19
ივლისიდღის ზოგადი ასტროლოგიური პროგნოზი
2015 წლის 30 ნოემბერი. ზუსტად 2 წლის წინ, ქართულ სატელევიზიო ბაზარზე ახალი ამბების ტელევიზია "პალიტრანიუსი" გამოჩნდა, რომელმაც მაყურებლის ყურადღება მაშინვე მიიპყრო და თავისი ადგილიც მალევე დაიმკვიდრა. დღეს 2017 წლის 30 ნოემბერია და ახალი ამბების ტელევიზია მისთვის მნიშვნელოვან იუბილეს აღნიშნავს...
"ამბიციური იდეა დავისახეთ მიზნად - შეგვექმნა განსხვავებული ფორმატის ტელევიზია და მოკლე პერიოდში, ერთი შეხედვით, ამბიციური მიზანი, რეალობად ვაქციეთ, ორი წლის განმავლობაში შევძელით მოგვეპოვებინა მაყურებლის ნდობა და დაგვეკავებინა ანგარიშგასაწევი ადგილი ქართულ ტელესივრცეში. ამ პერიოდის განმავლობაში "პალიტრანიუსმა" ნამდვილად შეიძინა მაყურებლები და ასე თუ ისე, თავისი სათქმელი თქვა," - გვეუბნება "პალიტრანიუსის" მარკეტინგის მენეჯერი თამთა ასათიანი.
2017 წელი ერთგვარი გარდატეხის პერიოდი იყო ტელევიზიისთვის - 2016 წელს რისკზე წავიდნენ, რომელმაც გაამართლა. ტელევიზიას არ აქვს ფილმები, სერიალები და ორიენტირებულია საათში ერთხელ მუდმივად განახლებად საინფორმაციო გამოშვებაზე.
"...მაგრამ ეს არ არის მხოლოდ პოლიტიკური სიახლეები, აქ ნებისმიერი გემოვნების ადამიანი იპოვის თავის მიმართულებას, ეს არის ეკონომიკა, სპორტი, კულტურა... ამ ორი წლის განმავლობაში ვგრძნობთ, რომ მაყურებელი დღითი დღე იზრდება, ძალიან ბევრი ადამიანი გვენდობა და ინფორმაციის სანდო წყაროდ სწორედ "პალიტრანიუსს" ირჩევს.
მუდმივად ვაკონტროლებთ რეიტინგებს, რაც ჩვენთვის მნიშვნელოვანია და აქაც სასიხარულო მონაცემებია. "პალიტრანიუსის" წუთობრივი რეიტინგი 2017 წელს 100%-იან ზრდას განიცდის.
"ტრი მედია ინტელიჯენსის" მონაცემებით, რომელიც სატელევიზიო აუდიტორიას ზომავს, ბოლო 10 თვის მონაცემებით, ზოგადად, მაყურებლის რიცხვი შემცირებულია ტელეეკრანთან, რადგანაც უმეტესობა ინფორმაციას ინტერნეტით იღებს, თუმცა ამ ფონზეც, მაყურებლის რაოდენობა მკვეთრად გაეზარდა "პალიტრანიუსს". ამ შემთხვევაში 57%-იანი ზრდაა (ეს წუთში მაყურებლის საშუალო რაოდენობაა). ასევე თამამად შემიძლია ვთქვა, რომ სოციალური ქსელის საშუალებითაც, ძალიან აქტიურია ჩვენი მაყურებელი" - გვეუბნება ასათიანი.
მაკა ლომიძე, "პალიტრანიუსის" გენერალური პროდიუსერი: "მსგავსი ფორმატის ტელევიზია საქართველოში პირველებმა სწორედ ჩვენ შევქმენით. რისკი ნამდვილად იყო, რომ ასეთი ნიშური ტელევიზია შეგვექმნა. რა თქმა უნდა, არსებობს მსოფლიოში მსგავსი ფორმატის არხები, რომლის ანალოგით გავაკეთეთ. 24-საათიანი მუშაობა საკმაოდ რთულია, მაგრამ ეს სირთულე ჩვენი გუნდის მიერ დაძლეულია. გვაქვს 25 ახალი გადაცემა (ეკონომიკაზე, კულტურაზე, საინტერესო ადამიანებზე), ვართ ოპერატიულები, რაც ძალიან მნიშვნელოვანია, ასევე მიუკერძოებლები, ვაწვდით მხოლოდ ფაქტებს და არ გვაქვს დამოკიდებულება.
