"10 ღვინო, რომელიც უნდა გასინჯო სანამ ცოცხალი ხარ" - პროექტის ფარგლებში 23 სახეობის ღვინის დეგუსტაცია გაიმართა

"10 ქართული ღვინო, რომელიც უნდა გასინჯო სანამ ცოცხალი ხარ" – პროექტის ფარგლებში დღეს "ბიბლუსის" მრავალფუნქციურ ფილიალში, Allwine.ge-მ 23 სახეობის ქართული ღვინო მსურველებს სადეგუსტაციოდ წარმოუდგინა.

ღონისძიებაზე მისულ სტუმრებს შესაძლებლობა ჰქონდათ დაეგემოვნებინათ თითოეული მათგანი და საუკეთესო აერჩიათ. როგორც აღმოჩნდა, საუკეთესო ქართული ღვინის სახეობების დაგემოვნების მსურველი ბევრი იყო, რომელთაც შემდეგ საშუალება ეძლეოდათ, ხმა სასურველი ღვინისთვის მიეცათ.

დეგუსტაციაში მონაწილეობა მიიღო საქართველოს სომელიეთა ასოციაციის წევრმა ნიკა დევიძემ, რომელმაც აღნიშნა, რომ ასეთი ტიპის დეგუსტაცია ქართული ღვინის პოპულარიზაციისთვის ძალიან მნიშვნელოვანია.

"გასინჯულ ღვინოებს შორის, სავარაუდოდ, საფერავი ამოვიცანი, თუმცა მე უპირატესობას თეთრ ღვინოებს ვანიჭებ. მომწონს თეთრი არომატული ღვინოები, მაგალითად, ქისი. მიმაჩნია, რომ საფერავს საქართველოში ძალიან დიდი პოტენციალი აქვს, მაგრამ ამისთვის ძალიან ბევრი უნდა ვიმუშაოთ. ეს პროექტი, ღვინისა და წიგნის კომბინაცია ძალიან საინტერესოა... ღვინო ყოველთვის სასიამოვნო, საინტერესო და ფილოსოფიურ საუბრებს უკავშირდება. იმის გათვალისწინებით, რომ ღვინო ქართული ეთნიკური კულტურის ძალიან დიდი საგანძური იყო ასეთი პროექტები ძალიან საინტერესოა, რადგან ეროვნული საგანძურის პოპულარიზაცია მოხდეს," – განმარტავს ნიკა დევიძე.

სომელიეთა ასოციაციის წევრის გემოვნებით, საუკეთესო 10 ქართულ ღვინოს შორის აუცილებლად უნდა მოხვდეს საფერავი. "ასევე აუცილებლად უნდა იყოს რამდენიმე იმერული და კახური ღვინო," – დასძენს ის.

საკუთარი არჩევანი დღეს ფოტოჟურნალისტმა, გოგა ჩანადირმაც დააფიქსირა. მისი რჩევით, სანამ ცოცხლები ვართ არამხოლოდ 10 ქართული, არამედ ყველა ეროვნულ ღვინო უნდა დავაგემოვნოთ.

"პროექტი, რომელსაც ჰქვია "10 ღვინო, რომელიც უნდა გასინჯო, ვიდრე ცოცხალი ხარ," ძალიან საინტერესოდ და უცნაურად ჟღერს. ვფიქრობ, რომ ეს არაჩვეულებრივი პროექტი, ღვინის კულტურის ქვეყანაში ღვინის პოპულარიზებას ემსახურება. ჩემი აზრით, ღვინო ძალიან უხდება წიგნს, დიდი ხანია მე ეს უკვე ვსინჯე, ოღონდ ცხადია, არ უნდა დაითრო, რადგან მაშინ წიგნის შინაარსის გაგება გაგიჭირდება," – აღნიშნავს გოგა ჩანადირი Ambebi.ge-სთან საუბრისას.

თავად წითელი, ნახევრად ტკბილი ღვინის მოყვარულია, თუმცა მოსწონს რამდენიმე თეთრი ღვინოც, რომლებიც, ძირითადად, ევროპული ტექნოლოგიით მზადდება.

"დღეს დაგემოვნებისას განსაკუთრებით მომეწონა ერთ–ერთი წითელი ღვინო, რომელსაც შეფასებისას ხუთი პლუსითაც კი დავუწერე. სავარაუდოდ, ეს ღვინო არის ხვანჭკარა... ჩემი საყვარელი ღვინოებია ქისი, მანავის მწვანე, ხვანჭკარა, ტვიში, შავკაპიტო. ტრადიციული ღვინოებიდან კი ალბათ, უფრო ოჯახის თეთრ ღვინოს ავირჩევდი," – აღნიშნავს გოგა ჩანადირი.

