"ორივე დაოჯახებული იყო, ერთს 8 წლის ბავშვი დარჩა" - რუსთავში მომხდარ საზარელ ავარიას ბიძაშვილები ემსხვერპლნენ

რუსთავი-წითელი ხიდის ავტომაგისტრალზე მომხდარ ავტოსაგზაო შემთხვევას ოთხი ადამიანი ემსხვერპლა. წინასწარი ინფორმაციით, მსუბუქი ავტომანქანის მძღოლმა საჭე ვერ დაიმორჩილა, გზის სავალი ნაწილიდან გადავიდა და ბილბორდის ბოძს შეეჯახა. შეჯახების შედეგად ავტომანქანაში მსხდომი ოთხი ადამიანი გარდაიცვალა. მათ შორის ორი მამაკაცი ზ.ტ. და ზ.ა. ბიძაშვილები იყვნენ. Ambebi.ge მათ ნათესავს თ. ბ-ს დაუკავშირდა:

- ორი გარდაცვლილი ჩემი ნათესავია, ერთი ჩემი ბიძაშვილია, მეორე - დეიდაშვილი, წარმოშობით საჩხერიდან არიან. ჩემი დეიდაშვილი ოჯახით რუსთავში ცხოვრობს, ბიძაშვილი კი საჩხერიდან მეუღლის გარეშე იყო ჩამოსული. ორივე ერთად მუშაობდნენ, თბილისში.

- სად მუშაობდნენ?

- ოთხივე გარდაცვლილი ხელოსნები იყვნენ. წითელ ხიდზე ობიექტი ჰქონდათ აღებული, ერთ-ერთ სათამაშო კლუბს აშენებდნენ. სამსახურში მიდიოდნენ, როდესაც ეს ამბავი მოხდა. როგორც ჩანს, გადაჭარბებული სიჩქარით მოძრაობდნენ და ბოძს შეეჯახნენ, შემდეგ მანქანა გზის სავალი ნაწილიდან გადავარდა და ტრაგედია დატრიალდა.

- თქვენი ბიძაშვილი იჯდა საჭესთან?

- ჩემებმა მანქანის ტარება არც იცოდნენ, საჭესთან მათი თანამშრომელი იჯდა.

- ნასვამები ხომ არ იყვნენ?

- არა, არცერთი მათგანი არ სვამდა. ექსპერტიზაც ჩაუტარდა და ოთხივე ფხიზელი იყო.

- დაოჯახებულები იყვნენ?

- ჩემი ბიძაშვილი და დეიდაშვილი დაოჯახებულები არიან. ერთს 8 წლის შვილი ჰყავს, მეორეს - მეოთხე კლასელი. ორივეს მცირეწლოვანი შვილები დარჩათ. ჩემი ბიძაშვილი გუშინ გადაასვენეს საკუთარ სახლში, დეიდაშვილს კი ხვალ გადავასვენებთ. მათი თანამშრომელი ბიჭების ოჯახური მდგომარეობის შესახებ არაფერი არ ვიცი. 

თამარ ბოჭორიშვილი

Ambebi.ge

ფოტო: info rustavi