6 დაღუპული და 10 დაჭრილი პოლიციელი – "თალიბანის" "პასუხი" ამერიკის ვიცე-პრეზიდენტის ავღანეთში ვიზიტზე

"ისინი გვებრძვიან უფრო მეტად სხვების ხელით - ჩვენ ვებრძვით, საკუთარი ძალებით, მაგრამ შედეგი ერთი იქნება, არ მივცემთ საშუალებას, ჩვენი მიწა აკონტროლონ და აქ გავლენები გაიმყარონ" - ასე შეაფასა "თალიბანმა" ყანდაარის პროვინციაში მომხდარი ფაქტი, სადაც 22 დეკემბერს თვითმკვლელმა ტერორისტმა ბომბი ააფეთქა, რის შედეგადაც 6 პოლიციელი დაიღუპა და 10 დაიჭრა, მათგან ხუთის მძიმე მდგომარეობაშია.

დასავლური მედიის ინფორმაციით, თვითმკვლელი მოზარდი იყო, თუმცა მარტო არ მოქმედებდა.

"ამერიკის ხმასთან" საუბარში ავღანეთის რეგიონული პოლიციის მეთაური, სულთან მუჰამადი აცხადებს, რომ ტერორისტმა ასაფეთქებელი მასალით დატვირთული სამხედრო "ჰამერი", მაივანდის რაიონის პოლიციის განყოფილებას შეაჯახა. მასიურმა აფეთქებამ პოლიციის განყოფილება და ახლომდებარე საცხოვრებელი სახლებიც დააზიანა.

ავღანელი მაღალჩინოსნის განცხადებით, პირველ შესასვლელთან განლაგებულმა მცველებმა, 3 ათასი კილოგრამი ასაფეთქებელი მასალით დატვირთულ "ჰამერს" გზა გადაუღობეს და ცეცხლი გაუხსნეს, თუმცა, აფეთქებამდე ტერორისტმა მეორე ჭიშკრამდე მიღწევა მოახერხა.

პასუხისმგებლობა თავდასხმაზე, რომელიც ვიცე-პრეზიდენტ მაიკ პენსის ავღანეთში დაუგეგმავი ვიზიტიდან სულ რამდენიმე საათში მოხდა, "თალიბანმა" აიღო. ოფიციალური ინფორმაციით, ამერიკელი მაღალჩინოსნის ავღანეთში ვიზიტი წინასწარ დაგეგმილი არ ყოფილა.

პენსი მსოფლიოს ერთ-ერთ ყველაზე ცხელ წერტილს მოულოდნელად ესტუმრა, თუმცა, დასავლური მედიის ინფორმაციით, ფაქტია, რომ ტერორისტებს ამის შესახებ ინფორმაცია ჰქონდათ და როგორც ჩანს, მოემზადნენ კიდეც...

საერთაშორისო სამხედრო ექსპერტების შეფასებით, ბოლო დროს, ავღანეთში უშიშროების ძალების ობიექტებსა და მაღალჩინოსნებზე თავდასხმებმა იმატა. ადგილობრივი ხელმძღვანელობა გეგმავს თავდამსხმელების მიმართ კიდევ უფრო მკაცრი ღონისძიებები განახორციელოს, თუმცა იმასაც აცნობიერებს, რომ მათთან ბრძოლის რამდენიმეწლიანი გამოცდილების შეფასებით, ეს ძალიან რთული იქნება.

აშშ-ის ვიცე-პრეზიდენტმა მაიკ პენსმა, რომელიც მოულოდნელი ვიზიტით ეწვია ავღანეთს, ამერიკელი და ავღანელი ჯარისკაცები 16-წლიან ომში მიღწეული "რეალური პროგრესისთვის" შეაქო. მისი შეფასებით, ავღანეთისთვის პრეზიდენტ დონალდ ტრამპის ახალი სტრატეგია წარმატებულია.

ამერიკელი მაღალიჩნოსანი 21 დეკემბერს, გვიან ღამეს, ქაბულში ჩავიდა, სადაც ავღანეთის პრეზიდენტ აშრაფ ღანისა და აღმასრულებელ ლიდერს აბდულა აბდულას შეხვდა. ოფიციალურ პირებთან შეხვედრის შემდეგ, მან ავღანეთის პრეზიდენტის ინფორმაციაზე დაყრდნობით განაცხადა, რომ 2017 წელს, "თალიბანის" მეტი ლიდერი იქნა მოკლული, ვიდრე ადრე, კონფლიქტის წინა წლებში განმავლობაში.

პენსმა ასევე ისაუბრა ამერიკის პრეზიდენტ, დონალდ ტრამპის ახალ სტრატეგიაზე, რომელიც ითვალისწინებს ავღანეთში ამერიკელი სამხედროების რაოდენობის გაზრდას და ამერიკელი სამხედრო ლიდერებისთვის მეტი უფლებამოსილების მინიჭებას თალიბებთან ბრძოლაში.

დასავლური მედიის თქმით, "თალიბანი" ჯერ კიდევ საკმაოდ ძლიერია და ამერიკელების მიერ კარგად გაწვრთნილ ავღანურ  ჯარზე მოულოდნელი და დაუნდობელი თავდახმებით, მათი გეგმების ჩაშლას ახერხებს... ". ასე რომ, როგორც თეთრ სახლს, ასევე ავღანეთის ხელისუფლებას, სრულფასოვანი მშვიდობისა და უსაფრთხოების მისაღწევად, ჯერ კიდევ ბევრი აქვს სამუშაო...",- წერს დასავლური მედია.

ლალი პაპასკირი

AMBEBI.GE