"რუსულ-ოსური ურთიერთობების" ახალი ეტაპი და ამერიკა-საქართველოს მიერ "დაჩაგრული" ნაურუს პრეზიდენტი

რუსეთში, ე.წ. სამხრეთ ოსეთის "პრეზიდენტის", ანატოლი ბიბილოვის პირველი "სამუშაო ვიზიტი" გაიმართა. ეს იყო მისი პირველი "ოფიციალური ვიზიტი" მოსკოვში, თუმცა, ბიბილოვი ერთხელ უკვე შეხვდა პუტინს სოჭში...

ბოლო შეხვედრაზე პუტინმა და ბიბილოვმა რამდენიმე მნიშვნელოვანი საკითხი განიხილეს, მათ შორის იყო "რუსულ-ოსური ორმხრივი შეთანხმება და მეტი ინტეგრაცია..."

"ჩვენ ვიცით სამხრეთ ოსეთის ისტორია, თუ რა მოხდა 9 წლის წინ, 2008 წელს, მას შემდეგ სიტუაცია დარეგულირებისა და სტაბილიზაციისკენ მიდის... რუსეთი ყველაფერს აკეთებს, რომ უსაფრთხოების საკითხები გაძლიერდეს, ვგულისხმობ, სამხრეთ ოსეთის სამხედრო და სასაზღვრო საკითხებს. ჩვენ ასევე, გვინდა, რესპუბლიკა სოციალ-ეკონომიკურად განვითარდეს. ჩვენი შეხვედრისას დიდი დრო დაეთმო ვაჭრობისა და ინვესტიციების, სოციალური სფეროს განვითარებას... რუსეთი სამხრეთ ოსეთის ძირითადი სავაჭრო პარტნიორია და ჩვენ ორივემ უნდა ვეცადოთ, ეს ურთიერთობა უფრო ხელსაყრელი გახდეს,"- აღნიშნა პუტინმა ბიბლოვთან შეხვედრის შემდეგ რუსულ მედიასთან საუბარში.

ურთიერთობების ახალ ეტაპზე გადასვლის შესახებ კმაყოფილებით საუბრობს ცხინვალის რეგიონის ლიდერიც. ბიბილოვის თქმით, "რუსულ-ოსური ურთიერთობები დინამიურად ვითარდება და ბოლო შეხვედრაზე, დაახლოებით 100 შეთანახმებას მოეწერა ხელი, მათ შორის არის რუსეთის მოქალაქეობის მიღება და რუსეთის ტერიტორიაზე სამხრეთ ოსეთის მოქალაქის უვადოდ ყოფნა. ასევე დაიწყება ჯანდაცვის სფეროში არსებული პრობლემების მოგვარება, - ჩვენს მოქალაქეებს საშუალება ექნებათ რუსეთის სამედიცინო მომსახურებით ისარგებლონ",- განაცხადა ბიბილოვმა, რომელიც, როგორც ოსური მედია ამბობს, "ძალიან მტკივნეულად განიცდის ოსების საქართველოში სამკურნალოდ ჩამოსვლის საკითხს".

კავკასიის პრობლემებისა და რეგიონალური უსაფრთხოების ცენტრის თანამშრომელი ნიკოლაი სილაევი პუტინისა და და ბიბილოვის შეხვედრის შეფასებისას ამბობს, რომ "რუსულ-ოსური თანამშრომლობის ვექტორი განსაზღვრულია და არ შეიცვლება... სენსაციურ ცვლილებებს არ უნდა ველოდოთ, თუმცა, სამხრეთ ოსეთისთვის, თუნდაც ბიბილოვის პოზიციების გასამყარებლად და შიდაპოლიტიკური სტაბილურობისთვის პუტინთან შეხვედრა, ძალზე სასარგებლოა".

ოსური მედიის ცნობით, პუტინმა განაცხადა, რომ "სიტუაცია სამხრეთ კავკასიაში საგრძნობლად გაუმჯობესდა, რუსეთთან სავაჭრო ბრუნვაც 48%-ით გაიზარდა", რის შედეგადაც, პუტინმა ბიბილოვს რესპუბლიკაში ახალი შესაძლებლობის განხილვა შესთავაზა. მათ შორის ისაუბრა სამხრეთ ოსეთში ახალ საინვესტიციო პროგრამით გათვალისწინებულ ფინანსურ მხარდაჭერაზე და შეღავათიან კრედიტებზე.

"ჩვენ ეკონომიკის განვითარებაზე ვართ ორიენტირებული. ეს ეხება, ვაშლის ბაღების გაშენებას, ხორცპროდუქციის წარმოებას... ასევე, ვცდილობთ განვითარდეს სოციალურ სფეროც. რუსეთის ფედერაციის დახმარებით კიდევ უფრო მეტს შევძლებთ" – განაცხადა ანატოლი ბიბილოვმა შეხვედრის დროს.

რუსული და ოსური მედიის ინფორმაციით, მხარეების საუბრის საგანი სამხრეთ კავკასიაში უსაფრთხოების საკითხები და ბოლოდროინდელი გამოწვევებიც გახდა, რომელსაც კოორდინირებულად უნდა უპასუხონ.

