5 საინტერესო ადამიანი, რომელიც 2017 წელს აღმოვაჩინეთ
რამდენიმე დღეში ახალი, 2018 წელი დგება. 2017 წლის ბოლო დღეებს ვითვლით და ვაჯამებთ, რამდენად მნიშვნელოვანი, ამაღელვებელი, ტრაგიკული თუ სასიხარულო მოვლენებით იყო დახუნძლული მიმავალი წელი. გადავწყვიტეთ ის ადამიანები წარმოგიდგინოთ, რომლებიც 2017 წელს ქართული საზოგადოებისთვის აღმოჩენად იქცნენ, ცნობილები გახდნენ მათი საქმიანობისთვის, დამსახურებისთვის, თუ მომავალი წარმატებისთვის. მაშ ასე, დავიწყოთ...
რამდენიმე თვის წინ, პაატა გოგელიას სახელი მხოლოდ ზუგდიდელებმა და ქალაქის სტუმრებმა იცოდნენ. თუმცა, რამდენიმე ფოტომ, მისი ედემის ბაღიდან, ზუგდიდელი მებაღე ინტერნეტვარსკვლავად აქცია. 46 წლის მებაღის შესახებ მთელმა საქართველომ შეიტყო, მასზე მომზადებული სტატიები ასი ათასობით ადამიანმა წაიკითხა და სოციალურ ქსელებში ერთმანეთს გაუზიარა.
ზუგდიდის მუნიციპალიტეტის სოფელ ახალაბასთუმანში პაატა გოგელია საკუთარ ეზოს შვიდი წელია დეკორატიული ელემენტებით აწყობს. მის ეზოში 100-მდე სხვადასხვა ჯიშის მცენარე ხარობს, მებაღეს მცენარის ჯიშები თავად გამოყავს და მათ სხვადასხვა ფორმას აძლევს. პაატა გოგელია 2011-2016 წლებში ზუგდიდის ბოტანიკურ ბაღს ხელმძღვანელობდა, ახლა კი მხოლოდ საკუთარი ედემის ბაღის მოვლითაა დაკავებული. ზუგდიდელმა მებაღემ მოულოდნელ პოპულარობაზე საუბრისას აღნიშნა, რომ მისი მიზანი არ ყოფილა ვინმეს გაეცნო, მას უბრალოდ სურს უფრო მეტმა ადამიანმა შეიყვაროს მცენარეები და ისწავლოს მათი მოვლა.
"ჩემი ბაღი ჯერ დასრულებული არ არის, ვაპირებ ბევრი რაღაცის შეცვლას და უფრო მეტი სახეობის ხე-მცენარეების დარგვას. საბოლოო სახეს ალბათ 2018 წლის შემოდგომაზე მიიღებს. მინდა რომ ეს კულტურა, რასაც მებაღეობა და მცენარის სილამაზე ჰქვია, საქართველოში დავამკვიდრო. მგონია, რომ ადამინები აუცილებლად ისწავლიან მცენარისადმი სიყვარულს - სწორედ ეს არის ჩემი მიზანი" - ამბობს მეგრული "ედემის ბაღის" მებაღე იხილეთ ვიდეო (წაიკითხეთ ვრცლად და ნახეთ მეტი ფოტო)
ზუსტად ერთი წლის წინ, 14 წლის ჩემპიონი, რომელიც ბაზარში ლიმნის გაყიდვით ოჯახს არჩენდა, "პალიტრავიდეოს" ჟურნალისტმა, თიკო გურაშვილმა აღმოაჩინა.
აიდენიზ ბადიროვი, რომელიც თავისუფალ ჭიდაობაში საქართველოს ჩემპიონი რამდენჯერმე გახდა, მშობლებთან და სამ მცირეწლოვან დასთან ერთად, სოფელ ველში ცხოვრობს. აიდანისი ყოველ დილით ვაგზალზე მატარებლით მიდიოდა, რომ დეზერტირების ბაზარში ლიმონი გაეყიდა. დღეში მისი შემოსავალი სულ რაღაც, 5-6 ლარი იყო.
ბიჭზე მომზადებული სიუჟეტი და სტატია ინტერნეტსივრცეში ასიათასობით ადამიანმა ნახა, მისით დაინტერესდნენ სხვადასხვა მედიასაშუალებები, ტელევიზიები. აიდანისის და მისი ოჯახის დახმარების სურვილი კი ასობით მოქალაქემ გამოთქვა. პატარა ჩემპიონს არაერთი ადამიანი და კომპანია დაეხმარა. უკვე ერთი წელია დახმარების მსურველთა რიცხვი არ წყდება.
