28
მარტიდღის ზოგადი ასტროლოგიური პროგნოზი
სოფელ სართიჭალაში მდებარე კომპანია "ჩირინას" მარცვლეულის საშრობი და საწყობი კომპლექსი გაფართოვდა. შედეგად, ძველი და ახალი კომპლექსების სილოსების საერთო მოცულობა 40 000 ტონამდე გაიზარდა.
მარცვლეულის საშრობი და საწყობი კომპლექსის მშენებლობა სახალმწოფო პროგრამის "აწარმოე საქართველოში" პროგრამის ხელშეწყობით განხორციელდა. საერთო ინვესტიციის მოცულობა 6 000 000 ლარს შეადგენს, აქედან 5 მილონი ლარი პროექტისთვის "აწარმოე საქართველოში" პროგრამის ფარგლებში გამოიყო. საწარმოს გაფართოების შედეგად, წარმადობა საგრძნობლად გაიზარდა და შედეგად ერთ საათში 60 ტონა ნედლეულის გადამუშავებაა შესაძლებელი.
"პროგრამის "აწარმოე საქართველოში" ხელშეწყობით შევძელით, რომ ჩვენი საწარმო უფრო დიდი მასშტაბის და წარმადობის გაგვეხადა, დაგვესაქმებინა მეტი ადამიანი. ჩვენს ნედლეულზე მოთხოვნა დღითი-დღე იზრდება, ამიტომ კომპანია "ჩირინას" 2019-2020 წლისთვის დაგეგმილი აქვს ქათმის ხორცის წლიური წარმოების არსებული 14000-დან 20000 ტონამდე გაზრდა."- აცხადებს კომპანიის დირექტორი რევაზ ვაშაკიძე.
გაფართოვებული კომპლექსი ექვსი შესანახი ბუნკერისგან შედგება და თითოეული მათგანი 3400 ტონა მარცვლეულის შესანახად არის გათვლილი. ბუნკერები აღჭურვილია უმაღლესი ხარისხის ავტომატური და თვითრეგულირებადი გაგრილების სისტემით. საწარმოს წარმადობის გაზრდა ადგილობრივ ფერმერებს საშუალებას აძლევს მარცვლეული მაღალი სტანდარტების მქონე საწარმოში აწარმოონ, გააშრონ და საიმედოდ შეინახონ.
"კომპანია ჩირინა არის ბაზრის ლიდერი თავის სეგმენტში. რასაც ეს კომპანია აკეთებს, დასაფასებელია და დიდი მაგალითია სხვა კომპანიებისთვის. პირდაპირი დასაქმებული ადამიანების გარდა, ეს კომპანია მუშაობს ბევრ ფერმერთან. "ბიუ ბიუს" ბრენდის ქვეშ ჩვენ გვაქვს მაღალი და ხარისხიანი პროდუქტი საქართველოში, რომელიც კიდევ ერთი მხრით არის დასაფასებელი, საქართველოში ის იმპორტის ჩანაცვლებას უწყობს ხელს, რითიც თვითუზრუნველყოფის ამაღლება ხდება. ეს არის კარგი მაგალითი და იმედი გვაქვს რომ უახლოეს ხანში სწორი ნაბიჯებით მივიღებთ იმას, რომ საქართველო შეძლებს თვითუზრუნველყობას."- განაცხადა სოფლის მეურნეობის მინისტრმა ლევან დავითაშვილმა.
მარცვლეულის საშრობი და საწყობი კომპლექსი ბრიტანული კომპანიის "Chief Industries UK"-ის მიერ აშენდა და აღიჭურვა ამავე კომპანიის თანამედროვე დანადგარებით.
კომპლექსის საზეიმო გახსნის ღონისძიებას სოფლის მეურნეობის მინისტრი ლევან დავითაშვილი, სოფლის მეურნეობის მინისტრის მოადგილე გიორგი ხანიშვილი, ქვემო ქართლის გუბერნატორი გრიგოლ ნემსაძე, გარდაბნის მუნიციპალიტეტის მერი რამაზ ბუდაღაშვილი, სოფლის მეურნეობის პროექტების მართვის სააგენტოს დირექტორის მოადგილე - ბ-ნი გიორგი ჯიბლაძე, პარტნიორი კომპანიების, მედიის და მთავრობის წარმომადგენლები დაესწრნენ.
ბიუ-ბიუ-ს მწარმოებელი კომპანია "ჩირინა" ამიერკავკასიაში ყველაზე მასშტაბური მეფრინველეობის კომპლექსია. კომპანია ვერტიკალურადაა ინტეგრირებული, რაც საშუალებას იძლევა სრულად გაკონტროლდეს ხარისხი წარმოების ყველა ეტაპზე - ფრინველის კვებისთვის საჭირო ნედლეულის მოპოვებიდან დაწყებული, ქათმის ხორცპროდუქტების დისტრიბუციითა და რეალიზაციით დამთავრებული. კომპანია "ჩირინას" გავლილი აქვს HACCP-ის კონცეფციით ISO 22000 სერტიფიცირების პროცესი, რომლის ფარგლებშიც საერთაშორისო სტანდარტით გათვალისწინებული ხარისხის მართვის სისტემა დაინერგა. რაც საუკეთესო საბოლოო პროდუქტის გარანტიაა.
