სად უნდა ასეირნოთ ბავშვი გამონაბოლქვით დაბინძურებულ ქალაქში - პედიატრის რეკომენდაცია მშობლებს

ჰაერის მძიმე მეტალებითა და გამონაბოლქვით დაბინძურება არა მხოლოდ საქართველოს, არამედ - უამრავი განვითარებული ქვეყნის პრობლემად რჩება. პედიატრები მშობლებს აძლევენ რეკომენდაციას, რეგულარულად ასეირნონ ბავშვები სუფთა ჰაერზე, თუმცა დიდ ქალაქებში, მათ შორის - თბილისში ჰაერი სუფთა დიდი ხანია, აღარ არის.

აქვს თუ არა აზრი ბავშვის სასეირნოდ ქუჩაში გაყვანას დაბინძურებული ჰაერის პირობებში, AMBEBI.GE "სასწრაფო პედიატრის" ხარისხის მართვის სამსახურის ხელმძღვანელს, პედიატრ ეკა ყიფიანს დაუკავშირდა:

"ჰაერზე სეირნობას აქვს ძალიან დიდი მნიშვნელობა. მძიმე მეტალები და გამონაბოლქვი ბავშვის სიმაღლეზე, 60-80 სმ-ზე ილექება. ამიტომ, არ არის სასურველი, ბავშვი ვასეირნოთ ქუჩაში, სადაც ინტენსიური მოძრაობაა. თუ არ გვაქვს საშუალება, გავიყვანოთ პარკში, შეგვიძლია ბავშვი ვასეირნოთ ახლომდებარე სკვერში, ბაღში, სადაც რამდენიმე ხე მაინც დგას.

თუ ბავშვი სოფელში გვყავს, რაც შეიძლება მეტ ხანს უნდა გვყავდეს გარეთ. ერთადერთი შეზღუდვა ჰაერზე სეირნობასთან დაკავშირებით, ქარიანი ამინდი და - ძლიერი ყინვაა, რადგან ჩვენი გენეტიკა არ არის განწყობილი -10 გრადუსზე სეირნობისთვის, ცივი კლიმატის ქვეყნების მოსახლეობისგან განსხვავებით.

საუკეთესოა წვიმიან ამინდში სეირნობა, რადგან ჰაერი არის ტენიანი და ბავშვის სასუნთქი სისტემისთვის ძალიან სასარგებლოა," - ამბობს პედიატრი.

რაც შეეხება პირბადეებს, რომელსაც მსოფლიოს ბევრ ქვეყანაში ხმარობენ, სადაც ჰაერის დაბინძურების მაჩვენებელი კრიტიკულ ზღვარს რამდენიმე ათეულით, ან - ასეულით აღემატება, ეკა ყიფიანი ამბობს, რომ საქართველოში მათი საჭიროება არ არის. პედიატრის თქმით, ბავშვებისთვის ქუჩაში პირბადეებით გაყვანის რეკომენდაცია, საჭიროების შემთხვევაში, დაავადებათა კონტროლის ეროვნულმა ცენტრმა უნდა გასცეს. ასეთი საჭიროება კი, დღეისთვის არ დგას.