მისი გაცნობიდან ერთი წლის შემდეგ, პატარა სპორტსმენი ბევრად უფრო თავდაჯერებული ჩანს. აიდანისს რამდენიმე ოცნება უკვე აუსრულდა - აზერბაიჯანიდან ჩამოსულ ბიჭს, უკვე საქართველოს მოქალაქეობაა აქვს, მისი ოჯახის პრობლემები შედარებით მოგვარდა, აქტიურად ვარჯიშობს და ჭიდაობს... ახლა კი სურს, ამდენი ადამიანის დახმარების შემდეგ უფრო დიდ წარმატებას მიაღწიოს სპორტში და საზოგადოებას მადლობა ასე გადაუხადოს... (ნახეთ, აიდენიზ ბადიროვის ცხოვრება 1 წლის შემდეგ)
გერმანული Voice-ის ქართული ხმა
ნათია თოდუას სახელი და გვარი საქართველოში ცოტა ადამიანმა თუ იცოდა, ბევრს კი ბუნდოვნად ახსოვდა მორცხვი გოგონა, რომელმაც წლების წინ, საქართველოში რამდენიმე მუსიკალურ პროექტში მიიღო მონაწილეობა, თუმცა წარუმატებლად. 2017 წლის ოქტომბრის ერთ დღეს კი, მთელი საქართველო ნათია თოდუაზე ალაპარაკდა. 21 წლის ქართველი მომღერლის გერმანულ "ახალ ხმაში" გამოჩენას ჟიურის წევრებისა და საქართველოს აღფრთოვანება მოჰყვა.
ნათია თოდუა ბავშვობიდან მღერის, საკუთარი ძალები ქართულ "იქს ფაქტორში" სცადა, მაგრამ არ გაუმართლა, შემდეგ იყო უკრაინული "ახალი ხმა"... როცა მიხვდა, რომ საკუთარი მიზნების ასრულებას პატარა ქვეყნებში ვერ შეძლებდა, საქართველო დატოვა და გერმანიაში გაემგზავრა, გაუმართლა - "იქს ფაქტორის" ჟიურის წევრების მოხიბვლა რამდენიმე წამში შეძლო, 2 თვეში კი მთელი გერმანიის გული დაიპყრო და დღეს, ნათია გერმანული ვოისის გამარჯვებულია! ქართველმა გოგონამ, მაყურებელთა ხმების 50% მოიპოვა, მეორე ადგილზე გასულმა კონკურსანტმა კი ხმების 25% მიიღო.
"ვერანაირად ვერ წარმოვიდგენდი თუ მე გავხდებოდი პროექტის გამარჯვებული. ეკრანზე ჩემი სახელი რომ დაეწერა, ისე გამიხარდა შოკში ჩავვარდი და ახლაც ვერ გამოვდივარ მდგომარეობიდან. ძალიან ბედნიერი ვარ ამ დიდი წარმატებით!" - აღნიშნა ნათიამ AMBEBI.GE-სთან საუბარში. იხილეთ ვიდეო
პოპულარობამ და აღიარებამ ნათიას ცხოვრება რადიკალურად შეცვალა - როგორც პროექტის გამარჯვებულმა, The Voice of Germany-სგან საჩუქრად ალბომის ჩაწერა და ავტომანქანა მიიღო. და რაც მთავარია ტურნე გერმანიის დიდ ქალაქებში - ნათია თოდუა პროექტის სხვა კონკურსანტებთან ერთად ქვეყნის სხვადასხვა ქალაქის დიდ სცენებზე იმღერებს. საუბრობენ იმაზეც, რომ ნათია თოდუა 2018 წლის ევროვიზიაზე გერმანიის სახელით გამოვა, თუმცა ქართველი მომღერალი ამას ჯერ არ ადასტურებს...
წყალტუბოში, პრომეთეს მღვიმეში დარწმუნებული ვარ ბევრი თქვენგანია ნამყოფი, და შესაძლოა ბევრსაც შეგიმჩნევიათ, მოხუცი, ხელჯოხიანი მამაკაცის ძეგლი, რომელიც მღვიმეს შესასვლელში დგას... ეს 85 წლის გიორგი ტყაბლაძის ძეგლია, მოხუცი მცველის, რომელიც თითქმის 25 წლის განმავლობაში უსასყიდლოდ იცავდა პრომეთეს მღვიმეს.
