"წულუკიანმა თანამდებობაზე მოსვლისთანავე მოატყუა მოსახლეობა..." - იურისტები სასამართლოს შერჩევით სამართალზე

სასამართლო სისტემაში რომ პრობლემებია, ეს "ბასიანის საქმემაც" დაადასტურა. ამ საქმეზე საქალაქო სასამართლოს გადაწყვეტილებამ გირაოს შეფარდების შესახებ, საზოგადოებაში გააღრმავა ეჭვი, რომ ქვეყანა "პატრონიანთა" და "უპატრონოთა" სამართლისკენ მიექანება.

ჩვენს მოქალაქეებს კარგად ახსოვთ, რა მოუტანა ამ "სამართალმა" საქართველოს 90-იან წლებში, როდესაც სამართალდამცავი სისტემის კორუფციით გახრწნისა და ჩამოშლის ფონზე, ქვეყანას, ფაქტობრივად, კრიმინალი მართავდა. სასამართლოში პრობლემებია სხვა მიმართულებითაც - გადატვირთულობის გამო წლობით იწელება საქმეების (განსაკუთრებით ქონებრივი დავების) განხილვა, რაც მოქალაქეებს, ბიზნესს აზარალებს. იურისტების აზრით, თუ სასამართლო სისტემაში ვითარება არ გამოსწორდა, ქვეყანა ძალიან მძიმე შედეგებს მოიმკის.

ადვოკატთა ასოციაციის ყოფილი თავმჯდომარე ზაზა ხატიაშვილი მიიჩნევს, რომ სასამართლოში საგანგაშო ვითარება და ქვეყანაში შერჩევითი მართლმსაჯულებაა:

"პირველ რიგში, ეს განპირობებულია მოსამართლეების - ლევან მურუსიძისა და მიხეილ ჩინჩალაძის ფაქტორით. ისინი სააკაშვილის რეჟიმის დროს ხელისუფლების საყრდენს წარმოადგენდნენ და საქმეების უმრავლესობაზე, რომელიც სასამართლოში შედიოდა, უნდა გამოსულიყო გამამტყუნებელი განაჩენი. ხელისუფლება შეიცვალა და ამ მოსამართლეებმა მიიღეს უფრო მეტი ხელშეუხებლობა და ძალაუფლება, რაშიც დიდი წვლილი შეიტანა იუსტიციის მინისტრმა თეა წულუკიანმა, რომელიც არის ერთ-ერთი ყველაზე სამარცხვინო მინისტრი საქართველოს თანამედროვე ისტორიაში.

წულუკიანმა თანამდებობაზე მოსვლისთანავე მოატყუა მოსახლეობა. მოგეხსენებათ, წინა ხელისუფლების დროს ბევრი მოქალაქე მიიჩნევდა, რომ სამართალდამცველების მხრიდან უსამართლობის მსხვერპლი გახდა. წულუკიანმა პროკურატურასთან ერთად გამოაცხადა, რომ საქმეები გადაისინჯება, ხარვეზების დამდგენი კომისია უნდა შევქმნათ და ის განიხილავს თქვენს განცხადებებსო. პროკურატურაში 20 ათასამდე განცხადება-საჩივარიც შევიდა. ერთი წლის შემდეგ კი მოქალაქეებს მისწერეს - კომისიას აღარ ვქმნითო.

წულუკიანის სასამართლო ე.წ. რეფორმა საბოლოოდ იმით დასრულა, რომ მურუსიძეებმა და ჩინჩალაძეებმა უფრო მეტი ძალაუფლება მიიღეს, რაც სასამართლო სისტემის დაღუპვაა. სასამართლოს რეფორმა ჩააგდო წულუკიანის არაკომპეტენტურობამ და იმ მოსამართლეებთან და პროკურორებთან ალიანსმა, რომლებიც სააკაშვილის რეჟიმის დროს ატერორებდნენ საქართველოს მოსახლეობას. ვფიქრობ, როცა ეს ხელისუფლება წავა, იუსტიციის მინისტრის პასუხისმგებლობის საკითხი დადგება. წულუკიანს ბევრ რამეზე მოსთხოვენ პასუხს. თუნდაც იმაზე, სტრასბურგში მოსამართლეების კანდიდატებს პოლიტიკური ნიშნით რომ არჩევდა.

სწორედ წულუკიანის არაკომპეტენტურობამ აქცია ვანო მერაბიშვილი პოლიტპატიმრად, სტრასბურგის ეს შოკისმომგვრელი გადაწყვეტილება ხომ იუსტიციის სამინისტროს არაკომპეტენტურობის დამსახურებაა. ვანო და პოლიტპატიმარი?! წულუკიანი, სავარაუდოდ, ზოგ-ზოგიერთის ნება-სურვილის კარგი შემსრულებელია და ამიტომაც ინარჩუნებს დღემდე პოსტს. არადა, მან სამართლებრივი სისტემა კატასტროფამდე მიიყვანა და პოლიტიკური პასუხისმგებლობა დაეკისრებათ მთავრობის იმ ხელმძღვანელებსაც, რომლებიც ამ ქალბატონს თანამდებობაზე ამდენი ხანი აჩერებენ" - აღნიშნავს ადვოკატი ზაზა ხატიაშვილი.

ადვოკატი მამუკა ნოზაძის თქმით, სასამართლო სისტემაში ბოლო დროს განცდილი რამდენიმე კრახის მიუხედავად, თეა წულუკიანი მინისტრის პოსტს ინარჩუნებს, რაც მიუღებელია:

"გულდასაწყვეტია, რომ მართლაც შეიძლებოდა სასამართლო რეფორმის განხორციელება და დღეს ასეთი მძიმე ვითარება გვაქვს. თავისი არაპროფესიონალიზმით და არაკომპეტენტურობით წულუკიანი ასამარებს ქვეყანაში სამართლიანობას და კანონისადმი პატივისცემას. რომელი ერთი ჩამოვთვალო - სამართლიანობის აღდგენა ბლეფი აღმოჩნდა, ლევან მურუსიძე იუსტიციის საბჭოს მდივანი გახდა, მიხეილ ჩინჩალაძე, რომელიც სასამართლოში ადეიშვილის კლანს წარმოადგენდა, სააპელაციო სასამართლოს თავმჯდომარე. დღეს ეს ხალხი მართავს სასამართლოს სისტემას და ასე სამართლებრივ სახელმწიფოდ ვერ ჩამოვყალიბდებით. ყველაზე საოცარი კი ის არის, რომ ამ ყველაფრის ფონზე თეა წულუკიანი ინარჩუნებს იუსტიციის მინისტრის პოსტს" - განმარტავს ნოზაძე.

ნანა ფიცხელაური

AMBEBI.GE