გუშინვე ცნობილი გახდა, რომ ნაურუს პრეზინდეტი, ბარონ ვაკა მოსკოვში შეხვედრის დროს სამხრეთ ოსეთის დე ფაქტო რესპუბლიკის პრეზიდენტს, ანატოლი ბიბილოვს წყნარი ოკეანის რეგიონში ინტერესების ლობირებას დაჰპირდა.

ოსური მედიის მიერ გავრცელებული ინფორმაციით, ნაურუს პრეზიდენტმა აღნიშნა, რომ მისთვის გასაგებია ყველა ის პრობლემა, რომელსაც სამხრეთ ოსეთი აწყდება. "მზად ვართ, ყველანაირად მხარი დავუჭიროთ რესპუბლიკის სწრაფვას მისი დამოუკიდებლობის აღიარების საკითხში და ასევე, რეგიონში სამხრეთ ოსეთის ინტერესების ლობირებას. დღეს წყნარი ოკეანის რეგიონის მხოლოდ ერთი ქვეყანა – ნაურუ აღიარებს სამხრეთ ოსეთის სუვერენიტეტს, მაგრამ დარწმუნებული ვარ, მომავალში მათი რაოდენობა გაიზრდება. ამაზე ვიმუშავებთ", - აღნიშნა ბარონ ვაკამ.

დე ფაქტო რესპუბლიკის პრეზიდენტის, ანატოლი ბიბილოვის თქმით, ნაურუს საგარეო უწყებას გაუგზავნეს ნოტა თხოვნით, აკრედიტაცია მისცენ სამხრეთ ოსეთისა და ახალი ზელანდიის მოქალაქეს, თაიმურაზ ბიტიევს, სამხრეთ ოსეთის წარმომადგენლად დანიშვნაზე.

მოსკოვში ბიბილოვთან შეხვედრამდე ნაურუს პრეზიდენტი აფხაზეთში იმყოფებოდა, სადაც განაცხადა, რომ მას შემდეგ, რაც 2009 წელს აფხაზეთის სუვერენიტეტი აღიარა, აშშ-სა და საქართველოს მხრიდან ზეწოლას განიცდის.

"ჩვენ რეალურად აღმოვჩნდით ზეწოლის ქვეშ. ქრთამის აღების მცდელობებიც იყო, თუმცა ჩვენ განვაცხადეთ, რომ არ ვაპირებთ გზიდან გადახვევას. ეს სიტუაცია შანტაჟს ჰგავდა", - განაცხადა კუნძულოვანი ქვეყნის პრეზიდენტმა.

2009 წლის 15-16 დეკემბერს ნაურუს რესპუბლიკა გახდა მსოფლიოში მეოთხე ქვეყანა, რომელმაც აღიარა აფხაზეთის და ე.წ. სამხრეთ ოსეთის დამოუკიდებლობა რუსეთის, ნიკარაგუას და ვენესუელას შემდეგ...

დამოუკიდებელ რესპუბლიკებად აფხაზეთი და სამხრეთ ოსეთი აღიარეს ვანუატუმ და ტუვალუმ, რომლებმაც მოგვიანებით ამ აღიარებაზე უარი თქვეს.

2017 წლის მაისში, აშშ-ის პრეზიდენტმა დონალდ ტრამპმა ხელი მოაწერა საკანონმდებლო აქტს, რომელიც სხვა საკითხებთან ერთად, აფხაზეთისა და სამხრეთ ოსეთის დე ფაქტო რესპუბლიკებთან დაკავშირებულ საკითხებსაც შეეხებოდა. აქტის თანახმად, ვერც ერთი სახელმწიფო ვერ მიიღებს აშშ-ისგან ფინანსურ დახმარებას, რომელიც აღიარებს აფხაზეთისა და სამხრეთ ოსეთის დამოუკიდებლობას და დაამყარებს მათთან დიპლომატიურ ურთიერთობას.

აქტში განმარტებულია, რომ აფხაზეთი და სამხრეთ ოსეთი რუსეთის მიერ ოკუპირებული საქართველოს ტერიტორიებია. ამას გარდა, აშშ წინააღმდეგი იქნება ნებისმიერი სახის დახმარებისა (სესხი, კრედიტი ან გარანტია) ნებისმიერ პროგრამაზე, თუ ქვეყანა ლახავს საქართველოს ტერიტორიულ მთლიანობას. ახალი რეგულაციის ცვლილებები ნაურუს ფინანსურ მხარდაჭერასაც უნდა შეხებოდა.

საქმე ის არის, რომ ნაურუს ფინანსურად ეხმარებიან ისეთი საერთაშორისო ორგანიზაციები, როგორიცაა აზიის განვითარების ბანკი, მსოფლიო ბანკი, გაეროს ბავშვთა ფონდი, ჯანდაცვის მსოფლიო ორგანიზაცია და გაეროს მოსახლეობის ფონდი. ამ ორგანიზაციის მსხვილი ფინანსური პარტნიორია ამერიკა.

ლალი პაპასკირი

AMBEBI. GE