ამ დამსახურებისთვის მას წელს ღირსების ორდენი გადაეცა. გიორგი ტყაბლაძე პრომეთეს მღვიმეში 1984 წლიდან 2007 წლამდე დარაჯობდა. მას მნიშვნელოვანი წვლილი მიუძღვის პრომეთეს მღვიმის უნიკალური ბუნებრივი ძეგლის პირვანდელი სახით შენარჩუნებაში.
"წლების წინ მე ვიყავი მისი დაცვა და ერთადერთი პატრონი. მარტო ვიყავი, არავინ ყურადღებას არ აქცევდა. მეც რომ მიმეტოვებინა, დღეს არაფერი იქნებოდა.
არეულობის პერიოდში, როცა ძარცვა დაიწყო და სჭირდებოდათ თუ არა, ხალხი ყველაფერს იპარავდა, მღვიმეში არავის ვუშვებდი, არ მინდოდა, ვინმეს მოეტეხა სტალაქტიტები და სტალაგმიტები.
მღვიმეს შესასლელში ვიჯექი, მაგრამ მას გამოსასვლელიც აქვს და მისი უყურადღებოდ დატოვება სარისკო იყო, ნებისმიერს შეეძლო იქედან შესულიყო, ამიტომ გადავწყვიტე, ამომექოლა.
საკუთარი სახსრებით ვიქირავე ტრაქტორი და მიწა მივაყარე. ლურსმნებს და ყველაფერს ვყიდულობდი, რათა დაზიანებისგან დამეცვა… ვინ მოსთვლის, რამდენი ღამე გამიტარებია იქ სიცხიანსაც და ავადმყოფსაც" - გვითხრა ინტერვიუში პრომეთეს მღვიმის უხუცესმა მცველმა. იხილეთ ვიდეო
19 წლის მორაგბე, მსოფლიო კლასის ლელოთი
"დაიმახსოვრეთ ეს სახელი! მისი 55-მეტრიანი ლელო, ირლანდიის ნაკრების წინააღმდეგ მსოფლიო კლასისაა!" - ასე შეაფასა 19 წლის ქართველი მორაგბე გელა აფრასიძე ცნობილმა საერთაშორისო სპორტულმა გამოცემამ Pundit Arenaა-მ, და მართლაც, ამ პატარა ბიჭის საოცარმა ლელომ არამხოლოდ ქართველი, რაგბის მსოფლიო გულშემატკივრებიც აღაფრთოვანა და 19 წლის ქართველის სახელი, ჩვენი ქვეყნის ფარგლებს გარეთაც გაიტანა (იხილეთ აფრასიძის ლელო ირლანდიასთან მატჩში).
აფრასიძის ეფექტური ლელო, ზაფხულში ჩატარებული რაგბის მსოფლიო თასის ხუთ საუკეთესო ლელოს შორის დასახელდა. ამას გარდა 2017 წლის მსოფლიო ჩემპიონატზე, საუკეთესო ბომბარდირთა სიაში გელა აფრასიძე მესამე ადგილზე, 47 ქულით მოხვდა. მიუხედავად იმისა, რომ ახალგაზრდა ბორჯღალოსნები ბოლო მატჩში ირლანდიასთან დამარცხდნენ, მთავარი მიზანი შეასრულეს - 20-წლამდე მორაგბეები მსოფლიო ჩემპიონატზე მომავალ წელსაც ითამაშებენ.
რამდენიმე თვის წინ, საქართველოს მორაგბეთა ახალგაზრდული ნაკრების ერთ-ერთმა ლიდერმა და თბილისის "ლელოს" ცხრა ნომერმა სამწლიანი კონტრაქტი გააფორმა საფრანგეთის ელიტურ პირველ დივიზიონში მოასპარეზე "მონპელიესთან". შარშან, მანჩესტერში გამართული მსოფლიოს ახალგაზრდული ჩემპიონატის შემდეგ ქართველი მორაგბის შეძენა სურდა, თუმცა აფრასიძემ არჩევანი მონპელიეზე შეაჩერა, სადაც სამი ქართველი მორაგბე თამაშობს.
აფრასიძე თბილისის "ლელოს" შემადგენლობაში 2016 წელს საქართველოს ჩემპიონი გახდა. მაშინ ის სულ რაღაც 18 წლის იყო. 2015 და 2016 წლებში კი, ევროპის 18-წლამდელთა ჩემპიონატზე ორჯერ გახდა ვიცე- ჩემპიონი. წლეულს კი, როგორც უკვე მოგახსენეთ, ის 20-წლამდელთა მსოფლიოს ჩემპიონატზე ერთ-ერთი გამორჩეული ფიგურა იყო. იხილეთ ვიდეო
თიკო გურაშვილი, თათული როგავა
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია
