველოს ჩემპიონატის 3 სხვადასხვა ასაკობრივ ჯგუფში უკვე იღებენ მონაწილეობას. "დინამო აკადემიის" ფარგლებში ეს პრაქტიკა გაგრძელდება. ჩვენი მისიაა, გავხდეთ მთავარი ბაზა, საიდანაც მომავალში საქართველოს ეროვნული ნაკრები დაკომპლექტდება.
- რატომ არის ცურვა და წყალბურთი კარგი მოზარდისთვის?
- რეგულარული ცურვა ხელს უწყობს ბავშვის სიმაღლეში ზრდას და სხეულის სწორად ფორმირებას, აუმჯობესებს ბავშვის სისხლის მიმოქცევას, ხელს უწყობს ნერვული სისტემის სწორ ფორმულირებას, შედეგად ბავშვს უკეთ სძინავს, უკეთ იკვებება. წყალბურთი არა მხოლოდ ფიზიკურად, მორალურადაც ამზადებს ბავშვს ცხოვრებაში სხვადასხვა წინააღმდეგობების დასაძლევად, ასწავლის მას გუნდურობას, ერთგულებას, მხარდაჭერას, ბრძოლისუნარიონობას. ზოგადად, წყალში მოძრაობა ავითარებს კუნთოვან ქსოვილს, ბავშვის იმუნიტეტი მნიშვნელოვნად უმჯობესდება, ხდება უფრო გაკაჟებული და იოლად აღარ ცივდება.
- როგორ უნდა დაგიკავშირდნენ დაინტერესებული მშობლები?
- ჩვენი "ფეისბუქის" გვერდზე ელექტრონული სარეგისტრაციო ფორმაა განთავსებული. დარეგისტრირების შემდეგ მათ თავად დავუკავშირდებით. უახლოეს დღეებში ვგეგმავთ მედიატურისა და ღია კარის დღის ჩატარებას, სადაც დეტალურად გავაცნობთ დაინტერესებულ მხარეებს ჩვენ სივრცეს, პროგრამას, მწვრთნელებსა და გუნდს.
ნანა მღებრიშვილი
