მეტროსადგურ "ვარკეთილში" ექსპერტ-კრიმინალისტები და გამომძიებლები მუშაობას აგრძელებენ

მეტროსადგურ "ვარკეთილში" ექსპერტ-კრიმინალისტები და გამომძიებლები მუშაობას აგრძელებენ. როგორც სატრანსპორტო კომპანიაში აცხადებენ, საგამოძიებო მოქმედებების შემდეგ მიიღება გადაწყვეტილება, თუ როდის აღდგება მეტროსადგურის მუშაობა. მანამდე კი თბილისის მეტრო "ახმეტელი"-"სამგორის" და "სამგორი"-"ახმეტელის" მიმართულებით მოძრაობს.

დღეს მომხდარ შემთხვევასთან დაკავშირებით ადგილზე იმყოფებოდნენ დედაქალაქის მერიის და საკრებულოს წარმომადგენლები, რომლებმაც პირადად დაათვალიერეს შემთხვევის ადგილი.

მეტროსადგურში დაახლოებით 10:30 საათზე ე.წ. შეკიდული ჭერი ჩამოვარდა, რის გამოც 14 ადამიანი დაშავდა. დაშავებულები საავადმყოფოებში არიან გადაყვანილები. ადგილზე მობილიზებული იყო სახანძრო, სამაშველო და სასწრაფო სამედიცინო დახმარების ბრიგადები, რომლებიც დაშავებულებს და მეტროში მყოფ ადამიანებს ამოსვლაში და კლინიკაში გადაყვანაში დაეხმარნენ.