4
ივნისიდღის ზოგადი ასტროლოგიური პროგნოზი
The Telegraph-ის ინფორმაციით, შესაძლოა, იტალიელმა ქირურგმა ჩინელ კოლეგებთან ერთად ჩატარებული ოპერაციით, კაცობრიობის ისტორიაში გადატრიალება მოახდინოს;
ჩინეთში, ჰარბინის უნივერსიტეტის ქირურგების ჯგუფის განცხადებით, მათ წარმატებით დაასრულეს ადამიანის თავის გადანერგვა მიცვალებულზე. ამის შესახებ, იტალიელმა ქირურგმა, სერჯიო კანავარომ ვენაში ჩატარებულ საგანგებო პრესკონფერენციაზე განაცხადა.
"ამ ეტაპზე, გარდაცვლილი ადამიანის მკვდარი ტვინის სრულად გადატანა მოხდა" - აცხადებს კანავარო, რომლის თქმით, ეს ოპერაცია 18 საათის განმავლობაში მიმდინარეობდა. მისივე თქმით, ის ჩინეთში იმიტომ ჩატარდა, რომ ამერიკასა და ევროპაში ამ სიახლის მხარდამჭერები და იდეის გამზიარებლები ვერ იპოვეს.
იტალიელი ქირურგი განმარტავს, რომ სპეციალისტებმა შეძლეს ხერხემალი, ნერვები და სისხლძარღვები მიეერთებინათ... "ჩვენ ყველაფერს შევცვლით. ყველა მეუბნებოდა, რომ ეს შეუძლებელი იყო, მაგრამ ოპერაციამ წარმატებით ჩაიარა," - აცხადებს ის.
ჯერჯერობით უცნობია, ვისი სხეული გამოიყენეს ჩინეთში ჩატარებული ექსპერიმენტისას, თუმცა, კანავარო ირწმუნება, რომ სამეცნიერო სტატია თავის ტრანსპლანტაციასთან დაკავშირებით, უახლოეს დღეებში გამოქვეყნდება. ასევე, აღნიშნავს, რომ 2017 წლის ბოლოსთვის გადადებული ოპერაციები რამდენიმე დღეში ჩატარდება. მისივე თქმით, ცოცხალი ადამიანის თავის ტრანსპლანტაციაც ჩინეთში იგეგმება.
2016 წელს კანავარო აცხადებდა, რომ მან წარმატებით დაასრულა მაიმუნების თავის ტრანსპლანტაცია, თუმცა, ეს მაშინ ფართო საზოგადოებამ ვერ მიიღო. ეს იდეა იტალიელ ქირურგს ჯერ კიდევ 2015 წელს ჰქონდა, - ის მოხალისის სხეულზე თავის გადანერგვას, ზურგისა და თავის ტვინის "შეერთებას", განსაკუთრებული პროცედურების საშუალებით გეგმავდა, რომელსაც GEMINI პროტოკოლს უწოდებდა.
პირველი მონაწილეც ჰყავდა, რომელიც კანავაროს ექსპერიმენტში მონაწილეობაზე დასთანხმდა, - ეს არის რუსი პროგრამისტი ვალერი სპირიდონოვი, რომელიც ეტლით გადაადგილდება - მას კუნთების დისტროფია აქვს... ცნობილი გახდა, რომ პირველი ოპერაცია ჩინეთში ჩატარდებოდა. ორივე მხარე მუშაობისთვის მზად იყო, ბოლო დეტალები ზუსტდებოდა - პაციენტი ოპერაციამდელ კვლევებს იტარებდა. ექიმის გათვლებით, ოპერაცია 36 სააათს გაგრძელდებოდა და 11 მილიონი დოლარამდე დასჭირდებოდა. დონორად ჯანმრთელი ადამიანის სხეულს გამოიყენებდნენ, რომლის ტვინი მკვდარი იქნებოდა.
თუმცა, გუშინ ცნობილი გახდა, რომ იტალიელმა ქირურგმა რუსი პაციენტის ოპერაცია გაურკვეველი ვადით გადადო, - ვალერი სპირიდონოვმა ინტერნეტგამოცემა "ზვეზდასთან" საუბარში აღნიშნა, რომ მისმა მომავალმა ქირურგმა ოპერაცია მიცვალებულზე წარმატებით ჩაატარა, "თუმცა, ჩვენ ახლა მიცვალებულზე კი არა, ცოცხალ ადამიანზე გვჭირდება თავის გადანერგვა, რაც თანამედროვე ტექნოლოგიების შესაძლებლობების დემონსტრირება იქნება" - აღნიშნავს სპირიდონოვი.
რაც შეეხება, ექსპერიმენტულ ოპერაციას, ცოცხალი ადამიანის თავის ტრანსპლანტაციასთან დაკავშირებით, - ჯერჯერობით გაყინულია, რადგან კანავაროს ჩინეთი აფინანსებს, ამისთვის მან ქირურგს ლაბორატორია დაუთმო და შესაბამისად, ჯერჯერობით, მათ პროექტებზე მუშაობს. "ვინაიდან, მე დოქტორ კანავაროს არაფერს ვუხდი, ის ჩემთან მუშაობას ამ ეტაპზე არ აპირებს, - მას ჩინურ მხარესთან აქვს შეთანხმება დადებული და ჩემი ოპერაციის საკითხი, გაურკვეველი ვადით გადაიდო...", - ამბობს სპირიდონოვი.
დასავლელი ექიმები კანავაროს არასერიოზულად აფასებენ და მის იდეებს, "ფანტასტიკის სფეროს" უწოდებენ.
ლალი პაპასკირი
