პოლიმერული თიხის სამკაულები Poly Crea-სგან, რომლებიც ყველა ქალისთვის ექსკლუზიურად იქმნება

პროფესიით მხატვარი ნინო კიკნაძე წლებია, პოლიმერული თიხით განსაკუთრებულ სამკაულებს ქმნის. საყურე, ყელსაბამი, ბეჭედი - თითოეული ნაკეთობა ექსკლუზიურია და პრინტი არ მეორდება. მომხმარებლებიც უმეტესად ის ქალბატონები არიან, რომლებიც მხიარულ, თამამ ფერებს ანიჭებენ უპირატესობას.

"პროფესიით მხატვარი ვარ. ყოველთვის მიზიდავდა სამკაულების დიზაინი. აშშ-ში ცხოვრებისას აღმოვაჩინე პოლიმერული თიხა. მომეწონა და ჩემთვის გარკვეული ნაკეთობების დამზადება ვცადე. იმ პერიოდში საქართველოში ეს მართლას უცხო იყო და სამშობლობში დაბრუნებულმა გადავწყვიტე, ამ საქმე მივყოლოდი. რეალურად ბიზნესის დაწყება არ დამიგეგმავს. უბრალოდ, ძალიან მომწონდა ამ მასალით მუშაობა და თან საზოგადოებაშიც საკმაოდ დიდი დაინტერესება გამოიწვია," - ამბობს სტარტაპერი ნინო კიკნაძე.

ნინომ მოგვიანებით სტარტაპი Poly Crea შექმნა და მის მიერ დამზადებული სამკაულები სწორედ ამ დასახელებით არის ცნობილი. დამფუძნებელიც, დიზაინერიცა და შემსრულებელიც თავადაა. დიდი წარმოება არ აქვს და არც ძალიან ბევრ სამკაულს ქმნის. სწორედ ეს არის Poly Crea-ს ერთ-ერთი უპირატესობაც. თითოეული ნაკეთობა ექსკლუზიურია.

"ჩემი აქსესუარები გათვლილია ნებისმიერი ასაკის ქალბატონზე. ძირითადად ზაფხულის ფერებს ვიყენებ. ეს სამკაულები ჯინსებს განსაკუთრებით უხდება, თუმცა კლასიკური სტილის შესაფერისი ნაკეთობებიც მაქვს. მასალად კი ყოველთვის პოლიმერულ თიხას ვიყენებ," - განმარტავს ნინო კიკნაძე.

სამკაულების ღირებულება მეტ-ნაკლებად ყველასთვის მისაღებია. მაგალითად, საყურის ფასი 40-50 ლარია. რიგ შემთხვევაში დიზაინერი ძვირფას ლითონსაც იყენებს, რაც ნაკეთობის ღირებულებაზე, რა თქმა უნდა, გავლენას ახდენს.

"სამკაულები ახლა უკვე საკმაოდ მოთხოვნადია. ბევრი მუდმივი მომხმარებელი მყავს. ჩემი ნაკეთობები არტია. ამიტომ უფრო იმ ქალბატონებს იზიდავს, რომლებიც მხიარულ, თამამ ფერების იხდენენ," - ამბობს ნინო.

ზოგადად, საქართველოში ხელნაკეთ სამკაულებზე მოთხოვნა მზარდია. ეს კი Poly Crea-სა და სხვა მსგავსი სტარტაპების დამსახურებაა.

"სამკაულების კეთება უფრო შემოქმედებაა, ვიდრე - ბიზნესი. როდესაც აკეთებ საქმეს, რომელიც გსიამოვნებს, არ გიჭირს. თან ეს ყველაფერი შემოსავლიანიც ხდება. ამჟამად "თიბისი ბანკის" პროგრამა სტარტაპერის მონაწილე ვარ და იმედი მაქვს, რომ სტარტაპერი ჩემი სამკაულების პოპულარიზაციას კიდევ უფრო შეუწყობს ხელს", - ამბობს ნინო კიკნაძე.

#სტარტაპერი #გვეამაყები

ნანა მღებრიშვილი

AMBEBI.GE