ნოდიკო ტატიშვილისა და სალომე ბაკურაძის "სიყვარულის ამბავი" ერთ კლიპში - "ისე ითამაშეს, ვემიჯნები აზრს, რომ მეგობრები არიან"

რამდენიმე დღის წინ მომღერლებმა ნოდიკო ტატიშვილმა და სალომე ბაკურაძემ მსმენელს მათთვის შექმნილ ახალ სიმღერაზე გადაღებული კლიპი შესთავაზეს, რომლის ავტორები ლილიკო ნემსაძე და ირინა სანიკიძე არიან, კლიპის რეჟისორი ნესტან სინჯიკაშვილია, ხოლო პროდიუსერი - თაკო დოლაბერიძე. სიმღერას "ერთხელ წვიმიან ქალაქში" ჰქვია.

"ჩვენ შევხვდით ერთხელ წვიმიან ქალაქში, არავინ აღარ გვახსოვდა სხვა, ცხოვრების ამ ერთ ფურცელს დრო გადაშლის, არ ვიცით, რა გველოდება ხვალ" - ეს პატარა მონაკვეთია მათი დუეტიდან.

ვიდეორგოლი მაყურებელმა მოიწონა და აპლოდისმენტებით დააჯილდოვა. მომღერლებს იმედი აქვთ, რომ ახალ ნამუშევარს ფართო მაყურებელიც შეიყვარებს. გარდა იმისა, რომ სცენაზე შეხმატკბილებული პარტნიორები არიან, ნოდიკოს და სალომეს მრავალწლიანი მეგობრობაც აკავშირებთ და ვიდეორგოლსა და ერთობლივ სიმღერაზეც დიდი ხანი ოცნებობდნენ. ოცნება მხოლოდ ახლა აუხდათ.

"ვიდეო დაკარგულ და შემდეგ ნაპოვნ სიყვარულზე უნდა ყოფილიყო. იდეები ნესტან სინჯიკაშვილს გავუმხილეთ, რომელმაც ჩვენს ჩანაფიქრს ძალიან მალე ფრთები გაცილებით უკეთ შეასხა, ვიდრე ჩვენ წარმოგვედგინა... ეს ის შემთხვევაა, როცა ტექსტი და მუსიკა ერთმანეთს უხდება. ისეთია, რომ ალბათ ყველას ცხოვრებაში მომხდარა მსგავსი რამ, ნებისმიერს გადახდენია" - გვეუბნება სალომე ბაკურაძე.

ნეტან სინჯიკაშვილი, რეჟისორი:

- ნოდკო და სალომე ისეთი ნიჭიერები არიან, მინდა, ფილმშიც გადავიღო... ამ კლიპზე მუშაობა არ იყო შრომა, ეს ერთი დიდი სიამოვნება აღმოჩნდა. მგონი, ხალხს მოეწონა და ამით ბედნიერი ვარ... კლიპის კონცეფციაზე სამივე ერთად შევთანხმდით - გვინდოდა, პატარა ფილმივით გამოსულიყო. ერთ დღეში გადავიღე და დავამონტაჟე. პირველად ხდება, რომ გადაღებული ვიდეოდან მასალა ვერ ამოვარჩიე, ერთმანეთზე უკეთესი კადრები იყო, არ ვიცოდი, რომელი ჩამესვა. ბოლოს კულისებს მიღმა კადრებიც ვაჩვენეთ, რომლითაც მაყურებელი გახალისდა...

Ambebi.ge-ს კლიპის შესახებ აზრი რამდენიმე ცნობილმა ადამიანმა გაუზიარა:

გოგოლა კალანდაძე, მსახიობი:

- არაჩვეულებრივი კლიპია... ყოჩაღ ნესტანს, რომ ასეთი რეჟისორული ნამუშევარი გვაჩვენა. საოცარი ნიჭი აქვს. მიყვარს ნოდიკო და სალომე - ზუსტად ვიცოდი, რომ მათი ვიდეორგოლი ასეთი კარგი გამოვიდოდა. წარმატებებს ვუსურვებ, მომავალშიც კარგი, ლამაზი სიმღერებით დავეჯილდოვებინეთ. კულისებს მიღმა კადრებმა კი სულ სხვა ემოცია მოიტანა. ასეთი რამ სხვა კლიპების პრეზენტაციაზე არასოდეს მინახავს და ესეც მომეწონა. განსხვავებული იყო.

ხატია შამუგია, პიარმენეჯერი:

- ეს სიმღერა პირველი გაჟღებისთანავე მოვისმინე კონცერტზე, რომელიც მიმყავდა... იმ დღის ჩაწერილი იყო. მომეწონა, მაგრამ მასზე კლიპი ვერ წარმოვიდგინე. ნოდიკოს და სალომეს რომ არ ვიცნობდე და არ ვიცოდე, მათი მეგობრობის შესახებ, ვერ დავიჯერებდი, რომ შეყვარებულები არ არიან, კლიპში ისეთი საოცარი არტისტიზმი ვიხილე. მათი სამსახიობო მონაცემები დავაფასე. ვულოცავ და მიხარია, რომ ლამაზი კლიპი შეემატა მქრქალ შოუ-ბიზნესურ ცხოვრებას.

თათია ედიშერაშვილი, მსახიობი:

- აბსოლუტურად გასაგები, სუფთა ქართული, რეალური, ბუნებრივი კლიპი წარმოგვიდგინეს. ეს ყველაფერი რეჟისორულად ძალიან სწორად იყო დანახული. რაც მთავარია, იყო ფერადი. ოპერატორის ნამუშვარიც არაჩვეულებრივია. სიმღერა ფანტასტიკურია და გამოსვლის დღიდან ვგულშემატკივრობ. კლიპი, სიუჟეტურად, სიმღერას ნამდვილად მიესადაგება. ეს ვიდეორგოლი ჩემთვის მოკლემეტრაჟიანი კინოა, ვფიქრობ, ყველა სტანდარტს პასუხობს. დიდი ხანია, ასეთი სასიამოვნო არაფერი მინახავს. ისე ითამაშეს, ვემიჯნები აზრს, რომ მეგობრები არიან... მათი სამსახიობო ოსტატობის შეფასება მომინდა. საერთოდ, სურვილი გამიჩნდა, ამ ისტორიის თანამონაწილე ვყოფილიყავი. ვულოცავ, პროექტი წარმატებით შედგა.

გიორგი გასვიანი, მსახიობი, ტელეწამყვანი:

- რთულია, მეგობრებმა ასეთი სასიყვარულო სცენები დადგან, მით უეტეს, რომ მსახიობები არ არიან. მომეწონა მათი ამბავი. გვაკლია ასეთი ხარისხიანი კლიპები. მომეწონა კადრებიც...

ლალი ფაცია

Ambebi.ge