ღვინის დეგუსტაციას "ბიბლუსში" ღვინის კლუბის წევრი და ჟურნალისტი, ალეკო ცქიტიშვილიც ეწვია. მისი თქმით, ქართული ღვინის ინდუსტრიას კიდევ უფრო დახვეწა სჭირდება, ასეთი ღონისძიებები კი მისი პოპულარიზაციისა და განვითარებისთვის საჭიროა.

"ასეთ აქციებს მივესალმები, რადგან უცნობი, მივიწყებული ქართული ვაზის ჯიშების ხელახლა წინ წამოწევასა და ბაზარზე გამოტანას უწყობს ხელს, ასევე ხდება მომხმარებლის ინფორმირება, რომ ეს ახალი, კარგად დავიწყებული ჯიშები, რომლებიც ჩვენ ახალი გვგონია, არსებობს, ცოცხალია და ღვინის მოყვარულებს შეუძლიათ, მოვიდნენ და დააგემოვნონ," – აღნიშნავს ღვინის მოყვარული ალეკო ცქიტიშვილი.

სპეციალისტის თქმით, 10 საუკეთესო ქართული ღვინის შერჩევისას უნდა 5 ღვინო ჯიშის, ხოლო 5 ადგილწარმოშობის მიხედვით უნდა დასახელდეს.

"ჯიშების მიხედვით უნდა დავასახელოთ ხიხვი, კახური ვაზის ჯიში, რომელიც დავიწყების ნისლიდან უკვე გამოდის და რამდენიმე კომპანიამ უკვე ჩამოასხა. ასევე ვასახებ კრახუნას, რომელიც იმერეთის ვაზის ჯიშია. მესამე ადგილზე არის უსახელოური, მეოთხე მეხუთე ადგილებს ჩემთვის იკავებს საფერავი და რქაწითელი. რაც შეეხება ადგილწარმოშობის დასახელებებს, ჩემთვის პირველ ადგილზე არის სვირი, შემდეგ მანავი, ხვანჭკარა და ქინძმარაული, მეხუთე ადგილს კი მუკუზანი იკავებს," – დასძენს ალეკო ცქიტიშვილი.

ცნობილი ფაქტია, რომ ქართველი ღვინო ძალიან მოსწონთ უცხოელებს და საქართველოში ჩამოსვლისთანავე ტრადიციულ ჯიშებს აგემოვნებენ ხოლმე, რომლებითაც ჩვენ ძალიან ვამაყობთ. დეგუსტაციის ამერიკელი სტუმარი, გრანტ ფრიმანი, რომელიც უკვე დიდი ხანია საქართველოში ცხოვრობს, მშრალი ღვინის მოყვარულია, თუმცა, მისი თქმით, ქართული ნახევრად ტკბილი ღვინო მისთვის აღმოჩენა იყო.

"ახლა გავსინჯე დაახლოებით შვიდი განსხვავებული ღვინო, რომელთა შორისაც ამოვიცანი მუკუზანი, ჩემთვის ერთ–ერთი საყვარელი ქართული ღვინო, თუმცა ყველაზე მეტად მაინც ოჯალეში მომწონს, რადგან მშრალია. გავსინჯე ნახევად ტკბილი საფერავი, რომლითაც ასევე კმაყოფილი დავრჩი," – აღნიშნა გრან ფრიმანმა ღვინის დეგუსტაციის დროს.

თქვენ რომელი ღვინო უნდა გასინჯოთ, სანამ ცოცხალი ხართ? - ამ შეკითხვაზე პასუხის პოვნაში Allwine.ge და თქვენი თანამემამულეები აუცილებლად დაგეხმარებიან, რადგან პროექტში "ქართული ღვინის ფესტივალი" მონაწილეობა უკვე 50 000–მდე ადამიანმა მიიღო. ხმის მიცემა ახლაც ონლაინ რეჟიმში მიმდინარეობს და გამოკითხვაში მონაწილეობის მიღება "კვირის პალიტრის," "ლელოს," "ავტობილდისა" და "გზის" მკითხველსაც შეუძლია.

საწყის ეტაპზე, სახალხო ხმის მიცემის დასრულების შემდეგ გამოვლინდება ღვინის 10 სახეობა, 5 თეთრი და 5 წითელი. სახეობების არჩევის შემდეგ, დეგუსტაციებზე კომპანიებს საშუალება მიეცემათ, თავიანთი რჩეული ღვინოები წარადგინონ, პროფესიონალი სომელეებისგან დაკომპლექტებული ჟიური კი კონკრეტულ სახოებებში საუკეთესო მეღვინეებს გამოავლენს. რაც ყველაზე მნიშვნელოვანია, "პალიტრა მედიის" პროექტის მიზანს წარმოადგენს ქართული ღვინის პოპულარიზაცია, როგორც საქართველოში, ისე უცხოეთში.

მარიამ მენაბდიშვილი

Ambebi.ge