რისთვის ჩამოვიდა საქართველოში რამზან კადიროვის უახლოესი გარემოცვის წევრი მუსლიმ ხუჩიევი?

რამდენიმე საათია ვრცელდება ინფორმაცია, გროზნოს მერის მუსლიმ ხუჩიევის საქართველოში გასაიდუმლოებულ ვიზიტთან დაკავშირებით. ინფორმაცია და ვიზიტის ამსახველი ვიდეომასალა "კურიერმა" გაავრცელა. არსებული ცნობებით, მუსლიმ ხუჩიევი ბათუმში თბილისიდან ჩავიდა...

რა მიზნით ჩამოვიდა საქართველოში რამზან კადიროვის უახლოესი გარემოცვის წევრი და გავლენიანი მაღალჩინოსანი, ჯერჯერობით უცნობია. ასევე უცნობია უკავშირდება თუ არა ხუჩიევის ვიზიტი თბილისში, გაბრიელ სალოსის ქუჩაზე ჩატარებულ ანტიტერორისტულ ოპერაციასა და პანკისში არსებულ ვითარებას.

თუმცა, როგორც რუსული მედია წერს, ხუჩიევის ვიზიტის მიზეზი სწორედ ეს არის... რამდენიმე დღის წინ, ასევე გავრცელდა დაუდასტურებელი ინფორმაცია, პანკისის ხეობაში ჩეჩნეთის ლიდერის, რამზან კადიროვის ჩასვლის შესახებ...

kavkaz-uzel-ის ინფორმაციით, გროზნოს მერის ვიზიტი როგორც ქართველმა, ისე ჩეჩენმა მაღალჩინოსნებმაც გაასაიდუმლოეს. გამოცემის ცნობით, ხუჩიევი ჩეჩნეთში კადიროვის ნდობით აღჭურვილი პირია და დიდი გავლენებით სარგებლობს. იგი 2007 წლიდან გროზნოს ადმინისტრაციას ხელმძღვანელობდა, ხოლო 2012 წელს ქალაქის მერად დაინიშნა... 2015 წელს კადიროვმა, ის ეკონომიკის, ტერიტორიული განვითარებისა და ვაჭრობის მინისტრად დანიშნა, თუმცა მალევე მერის პოზიციაზე დააბრუნა.

მისი ლიდერისგან განსხვავებით, რომლის წინააღმდეგ ევროკავშირში, კანადაში, შვეიცარიაში, ლიტვასა და ამერიკაში სანქციები მოქმედებს, მუსლიმ ხუჩიევს ეს არ შეხებია.

ხუჩიევის საქართველოში ვიზიტის შესაძლო მიზეზებზე კავკასიური სახლის აღმასრულებელ დირექტორს გიორგი კანაშვილს ვესაუბრეთ:

- ეს არ არის პირველი ვიზიტი ჩეჩნეთიდან. არ ვიცი, ფართო საზოგადოებისთვის რამდენად ცნობილია, მაგრამ პანკისის ხეობაში ჩეჩნეთის ხელისუფლების მაღალჩინოსნებისა და სხვა ტიპის ემისრებისგან პერიოდულად ხორციელდება ვიზიტები. ანუ მათ ხეობასთან გარკვეული კავშირები აქვთ, რადგან სურთ, პანკისის ხეობაში მცხოვრებ ადამიანებზე, რომლებიც ვაინახური კულტურისა და ეთნოსის ნაწილად მიიჩნევენ თავს, გარკვეული გავლენები ჰქონდეთ.

გარდა ამისა, კადიროვს აქვს ამბიცია, რომ არა მხოლოდ პანკისში, ასევე ინგუშეთში და ზოგადად, ჩრდილოეთ კავკასიაში თავი მათ დამცველად წარმოაჩინოს...

კიდევ ერთ ვერსიაზე შეიძლება საუბარი. ჩეჩნეთს ბაქოში სავაჭრო წარმომადგენლობა აქვს. ამგვარი მცდელობები მათ სხვა ქვეყნებთანაც აქვთ. საქართველოში კი, ჩეჩნური ბიზნესი საკმაოდ წარმატებულია და შესაძლოა, ეს ვიზიტი ეკონომიკური ინტერესითაც იყოს გამოწვეული.

- ბიზნესის გასაიდუმლოება რამდენად რეალურია? მთელი ეს აჟიოტაჟი ხომ გამოწვეულია გროზნოს მერის პერსონით? მუსლიმ ხუჩიევი არის კადიროვის ნდობით აღჭურვილი პირი, კადიროვი კი პუტინის ფავორიტი...

- დიახ, მესმის, ჩეჩნეთს რამდენიმე ათასიანი, საკმაოდ კარგად გაწვრთნილი ჯარი ჰყავს, მის ლიდერს კი, ამბიციები არ აკლია... თუმცა, ვერ ვიტყოდი,  რომ ეს ვიზიტი განსაკუთრებული საფრთხის მატარებელია. უბრალოდ, შესაძლოა მართლაც გაკრვეული ინფორმაციების გადამოწმება სურდა, რათა დაეფიქსირებინა, რომ პანკისის ხეობაში მიმდინარე პროცესები მათთვის სულ ერთი არ არის.

- დიახ, მაგრამ ეს სხვა სახელმწიფოა, საქართველოს ტერიტორიაა და პანკისის ხეობის მიმართ ჩეჩნეთის ხელმძღვანელობის ასეთი კონტროლი რამდენად მართებულია?

- კი ბატონო... როგორც გითხარით, ადრეც იყო ჩეჩნეთიდან ვიზიტი, თუ რამდენად მაღალი დონის პირები იყვნენ ჩამოსულები, ეს სხვა საკითხია... რაც შეეხება, საქართველოს ხელისუფლების პოზიციას,  დიახ, სუს-ი ყველა ამგვარი ვიზიტით დაინტერესებული უნდა იყოს და იმედია, თვალყურს ადევნებენ.

ცნობისთვის, საქართველოს შს მინისტრმა გიორგი გახარიამ, საქართველოში გროზნოს მერის ჩამოსვლასთან დაკავშირებით უკვე გააკეთე კომენტარი. მისი თქმით, ის ქვეყანაში, სავარაუდოდ ტურისტის სტატუსით შემოვიდა.

კითხვაზე, არის თუ არა სპეცსამსახურებისთვის გადაცემული ინფორმაცია იმის შესახებ, რომ ხუჩიევი აგვისტომის ომის საგამოძიებო კომიტეტის თავმჯდომარის მონაცემებით, არის დამნაშავე, აღნიშნულის პასუხად მინისტრმა განაცხადა, რომ ეს მისთვის უცნობია.

"ახლა, პირველად თქვენგან მესმის ეს ინფორმაცია და აუცილებლად, გადავამოწმებთ. ეს ადამიანი წლებია, არც ერთ სიაში შეყვანილი არ ყოფილა. შესაბამისად, არ ვიცი, რა ფორმით, მაგრამ ალბათ, როგორც ტურისტი შემოვიდა და გავიდა. ვნე მას გადავამოწმებთ და თუ ეს ინფორმაცია, დადასტურდა, შესაბამის ზომებს მივიღებთ", - აცხადებს გახარია.

ლალი პაპასკირი

AMBEBI.GE