ყველაფერი მუდმივ განახლებას ექვემდებარება და სწორედ ამიტომ ეთერში ჩავუშვით ახალი პროექტი, რომელიც 37 წლის რეპრესიებს ეხება. სულ ახალია. გარდა ამისა, გვაქვს ახალი პროდუქტი - ვიდეობლოგი, მოხეტიალე ჟურნალისტი დადის ქალაქში და თავის თვალსაზრისს აფიქსირებს. ამ გადაცემას განსხვავებული ფორმატი აქვს, ეს მულტიმედია ჟურნალისტიკაა, რომელმაც ჩვენს ტელევიზიაში ფეხი აქტიურად მოიკიდა. ყველაფერი ერთად კი არის ხარისხიანი და მრავალფეროვანი სპექტრი, რომელმაც უნდა ატაროს სახელი "პალიტრანიუსი". საბოლოოდ კმაყოფილი ვარ, რომ ეს ნაბიჯი გადაიდგა და მოკლე დროში ასეთი განვითარება შევძელით. ჩვენი სურვილია, ვიყოთ - ყველაზე მაგრები" - გვეუბნება ახალი ამბების ტელევიზიის გენერალური პროდიუსერი.
თორნიკე ყაჯრიშვილი, გადაცემა "ტყვიის საფასურის" ავტორი:
"ეს ერთ-ერთი ახალი გადაცემაა "პალიტრანიუსის" ეთერში. პირველი გადაცემა ეთერში 3 კვირის წინ გავიდა, რომელიც ყოველ შაბათს იქნება ეთერში. გადაცემას სიმბოლური სახელი დავარქვით. 30-იან წლებში, როცა ადამიანებს ხვრეტდნენ, ოჯახის წევრებს, ტყვიის გილზას უგზავნიდნენ, რომლის საფასური - 2 კაპიკი მათ უნდა გადაეხადათ. გადაცემის სახელწოდებაც აქედან მოვიდა... პროექტის გმირების ისტორიები შერჩეულია შინაგან საქმეთა სამინისტროს არქივიში დაცული მასალებიდან.
მაქსიმალურად ვცდილობთ, ვიპოვოთ მემკვიდრეებიც... ამ ადამიანების უმრავლესობამ, ვისაც წინაპრები დაუხვრიტეს, გადაუსახლეს, მიზეზი არ იციან და ხშირად ჩვენი გადაცემის საშუალებით იგებენ... ბევრი გამოხმაურება აქვს გადაცემას, მათ შორის, კრიტიკულიც, რაც ნიშნავს, რომ გვიყურებენ.
"პალიტრანიუსის" დაარსებამდე "პალიტრა ტვ" იყო და პირველი სიუჟეტი, მახსოვს, კონფლიქტის ზონაში პატარა კამერით გადავიღე. მერე თვითონ დავამონტაჟე, ყველაფერი მე გავაკეთე. იმ დროს ჩვენმა ერთ-ერთმა ოპერატორმა ჩემზე თქვა, - ამ ბიჭს უთხარით, ტელევიზია მაგის საქმე არ არის, გაზეთს მიხედოსო. ეს ნათქვამი დამამახსოვრდა და იმის მერე იმ ჟინით მოვდივარ, რომ ტელევიზია ბოლომდე ჩემი საქმე გახდეს.
ამ ხნის მანძილზე ვიმუშავე არაერთ თემაზე, მათ შორის, "თავისუფალ თემაზეც" ვმუშაობ. ასე ნელ-ნელა გავიზარდე "პალიტრანიუსთან" ერთად. ჩემი ახალი პროექტი კი უკვე სერიოზული განაცხადია ამ ორწლიანი მუშაობის შემდეგ. დარწმუნებული ვარ, "ტყვიის საფასურის" საშუალებით არაერთი ადამიანის ისტორია გაცოცხლდება".
იხილეთ ვიდეო: ტელეკომპანია PALITRANEWS 2 წლისაა
ლალი ფაცია
