31
მაისიდღის ზოგადი ასტროლოგიური პროგნოზი
ჩინეთში, ადამიანის თავის პირველი სრული ტრანსპლანტაცია წარმატებით დასრულდა. ოპერაცია 25 დეკემბერს, გვამზე ჩატარდა და ქირურგების თქმით, მათ ის შედეგი მიიღეს, რასაც ელოდნენ. The Telegraph-ის ინფორმაციით, იტალიელი ქირურგის, სერჯიო კანავეროსა და ჰარბინის სამედიცინო უნივერსიტეტის ქირურგების თავის გადანერგვის ერთობლივი ოპერაცია, 18 საათის განმავლობაში მიმდინარეობდა.
ოპერაციის დასრულების შემდეგ, ექიმებმა მხოლოდ მცირე ინფორმაცია გაავრცელეს, სადაც აღნიშნავდნენ, რომ წარმატებულად გადააბეს ყველა ნერვი, ხერხემალი და მთავარი სისხლძარღვები... ტრანსპლანტაცია, უახლოეს მომავალში, ცოცხალ ადამიანზეც ჩატარდება. სხვა დეტალებს, შედეგებზე ან ოპერაციის პროცესზე, - ექიმები ჯერჯერობით არ ახმაურებენ.
2016 წლის იანვარში, მეცნიერთა ამავე ჯგუფმა თავის გადანერგვის ოპერაცია მაიმუნებზეც ჩაატარეს... მათივე თქმით, წლების წინ, როდესაც კანავერო ამაზე საუბრობდა, მსოფლიოს მედიკოსები მის ინიციატივას სკეპტიკურად აფასებდნენ, მეტიც, არასერიოზულადაც კი აღიქვამდნენ.
"მაშინ მე ვთქვი, - ყველას დავანახვებ, რომ ეს შესაძლებელია, მედიცინაში გადატრიალებას მოვახდენდი. ახლა ყველაზე მთავარი წინ არის, - იგივე ოპერაცია ცოცხალ ადამიანზეც უნდა ჩავატაროთ. ჰარბინის კლინიკა ამისთვის მზად არის..."- აცხადებს იტალიელი ქირურგი.
ჩინეთის კლინიკის ხელმძღვანელობა, 25 დეკემბერს ჩატარებულ ოპერაციას "სენსაციურს" უწოდებს. ჰარბინის წარმომადგენლების თქმით, - სწორედ მათი კლინიკის კედლებში მოხდება ის, რაც "ალექსანდრე ბელიაევს თავის ფანტასტიკურ რომანში უწერია, - ადამიანისთვის თავის გადანერგვა" - განუცხადეს მათ The Telegraph-ს.
კლინიკის ხელმძღვანელობის თქმითვე, მსოფლიოში მედიკების ერთი ნაწილი, გაბედულ ქირურგს, "შარლატანს" უწოდებს, - სხვები კი, "თანამედროვეობის დიდებულ გენიოსს." "არადა, მან გააკეთა ის, რაზეც ოცნებობდნენ ჩინელი იმპერატორები, ინგლისელი მონარქები და შუასაკუნეების შავი მაგიის მიმდევრები, - ყველა მათგანი ეძებდა გზას უკვდავებისა და მარადიული ახალგაზრდობისკენ..."- მიაჩნიათ მათ.
ახლა მთავარია, შემდეგი საფეხური. კერძოდ, - ვინ გარისკავს თავის სიცოცხლეს იტალიელი ქირურგის ახალი, მთავარი მიზნისთვის, რომელზეც ის წლებია საუბრობს. არსებული ინფორმაციით, პირველი "კანდიდატი", რუსი პროგრამისტი ვალერი სპირიდონოვი უნდა ყოფილიყო, რომელსაც კუნთების ატროფია აქვს და ეტლით გადაადგილდება... პეკინის კლინიკა ამ პროექტს დასთანხმდა. პეკინში ამ ექსპერიმენტს ფინანსური მხარდაჭერაც გამოუცხადეს, თუმცა, შემდეგ, ექიმსა და პაციენტს შორის თითქმის მიღწეული შეთანხმება, რატომღაც გაუქმდა. იმაზე, თუ როგორ ეძებდნენ დონორს სპირიდონოვისთვის, პეკინის კლინიკაში დუმდნენ. ამ თემაზე არ საუბრობს იტალიელი ქირურგიც.
ბოლო, რეზონანსული ოპერაციის მსვლელობისას, კანავეროს ასისტენტი ჩინელი ქირურგი იყო, რომელიც 5 წლის წინ, მსგავს ოპერაციებს მღრღნელებზე ატარებდა. ცნობილია, რომ ოპერაციის შემდეგ, საცდელმა ცხოველებმა მხოლოდ რამდენიმე საათს იცოცხლეს, თუმცა, ამის მიუხედავად, ექიმი ხელის ჩაქნევას არ აპირებს...
კანავაროს ბოლო გახმაურებულ ოპერაციას მსოფლიოში ახალი გამოხმაურებები მოჰყვა, - მედიკოსების ერთმა ნაწილმა, მის საქმიანობას "გრანდიოზული აფერა" უწოდა. თუმცა, ფაქტია, რომ მილიონობით ადამიანი მის შემდეგ ნაბიჯს ყურადღებით ადევნებს თვალყურს. ნაწილი კი, იმედოვნებს, რომ იტალიელი ქირურგი მედიცინაში გადატრიალებას მართლაც მოახდენს...
ლალი პაპასკირი
AMBEBI.GE
