დიჯეი რემბო გოგა ონიანის დაკავებაზე: "მემუქრებოდა, თუ "ნაციონალებთან" არ ვითანამშრომლებდი 6 წელს მომისჯიდა. ახლა უკან დაუბრუნდა..."
"სამი წელია, ყოველდღე ველოდებოდი ამ განაჩენს" - ასე აფასებს AMBEBI.GE-სთან საუბარში გოგა ონიანის პატიმრობას დიჯეი რემბო, რომლის დაკავებისთვისაც ონიანს სასჯელის სახით 5 წელი მიესაჯა.
როგორც ლევან მდინარაძემ აღნიშნა, გოგა ონიანმა ის 2011 წელს დააკავა და სამი წელია საქმეზე მიმდინარეობდა სასამართლო პროცესი.
"სამი წელია ყოველდღე ველოდები ამ განაჩენს, უკვე იმედიც კი მქონდა გადაწურული. სასამართლომ ყველა დეტალი შეისწავლა და ამის შემდეგ გამოიტანა განაჩენი. 2011 წელს დამაკავა გოგა ონიანმა, სამი წელია საქმეზე მიმდინარეობს სასამართლო პროცესი, ბევრჯერ დამკითხეს და ეს დღეც დადგა, როცა მას პასუხისგება მოუწევს. მითუმეტეს დღეს, 7 ნოემბერს, რომელიც ტრაგიკული დღე არის თითოეული ქართველისთვის", - განაცხადა ლევან მდინარაძემ იგივე დიჯეი "რემბომ".
მისივე თქმით, პირადად გოგა ონიანი იღებდა მის დაკავებაში და ზეწოლაში მონაწილეობას. მდინარაძის შეფასებით, ონიანის დაკავება არ შეიძლება განვიხილოთ როგორც პოლიტიკური ანგარიშსწორება. 2011 წლის დაკავების დეტალებს დიჯეი ასე იხსენებს:
"ერთ-ერთი პირველი ადამიანი ვიყავი, რომელმაც "ქართული ოცნების" მაისურების დარიგება დაიწყო. როგორც კი, დავიწყე ბიჭების შეკრება, მეორე დღეს სადარბაზოსთან დამხვდა პირადად გოგა ონიანი, თანმხლებ პირებთან ერთად, ჩამსვა მანქანაში და ისე, რომ არ განუმარტავს რის საფუძველზე დამაკავა, გლდანისკენ წავიდა და გზაში დამიწყო დაკითხვა. აინტერესებდა სად ვიყავი წინა დღით და ა.შ. მითხრა რომ ბრალდებული ვარ სახელმწიფო ღალატში, იმიტომ რომ ვარიგებდი "ქართული ოცნების" მაისურებს და ვიყავი ბერას მეგობარი.
როდესაც მივედით გლდანი-ნაძალადევის განყოფილებაში, იქ გააგრძელა ჩემი დაკითხვა ონიანმა და ბოლოს შემომთავაზა "თანამშრომლობა". მემუქრებოდა, რომ თუ "ნაციონალურ მოძრაობასთან" არ ვითანამშრომლებდი მომისჯიდა 6 წელს. ახლა მას დაუბრუნდა თითქმის 6 წელი... ადამიანის ცუდი არ მიხარია, მაგრამ როგორც იქნა სამართალმა პური ჭამა... გოგა ონიანს ბევრი ოჯახი ჰყავს გამწარებული.
- გოგა ონიანის მხარდამჭერები წერენ, რომ ეს იყო ანგარიშსწორება...
- ჩვეულებრივი აბაროტი იყო ჩემგან, ანგარიშსწორება ან რაც უნდათ ის დაარქვან. ეს რომ პოლიტიკური ყოფილიყო, სასამართლო იმ დღესვე მიიღებდა გადაწყვეტილებას. მაგრამ სამი წლის მანძილზე მიდიოდა საქმის განხილვა და ყველა დეტალი ზუსტად იქნა შესწავლილი.
თამარ ბოჭორიშვილი
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
