რუსეთში აღკვეთილი კიდევ ერთი ტერაქტი და ISIS-დან დაბრუნებული ჩეჩენი გოგონას ჩანაწერები

რუსეთის ხელისუფლების განცხადებით, აშშ-ის ცენტრალური სადაზვერვო კომიტეტისა (CIA) და ამერიკული დაზვერვის ოპერატიული თანამშრომლების მიერ მიწოდებული ინფორმაციის საფუძველზე, სანკტ-პეტერბურგში ტერორისტული აქტების სერია აღკვეთეს.

სატელეფონო საუბარში რუსეთის პრეზიდენტმა ვლადიმირ პუტინმა დონალდ ტრამპს მადლობა გადაუხადა ინფორმაციისთვის, რომელიც გამოიყენეს თავდასხმების დაგეგმვაში ეჭვმიტანილი "ტერორისტების ჯგუფის დევნისა და დაკავებისთვის".

საინფორმაციო სააგენტო interfax-ის ინფორმაციით, თეთრ სახლს ჯერჯერობით სატელეფონო ზარის შესახებ განცხადება არ გაუვრცელებია. რაც შეეხება კრემლს, ამ განცხადების გავრცელებამდე, ორი დღით ადრე, რუსეთის ფედერალური უსაფრთხოების სამსახურმა აღნიშნა, რომ დაკავებულია ისლამისტურ ექსტრემიზმში ეჭვმიტანილი 7 პირი, რომლებსაც ბრალად სანკტ-პეტერბურგში ტერორისტული თავდასხმების სერიის დაგეგმვა ედებათ.

რუსული მედიის ინფორმაციით, დაკავებულები აფეთქებას ყაზანის საკათედრო ტაძარში გეგმავდნენ, თუმცა, ქალაქის სხვა ადგილებზე ჰქონდათ მონახაზი, სადაც მასობრივი თავშეყრის ადგილებში, თვითმკვლელები ასაფეთქებელი მოწყობლობის მოქმედებაში მოყვანას აპირებდნენ.

რუსეთის სპეცსამსახურებმა ტერორიზმთან კავშირის ბრალდებით, 5 ადამიანი დააკავეს. 15 დეკემბერს რუსმა ძალოვნებმა ევგენი ეფიმოვი დააკავეს, რომელმაც სასამართლოს განუცხადა, რომ საკუთარ ბინაში ამზადებდა ასაფეთქებელ მოწყობილობებს, რათა 17 დეკემებერს, ყაზანის ტაძარში აეფეთქებინა.

რუსული მედიის ინფორმაციით, მეორე დღეს, ასეთივე აფეთქების მოწყობა, ანტონ კობცას "ავტორობით", კიდევ რამდენიმე ადგილას იგეგმებოდა... ეჭვმიტანილებს შორის არის ინგუშეთში მცხოვრები ალისხან ესმურზიევი და დაღესტნელი შამილ ომარგაჯიევი, რომლებიც ტაჯიკეთის მკვიდრ ფირუზ კალავუროვთან ერთად დააკავეს.

ФСБ-ს ინფორმაციით, ერთ-ერთი დაკავებულის ბინაში, დიდი რაოდენობით იარაღი, თვითნაკეთი ასაფეთქებელი მოწყობილობები და "ექსრტემისტული ლიტერატურა" ამოიღეს.

რამდენიმე დღის წინ, რუსულმა მედიამ ჩეჩნეთში დაბრუნებული 19 წლის გოგონას ჩანაწერი გაავრცელა, სადაც ის "ისლამურ სახელმწიფოში" გატარებულ პერიოდს იხსენებდა და კადიროვის ხელისუფლებას გროზნოში უსაფრთხო თავშესაფარს სთხოვდა.

"შევხვდებითო, - ეტყოდნენ ერთმანეთს "ძმები" და შემდეგ იკარგებოდნენ... თავიდან არ ვიცოდი რას ნიშნავდა შეხვედრა. მეგონა, რომელიმე კონკრეტულ ადგილას უნდა შეხვედროდნენ ერთმანეთს... ზედმეტი კითხვების დასმის უფლება არ გვქონდა, ამიტომ ჩემით მივხვდი, - ზეცაში შეხვედრას გულისხმობდნენ... სადმე, რომელიმე ქვეყანაში, ან სირიასა და ერაყში, რომელიმე ხალხმრავალ ადგილას მიდიოდნენ და თავს იფეთქებდნენ... ასე ის გოგონებიც მოიქცნენ, რომელთაც ქმრები მოუკლეს. ამის გაკეთებას არავინ გვაძალებდა, მაგრამ ისე გვესაუბრებოდნენ, რომ ბევრს თავად უნდოდა ამ გზით საყვარელ მეუღლესთან, ძმასთან ან შვილთან შეხვედრა... ", - წერს ახალგაზრდა ფეთი, რომლის თქმითაც, მალევე მიხვდა, სადაც მოხვდა, თუმცა, იქიდან თავის დაღწევა სრულიად შემთხვევით მოახერხა...

რუსული მედია გოგონა უსაფრთხოების გამო, მის გვარს არ აკონკრეტებს, თუმცა, წერს, რომ პრობლემა აშკარად მწვავედ დგას რუსეთსა და მთელ მსოფლიოში და შესაბამისმა სამსახურებმა მჭიდრო თანამშრომლობის შედეგად ეს მძიმე ეტაპი ერთობლივად უნდა დაძლიონ...

ტერორიზმთან კავშირში ბრალდებულების დაკავების შემდეგ, რუსეთსა და ამერიკის ლიდერების სატელეფონო საუბრისას, ვლადიმირ პუტინი შეეცადა დონალდ ტრამპი დაერწმუნებინა, რომ "რუსული სპეცსამსახურები, ტერორიზმთან დაკავშირებით, რომელიც ამერიკას ან მის მოქალაქეებს ეხებათ, ინფორმაციის მიღების შემთხვევაში, დაუყოვნებლივ გადასცემენ ამერიკას და მათ პარტნიორ ქვეყნებს ყველანაირ ინფორმაციას, ისე, როგორც ამას ადრე აკეთებდნენ..."

ლალი პაპასკირი

AMBEBI.GE