აფხაზეთში ნარკომანიასთან ბრძოლას ცდილობენ - როგორ ეხმაურებიან ენგურს გაღმა მარიხუანას დეკრიმინალიზაციას?

სოხუმში, ნარკოტიკების წინააღმდეგ ბრძოლა ახალ ფაზაში შევიდა, თუმცა, რამდენად ეფექტური იქნება ეს გზა, ჯერჯერობით უცნობია. გასულ დღეებში, ე.წ. შს სამინისტროდან ნარკოტიკული ნივთიერებების უკანონოდ გამოყენების ბრალდებით, 18 თანამშრომელი გაათავისუფლეს, მათ ნაწილს ფულადი ჯარიმის გადახდა და 15 დღიანი პატიმრობა დაეკისრა.

უკვე წლებია, აფხაზეთის დე ფაქტო ხელმძღვანელობა ნარკომანიას "ეროვნული უსაფრთხოების" პრობლემას უწოდებს. ე.წ. შს მინისტრ ასლან კობახიას თქმით, "ორგანიზებულ დანაშაულთან და დანაშაულის სხვა საშიშ სახეობებთან, მათ შორის ნარკომანიასთან ბრძოლა, მარტო ძალიან უჭირს. საჭიროა, ქმედითი ნაბიჯების გადადგმა", - აღნიშნა მან რუსეთ-აფხაზეთის "ერთობლივი საინფორმაციო-საკოორდინაციო ცენტრის" შესახებ საუბრისას.

სწორედ ამ ცენტრის მუშაობის პირველი ნაბიჯებია შს თანამშრომლების გათავისუფლება. თუმცა, კონკრეტული პასუხი კითხვაზე, - როგორ უნდა მოხდეს ნარკომანიის პრევენცია, ჯერ კიდევ არ არსებობს.

ნარკოდამოკიდებულებთან მომუშავე "ჯანსაღი ცენტრის" ხელმძღვანელი თემურ ქარდი ამბობს, რომ ყველანაირი ინიციატივა, რომელიც ამ მიმართულებით გატარდება, მისაღებია, თუკი ის ნამდვილად ემსახურება ნარკოტიკების გავრცელების პრევენციას, რადგან ვითარება კრიტიკულ ზღვარს გადასცდა და წელს, შარშანდელზე მეტი ახალგაზრდა მოიხმარს ნარკოტიკს, განსაკუთრებით გავრცელებულია სააფთიაქო ნარკომინია, ე.წ. ლირიკა, რომელიც თითქმის ყველასთვის ხელმისაწვდომია.

დე ფაქტო გენპროკურატურის წარმომადგენელი ადამურ თარბა მიიჩნევს, რომ ნარკოტიკებთან ბრძოლა საზღვრიდან უნდა დაიწყოს.

"ჯერ კიდევ გაზაფხულში განვიხილავდით ამ პრობლემის მოგვარების გზებს, გვქონდა გეგმები და მის განხორციელებას ეტაპობრივად ვაპირებდით, თუმცა, ყველაფერი გაცილებით რთულად არის, ვიდრე გვეგონა და ასე, ერთი ხელის მოსმით არ მოგვარდება... აფხაზეთში უმძიმესი მდგომარეობაა, მეტადონისა და მარიხუანას გავრცელების კუთხით. მეტადონი საზღვარგარეთიდან შემოდის, ამიტომაც, საზღვარზე კონტროლი უნდა გამკაცრდეს...

უამრავი მომხმარებელი და რეალიზატორი გვყავს, ნარკოტიკები აფხაზეთში წარმოუდგენლად მარტივად, პირდაპირ ჯიბით შემოაქვთ, იმიტომ, რომ საზღვრის კონტროლი არ არსებობს... სამართალდამცველები ამ ნაკადიდან მხოლოდ მცირე ნაწილის გამოვლენას ახერხებენ, რაც, ცხადია, საკმარისი არ არის," - აცხადებს თარბა.

ე.წ. შს სამინისტროს ახალ წამოწყებას იმედიანი განწყობით ხვდება ადგილობრივი მოსახლეობის ნაწილი და მიაჩნიათ, რომ პრევენცია, თუნდაც თვალსაჩინოებისთვის, მაღალჩინოსნებიდან უნდა დაიწყოს. გზებზე ობიექტიური კონტროლი უნდა დაწესდეს. ნარკოტიკული ნივთიერების ზეგავლენის ქვეშ მძღოლს, პირველივე შემთხვევაზე უნდა ჩამოერთვას მართვის მოწმობა უვადოდ, პლუს, გადაიხადოს ფულადი ჯარიმა ან სულაც შეუფარდონ ერთთვიანი პატიმრობა, – წერენ აფხაზები.

საზოგადოების მეორე ნაწილის თქმით, 18-ვე აფხაზი "ძალოვანი", რომელიც ნარკოტესტის შედეგად გაათავისუფლეს, რანგით დაბალი იყო, რაც იმას ნიშნავს, რომ "სამინისტროში", "პარლამენტსა" და ნებისმიერ დაწესებულებაში არიან გავლენიანი ადამიანები, რომლებიც გარდა იმისა, რომ მოიხმარენ ნარკოტიკს, ამ დანაშაულებრივ ბიზნესს კურირებენ კიდეც და შემოსავალიც აქვთ, თუმცა მათი შემოწმება არავის მოსვლია აზრად...

ასევე, აფხაზები ნახევრად იუმორით წერენ, რომ მათ სოციალური ქსელის საშუალებით გაიგეს, რომ "საქართველოში მარიხუანას "ლეგალიზაციის" (როგორ მოსალოდნელი იყო, ტერმინოლოგიების სწორი აღქმა იქაც პრობლემაა. -ავტ.) შესახებ და ახლა იქით ჩვენები მხოლოდ ნარკომანიის სამკურნალოდ აღარ გადავლენ... - წერენ ისინი და გაცხარებული კამათობენ, თუ რა შედეგს მოუტანს ეს "საქართველოს..." ერთი ნაწილის მტკიცებით, "ბოლო წლებია, ენგურს იქით, ამ პრობლემის დაძლევის გზები და მენტალობაც შეიცვალა". 

ლალი პაპასკირი

AMBEBI. GE